Abuzər Əbilov: "Nazirliyin təklifi ilə hərbiçi hərbi pensiyaçı statsundan adi "kolxozçü" statusuna keçirilib"
"Çox uzun illərdir ki, Əmək və Əhalinin Sosial Müdafiəsi Nazirliyi ehtiyatda olan hərbiçilərə həddən artıq xoşagəlməz münasibət göstərməkdə davam edir. Bu nazirlik ehtiyatda olan hərbiçilərin xidmətdən sonrakı yaşamlarını qətiyyən stimullaşdırmır.
Hətta bir müddət əvvəl ehtiyatda olan hərbiçilər hərbi təqaüdçü statusundan ümumi statusa, əmək pensiyaları statusuna keçirilib. Bu da ehtiyatda olan hərbiçilərin dövlət qulluqçusu statusundan silinməsi deməkdir. Hətta keçmiş əmək və əhalinin sosial müdafiəsi naziri Səlim Müslümov 11 manat həcmində olan veteranlıq pulunu heç bir əsas olmadan, heç bir açıqlama vermədən uzun müddət kəsdi. Halbuki, bu 11 manat uzun müddət ehtiyatda olan hərbiçilərə, veteranlara kommunal xərclərə görə verilirdi. Bizim o dövrdəki şikayətlərimizi, müraciətlərimizi Ali Baş Komandan diqqətsiz qoymadı. Ehtiyatda olan hərbiçilərin 99 faizi həmin veteranlardır. Çünki 30 illik müharibə şəraitində yaşayan hərbiçilərin çox cüzi hissəsi tapılar ki, müharibədə, döyüşlərdə iştirak etməsin. Ehtiyatda olan hərbiçilərin hamısı müharibə veteranıdır, hamısı müharibə iştiarkçısıdır. Lakin son illərdə də Əmək və Əhalinin Sosial Müdafiəsi Nazirliyi və nazirliyin müqavilə ilə xidmətə götürdüyü bir sıra hüquqşünasları gecə-gündüz oturub veteranlara, ehtiyatda olan hərbiçilərə necə çətinliklər yaratmaq haqqında düşünürlər. Deyirlər ki, biz necə edək onları incidək, küsdürək, onlara problemlər yaradaq, həyat şəraitini çətinləşdirək.
Qeyd etdiyim kimi, bir müddət əvvəl hərbiçilərin stajını (xidmət keçmə illərini) 20 ildən 25 ilə qaldırmaq məsələsi ortaya atılıb. Yüz faiz əminəm ki, bu yenə də Əmək və Əhalinin Sosial Müdafiəsi Nazirliyinin (ƏƏSMN) təklifidir Milli Məclisə çıxarılıb. ƏƏSMN-in verdiyi bütün təkliflərə bir-iki deputat etiraz edir, əfsuslar olsun ki, qalan deputatlar bu təklifləri fərqinə, mahiyyətinə varmadan, yekdilliklə qəbul edirlər". Bunu "Bakı-Xəbər"ə açıqlamasında ehtiyatda olan zabit, hərbi ekspert Abuzər Əbilov deyib.
A.Əbilovun sözlərinə görə, hərb sənəti çox çətindir və bu iş gündəlik 8 saatlıq iş rejiminə uyğun deyil, onların fərqli rejimi var. Hərbiçilərin ağır rejimdə xidmət keçməsi, poliqonlara getməsi, düşmən qarşısında döyüşməsi və başqa çətin işlərinin olduğunu deyən müsahibimiz qeyd etdi ki, ağır rejimdə işləyən hərbiçilərin iş stajının 20 ildən 25 ilə artırılması təklifi tamamilə əsassızdır: "Siz bunu hansı əsasla edirsiz? Mülkü şəxslərin pensiyasını qaldırırsınız. Ölkədə əhalinin xeyli bir hissəsi pensiya yaşına çatmadan dünyasını dəyşir. Hərbi kontingentə münasibət niyə belə pisdir, bunun açıqlamasını verən varmı? Cavab verəndə də ƏƏSMN-nin departament rəhbəri Himalay Məmişov çox utopik fikirlər irəli sürür. Bunu haradan, nədən götürür, necə götürür, bu şəxsən mənə üçün məlum deyil. Söhbət 80 manat veteran pulundan gedirsə, Milli Məclisin Sosial Siyasət Komitəsinin sədri deyir ki, veteranlara verilən 80 manat çoxdur, bunu nəqliyyat və kommunal xərclər baxımından hesablasaq veteranlara 66 manat 20 qəpik bəs edir. Komitə sədri neçənçi illərin statikstikasını ortaya qoyub danışır, başa düşmürəm. Hazırkı dövrdə bir insanın bir aylıq kommunal və nəqliyyat xərcini hesablasaq 100 manatdan aşağı deyil. Amma bunu 66 manat 20 qəpiyə endirməklə və bunu da statistikanın boynuna atmaqla bu insanlar nə demək istəyirlər?
ƏƏSMN-nın təklifi ilə ehtiyatda olan hərbiçilər (hərbi pensiyaçılar) əmək pensiyaçısı statusuna keçirilib və nazir də bunu sevinclə elan etdi. Halbuki, həmin nazirin özünün ümumiyyətlə nə hərbi xidmətdən, nə hərbi xidmətdə olan çətinliklərdən, nə də hərbi xidmətlə bağlı olan məsələlərdən xəbəri var. Yəni ki, Nazirliyin təklifi ilə hərbiçi hərbi pensiyaçı statsundan adi "kolxozçü" statusuna keçirilib. Deyimimdə təhqir yoxdur. Hər bir əmək, hər bir çalışma sahəsi şərəflidir, lakin biz hərbiçi olaraq ömrümüzün axırına qədər hərbiçi qalmaq arzusundayıq, peşəni istəyərək seçmişik. Dünyanın hansı ölkəsində belə bir anlayış var ki, dövlət qulluqçusu pensiyaya çıxandan sonra adi vətəndaşla eyni tutulsun? Dövlət qulluqçusu statusundan kənarlaşdırılmalıyıqsa, o zaman Azərbaycanın əmək qanunları var, orada 8 saatlıq iş rejimi var, əgər insan 8 saatdan artıq işləyirsə, onun maaşı həmin saatlara görə hesablanır və vətəndaşa verilir, bayram günləri də həmçinin. Bu qanundur. Biz əməkçiyiksə 8 saat işləməmişik, 30 illik müharibənin, demək olar, 50-70 faizini hərbi hissələrdə, səngərlərdə keçirmişik. Demək olar ki, 24/7 anlamında xidmət aparmışıq. ƏƏSMN-in hərbiçilərə vurduğu maddi və mənəvi ziyan həddən artıq böyükdür "-deyə qeyd edən A.Əbilov vurğuladı ki, nazirlik həmin illərin pulunu hesablayıb hərbiçilərə ödəsin, ondan sonra "sizi əmək pensiyası statusuna keçirdik" desinlər. A.Əbilov hesab edir ki, veteran hərbiçilərə bu cür münasibət gənclərə də mənfi təsir edir.
A.Əbilovun qeyd etdiyi məsələlərlə bağlı ƏƏSMN-in də münasibətini işıqlandıra bilərik.
Leyla QARAXANLI
