“Müəllimlərin dərs saatları onların diaqnostik imtahanlarının nəticələri əsasında bölündüyü üçün, məktəblərdə əlavə dərs saatları yaranıb ki, bu da əlavə vakansiyaları zəruri edir”
Azərbaycanın orta ümumtəhsil məktəblərində ilbəil müəllimlər üçün vakant yerlərin sayı artırılır. Bu da onu deməyə əsas verir ki, orta ümumtəhsil məktəbləri kadr islahatlarına açıqdır və tədrisin keyfiyyətinin yüksəldilməsinə çalışır.
Bu tədris ili üçün 7 mindən artıq vakant müəllim yeri var. Bu barədə təhsil nazirinin müavini Məhəbbət Vəliyeva müəllimlərin işə qəbulu üzrə müsabiqənin müsahibə mərhələsinin nəticələrindən danışarkən bildirib.
Qeyd edilənə görə, müsahibələrdə biologiya, fransız dili, texnologiya və təsviri incəsənət müəllimi olmaq istəyən 736 namizədin iştirakı haqqında bildirilir.
M.Vəliyevanın sözlərinə görə, avqustun 19-dan etibarən keçirilən müsahibələrdə 2 632 namizəd iştirak edib. Nazir müavini 2019-2020-ci tədris ili üçün müsabiqəyə respublika üzrə, ümumilikdə, 7 mindən artıq vakant yer çıxarıldığını deyib.
Təhsil nazirinin müavini vurğulayıb ki, bu il məktəbdə psixoloq vəzifəsində işləyənlər də müsahibə komissiyasının tərkibinə üzv olaraq cəlb edilib və məqsəd hər bir namizədin ixtisas, pedaqoji, eləcə də metodiki biliklərlə yanaşı, psixoloji vəziyyətinin qiymətləndirilməsinə nail olmaqdır. Builki müsahibələrdə müəllimliyə namizədlərin yüksək nəticələr göstərdiyini qeyd edən M.Vəliyeva onların hər birinə uğurlar arzulayıb, müəllim adını qazanacaq namizədlərin təhsilin inkişafına töhfə verəcəklərinə əminliyini ifadə edib.
Qeyd edək ki, müsahibə zamanı namizədlərin ixtisası üzrə bilik və bacarıqları, psixoloji durumu və ümumi dünyagörüşü yoxlanılır. Həmçinin, namizədlər ixtisasları üzrə əvvəlcədən elan olunmuş mövzulardan birini açıq dərs formatında müsahibə komissiyası üzvlərinə təqdim etməlidirlər. Həmin mövzu proqram təminatı tərəfindən təsadüfi seçim əsasında müəyyən edilir.
- Kamran Əsədov: “Hər il 7 mindən çox müəllimin təhsil sisteminə daxil olması təhsilin inkişafına, dinamikliyinə müsbət təsir göstərir”
Məsələyə münasibət bildirən tanınmış təhsil eksperti Kamran Əsədov “Bakı-Xəbər”ə bildirdi ki, bu əhəmiyyətli rəqəmdir. “İlk növbədə qeyd etmək istəyirəm ki, artıq 10 ildir orta məktəblərdə işləmək istəyən müəllimlərin işə qəbulu 4 mərhələdən (elektron ərizədəki göstəricilərin qiymətləndirilməsi, test imtahanı, vakant yerlərin seçilməsi və müsahibə) ibarətdir. Test imtahanı mərhələsində namizədlərə 40 ixtisas, 10 kurikulum, 10 məntiq olmaqla 60 sual təqdim ediləcək. Bu mərhələdə keçid balını toplamış namizədlər 8 vakant yer seçə biləcəklər. Namizədlərin vakant yerlərə yerləşdirilməsi elektron ərizələrində qeyd etdikləri seçim ardıcıllığı gözlənilməklə aparılırır. Müsahibə mərhələsində test imtahanlarının nəticələrinə əsasən, vakant yer tutmaq hüququ qazanmış namizədlərin peşəkar kompetensiyaları, psixoloji hazırlığı və ümumi dünyagörüşü yoxlanılır.
Qeyd edim ki, hazırda 4472 orta məktəbdə 151 min müəllim çalışır.
Amma hər il 65 yaşı tamam olduğuna görə, iş yerini dəyişdiyinə görə və digər səbəblərdən müəyyən qədər vakant yer yaranır.
Eyni zamanda, müəllimlərin dərs saatları onların diaqnostik imtahanlarının nəticələri əsasında bölündüyü üçün, məktəblərdə əlavə dərs saatları yaranıb ki, bu da əlavə vakansiyaları zəruri edir. Təhsil Nazirliyinin həyata keçirdiyi siyasətin sosialyönümlü oldğunu nəzərə alsaq, onlar ölkədə daha çox insanın işlə təmin olunması üçün ciddi səy göstərirlər. Hər il 7 mindən çox müəllimin təhsil sisteminə daxil olması təhsilin inkişafına, dinamikliyinə müsbət təsir göstərir. Son 5 il ərzində Təhsil Nazirliyi tərəfindən 25 minə yaxın yeni şəxs təhsil sisteminə daxil olub. Bu olduqca müsbət bir addımdır” - deyə K.Əsədov vurğuladı.
İradə SARIYEVA
.jpg)