Məlum olduğu kimi, Dövlət İmtahan Mərkəzi (DİM) tərəfindən keçirilən ali məktəblərə qəbul imtahanında abituriyentlər test tapşırıqlarını həll edərkən onların 4 səhv cavabı 1 düz cavabı sıradan çıxarır.
Abituriyentlərin bir çoxu bundan şikayətlənir və səhvlərin düzü aparması qaydasının ləğv olunmasını istəyirlər.
Bəs bu qayda necə müəyyənləşdirilib, niyə qəbul imtahanlarında 4 səhv 1 düzü aparır?
Dövlət İmtahan Mərkəzinin (DİM) sədri Məleykə Abbaszadə sözügedən mövzunu belə izah edib: "Məlumdur ki, səhvlərin düzü aparması yalnız qapalı suallara aiddir. Hər bir sualda bildiyiniz kimi, A, B, C, D, E cavab variantları mövcuddur. Bəzən imtahana heç hazırlaşmayan abituriyentlər var ki, sualların variant olmasından istifadə edib hamısına eyni variantı yazır. Belə olduğu halda həmin imtahan verən şəxsin təsadüfən 5-6 cavabı düz çıxacaq. Biz də bu təsadüfləri aradan qaldırmaq üçün 4 səhvin 1 düzü aparması qaydasını tətbiq edirik".
Nizami Hüseynov: "Sadəcə blok imtahanında problem ondan ibarətdir ki, 4 səhv 1 doğru cavabı aparır, məhz bu nüans abituriyentlərin blok imtahanında daha aşağı nəticə əldə etmələrinə səbəb olur"
Mövzu ilə bağlı fikir bildirən təhsil eksperti təhsil eksperti Nizami Hüseynov "Bakı-Xəbər"ə şərhində bildirdi ki, qəbul imtahanları yeni formatda keçirildiyindən son illər yüksək nəticə göstərən abituriyentlərin sayı azalıb. Yeni formata abituriyentlər hələ ki, uyğunlaşa bilmirlər. Bəlkə də növbəti illərdə abituriyentlər yeni tərtibata uyğunlaşacaq və maksimal nəticələr görə biləcəklər.
İmtahan suallarına verilən 4 səhv cavabın 1 düz cavabı silməsi sualına da aydınlıq gətirən ekspert bildirdi ki, bu, təsadüfən sualara düz cavab verməklə insanların taleyini həll edəcək bir-neçə balın toplanmasını əngəlləməklə ədalətli yerləşməyə səbəb olur: "Səhv cavabların onluq kəsirlər mərtəbəsində bal hissələrini yaratması səbəbindən eyni bal toplayanların sayını əhəmiyyətli dərəcədə azaldır və bu ədalətsiz yerləşməyə son qoyur".
Həmsöhbətimiz onu da əlavə etdi ki, blok imtahanına salınan suallar daha çətin olur: "Sadəcə blok imtahanında problem ondan ibarətdir ki, 4 səhv 1 doğru cavabı aparır. Məhz bu nüans abituriyentlərin blok imtahanında daha aşağı nəticə əldə etmələrinə səbəb olur. Dövlət İmtahan Mərkəzi bunu nəzərə alıb, blok imtahanında sualları abituriyentlərin bilik səviyyəsinə uyğun hazırlamalıdır".
Kamran Əsədov: "Bu qayda ona görə tətbiq olunub ki, biliyin qiymətləndirilməsi zamanı obyektiv olmaq lazımdır"
Təhsil eksperti Kamran Əsədov "Bakı-Xəbər"-ə açıqlamasında qeyd etdi ki, Dövlət İmtahan Mərkəzi tərəfindən keçirilən imtahanlarda 4 səhv cavabın 1 düz cavabı aparması mexanizmi 1992-ci ildə tətbiq olunub: "Mütəmadi olaraq bununla bağlı dəyişikliklər həyata keçirilir. Məlumdur ki, qəbul imtahanları iki hissədən ibarətdir. Birinci mərhələdə səhv cavablar düz cavablara təsir göstərmir. Ancaq ikinci mərhələ - ixtisas qrupları üzrə imtahanlarda abituriyentlərin qapalı test tapşırıqları üzrə 4 səhv cavab 1 düz cavabı aparır. Bu qayda ona görə tətbiq olunub ki, biliyin qiymətləndirilməsi zamanı obyektiv olmaq lazımdır. Bəzən abituriyentlər cavabını bilmədiyi suallara istədiyi cavab variantını seçir. Bu da bəzən bilmədən doğru cavab yazmasına səbəb olur. Belə olan halda həmin abituriyent yüksək hazırlıqlı abituriyentdən daha yuxarı bal toplamasına səbəb olur. Bu səbəbdən də hesab edirəm ki, 4 səhv cavabın 1 düz cavabı aparması mexanizmi düzgündür".
Günel CƏLİLOVA
