İri ticarət mərkəzlərində yanğın təhlükəsizliyi qaydalarına əməl edilmədiyinə daha bir fakt - “EuroHome”...
Məlum olduğu kimi, dekabrın 10-da səhər saatlarında Bakı şəhərinin Binəqədi rayonunda yerləşən “EuroHome” tikinti materialları bazarı ərazisində yanğın baş verib. 5 hektarlıq ərazini əhatə edən bazar, demək olar ki, tam yanıb. Dövlət Yanğından Mühafizə Xidmətinin yanğınsöndürmə qüvvələri və Xüsusi Risqli Xilasetmə Xidmətinin müvafiq qüvvələri hadisə yerinə cəlb olunublar.
Yanğının söndürülməsi istiqamətində ciddi addımlar atılıb. Sahibkarların yanğınla bağlı verdiyi məlumatlardan məlum olur ki, bazarda yanğın təhlükəsizliyi ilə bağlı vəziyyət heç də ürəkaçan olmayıb.
Yanğında ziyan görən sahibkarlardan biri deyib ki, 150 minlik ziyana düşüb. Onun sözlərinə görə, yanğın ilk olaraq kafel-metlax satılan dükanda başlayıb: “Səhər saat 9 radələrində bildik ki, kafel-metlax satılan dükanlardan birində yanğın var. Tez Fövqəladə Hallar Nazirliyinə zəng etdik. Burada 100-dən çox mağazaya ziyan dəyib. Mənim 150 min manatlıq malım yanıb-kül olub. Bazarın yarısının sığortası yoxdur, eləcə də mən də sığortalanmadım. Nisyə dəftərim vardı. 50-60 minə yaxın alacaqlarım vardı, o dəftər də yandı. Bilmirəm kimdən nə alacam, nə qədər alacam. Heç kim bizə heç nə demir”.
Adıçəkilən bazarda mağazası olan sahibkar Seymur Orucov isə deyib ki, tikinti materialları bazarında heç bir təhlükəsizlik siqnalı olmayıb.
İnternet üzərindən apardığımız araşdırma nəticəsində məlum olub ki, sözügedən bazarın sahibi Azay Möhnətov adlı iş adamıdır. Azərbaycanlı iş adamı, həmçinin, AF Holdinq Şirkətlər Qrupunun prezidentidir. O, həmçinin, "Uğur-97" şirkətinin prezidenti, Azərbaycan Memarlar Birliyinin üzvüdür. "AF Hotel Aqua Park"ın sahibidir.
Baş verən yanğın hadisəsi və orada mağazası olan sahibkarların verdikləri açıqlamalardan görünür ki, iri ticarət obyektlərinin yanğından təhlükəsizlik problemi hələ də öz həllini tapmayıb. Biz analoji yanğın hadisələrinin Sumqayıtdakı “Karvan” Ticarət Mərkəzində, “Binə” və “Sədərək” bazarlarında və ən sonda 8 km ərazisindəki “Diqlas” ticarət mərkəzində baş verməsinin şahidi olmuşuq. Görünür, həmin hadisələr də iri ticarət mərkəzlərinə nəzarət edən sahibkarlar üçün bir siqnal olmayıb. Bənzər hadisələrin qarşısını almaq üçün hansı addımların atılması zəruridir?
- Elşən Əliyev: “Sahibkar istəməyə bilər, onu təhlükəsizlik tədbirlərini ən yüksək səviyyədə görməyə qanunların tətbiqilə məcbur etmək lazımdır”
Sığorta məsələləri üzrə ekspert Elşən Əliyev qəzetimizə açıqlamasında bildirdi ki, bazardakı yanğını yaxından seyr edə bilib: “Bizim yolumuz oradan keçir. Səhər-səhər təsadüfən həmin mənzərəni yaxından izləyə bildim. Çox dəhşətli bir yanğın idi. İnsafən, demək lazımdır ki, əlaqədar qurumlar yanğının aradan qaldırılması istiqamətində əllərindən gələni edirdilər. Yanğının söndürülməsinə hətta helikopterlər, təyyarə də cəlb edilmişdi. Təəssüf ki, bazara böyük ziyan dəydi. Orada çalışan sahibkarlarla danışıqdan sonra yenə ənənəvi mənzərənin şahidi oluruq. Deyirlər ki, sığorta yox, bazarda yanğınla bağlı hər hansı bir təhlükəsizlik-xəbərdarlıq siqnaları quraşdırılmayıb. Biz analoji hallarla bir neçə dəfə rastlaşmışıq. Axı həmin bazarın xüsusiyyəti nəzərə alınmalı idi. Ora yanğın üçün çox risqlidir. Əsasən tez alışa bilən tikinti materialları satılır. Bir müddət əvvəl “Diqlas”da baş verən mənzərəni yadınıza salın. Həmin hadisə sahibkarlara təhlükəsizlik tədbirlərini gücləndirmək, icarədarlara isə mallarını sığortalamaq üçün bir sos siqnalı olmalı idi. Görünür, nəticə çıxarmayıblar. İndi yəqin ki, yaxın günlərdə biz həmin adamların dövlətdən kompensasiya tələb etdiklərinin şahidi olacağıq. Hər halda, əlaqədar qurumların da bu məsələdəki səhlənkarlığı nəzərə alınmalıdır. Sahibkar istəməyə bilər, onu təhlükəsizlik tədbirlərini ən yüksək səviyyədə görməyə qanunların tətbiqilə məcbur etmək lazımdır”.
Məhəmmədəli QƏRİBLİ
