Elyar İslamoğlu: "Bakıda BMT-nin 50 illiyi adına küçənin olması məni təəccübləndirdi"
Bakıda BMT-nin 50 illiyi küçəsi var. Maraqlıdır ki, belə bir küçənin olması xeyli təəccüb yaradır. Əksər vətəndaşlarımız, ziyalılarımız "Bakıda BMT-nin 50 illiyi küçəsi varsa, belə çıxır ki, küçələrə BMT-nin 60, 100 illiyi adlarını da verməlik. Biz bununla hara gedirik? Bakıda nə üçün BMT-nin 50 illiyi adlı küçə olmalıdır?" - deyirlər.
Bakıda BMT-nin 50 illiyi adlı küçənin olmasına ictamai münasibət birmənalı deyil, qeyd edilir ki, Azərbaycan BMT-nin üzvüdür, BMT-nin Bakı ofisi fəaliyyət göstərir, dövlətimiz bu quruma üzvlük haqqı ödəyir, bu bəs etmir, gərək adına küçədə ola? İctimaiyyət nümayəndələri deyirlər ki, onda belə çıxır, BMT-nin adına küçə varsa, gərək ATƏT-in, Avropa Şurasının yübileyləri ilə də əlaqədar küçə adları olsun, bu isə qətiyyən gərəkli deyil. Bakıdakı bütün uyğunsuz küçə adlarının dəyişdirilməsi böyük zərurətə çevrilib. Həmin küçələr niyə də şəhidlərimizin adlarına olmasın? Arzuedilən məsələ odur ki, bütün bu kimi adlar şəhidlərimizin adları ilə əvəzlənsin.
"Bu əndrabadi küçə adları yadigarı – övladı qalmayan şəhdilərimizin adları ilə əvəzlənsin"
Filologiya üzrə fəlsəfə doktoru Elyar İslamoğlu "Bakı-Xəbər"ə bildirdi ki, Bakıda bəzi küçə adlarının bizimlə heç bir əlaqəsi yoxdur. O qeyd etdi ki, Bakıda BMT-nin 50 illiyi adına küçənin olması onu təəccübləndirib: "Bakıda BMT-nin 50 illiyi adına küçənin olması məni təəccübləndirdi. Çox təəssüf ki, Bakıda və Azərbaycanın başqa yerlərində mənasız, uyğunsuz, əndrabadi bir çox küçə adları var. Biz "Sovxoz" küçəsini, "Xəstəxana yanı" küçəsini, BMT-nin 50 illiyi küçəsini qeyd edə bilərik. Belə lazımsız, bizimlə əlaqəsi olmayan küçə adlarının hələ qalması özü də sual doğurur ki, bu işlə məşğul olan qurumlar haradadır, nə üçün bu küçə adları zamanında dəyişdirilmir? Çox istərdim ki, bu cür qəribə, mənasız, vətəndaşların xoşuna gəlməyən küçə adları şəhidlərin adları ilə əvəzlənsin. Sovet ideologiyasını ifadə edən ad nə üçün hansısa bir küçənin adında yaşamalıdır? Bizim şəhidlərimizin adlarının əbədiləşdirilməsi ən vacib məsələlərdən biridir. Torpaqlarımızın işğaldan azad olunması üçün bizim igidlərimiz böyük qəhrəmanlıqlar göstərdilər, 44 gün ərzində torpaqlarımızı işğaldan azad etdilər, bizə alın açıqılığı, üzağılığı bəxş etdilər. Hesab edirəm ki, tariximizlə, mədəniyyətimizlə, bizimlə heç bir əlaqəsi olmayan əndarbadi küçə adları yığışdırılmalıdır. Bu küçələr şəhidlərin adlarını daşısın. Elə şəhidlərimiz var ki, subay şəhid olublar və onlardan bir nişanə qalmayıb, heç olmasa onların adları küçələrə verilsin, onlar hər zaman xatırlansın. Bu əndrabadi küçə adları yadigarı – övladı qalmayan şəhidlərimizin adları ilə əvəzlənsin. Bu BMT-nin 50 illiyi küçəsi də ola bilər. Həmin o küçənin adının hansısa bir şəhidin adı ilə əvəzlənməsi və ora şəhidin barelyefinin vurulması onun ata-anası üçün bir təsəlli olardı. Ümid edirəm ki, Nazirlər Kabineti qısa zamanda bu məsələ ilə bağlı addım atacaq"-deyə E.İslamoğlu qeyd etdi.
O hesab edir ki, aidiyyəti qurumlar bu məsələ ilə məşğul olmalıdır. E.İslamoğlu bildirdi ki, BMT-nin 50 illiyi adlı küçənin olması ictimai müzakirələr doğurub və əksər vətəndaşlar bu küçəyə şəhidlərimizdən birinin adının verilməsini arzu edir.
Azərbaycanda küçələrə, meydanlara beynəlxalq təşkilatların yubileyi ilə bağlı adların verilməsininin uyğunsuz olduğunu deyən alim hesab edir ki, bu qurumlar heç zaman Azərbaycanın maraqlarından çıxış etməyib, əksinə, hamısı ermənipərəst mövqe tutublar…
Qeyd edək ki, BMT-nin Bakı Ofisi BMT-nin 50 illiyi küçəsində yerləşir.
Əli TURABOV
