Şəmsəddin Əliyev: “İstintaqın ilkin mərhələsində buraxılan o boşluqlar məhkəmə istintaqı zamanı tamamlanmalı idi”
Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin barəsində olan hökmdən verilən apellyasiya şikayəti üzrə məhkəmə prosesində təqsirləndirilən şəxslərdən biri Cəlal Kazımov çıxışında bildirib ki, mənimsəmədə birbaşa əli olan şəxslər hazırda azadlıqdadır:
“Müdafiə Nazirliyinin Maliyyə və Büdcə İdarəsinin Təftiş şöbəsinin rəisi Rəfail Xələfov bu iş üzrə başda durur. Onun 7 milyon mənimsədiyi ekspertiza ilə müəyyən olunsa da, azadlıqdadır. Bununla yanaşı, N.Poladov da hələ də həbs olunmayıb. Onlar bura gəlməlidir. Bu vəsatətimiz birinci instansiya məhkəməsində də təmin edilmədi. Mənim imzam heç yerdə getməyib. Lakin mən 37 aydır həbsdəyəm. 102 hərbi hissənin ekspert rəyi 1 həftəyə hazırlanıb verilib. Bu absurddur. Mənə mənimsəmə ilə bağlı irəli sürülən məbləğ tamamilə şişirdilib”.
Qeyd edək ki, Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi polkovnik Cəlal Kazımov, Quru Qoşunların maliyyə idarəsinin rəisi Bayram Bayramov, Hərbi Hava Qüvvələrinin maliyyə xidmətinin sabiq rəisi Vüsal Əlizadə, Müdafiə Nazirlinin Satınalmalar və Təchizat İdarəsinin sabiq rəisi polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi polkovnik Fikrət Mirzəyev Dövlət Təhlükəsizliyi Xidməti tərəfindən həbs ediliblər.
Təqsirləndirilən şəxslərin hər birinə Cinayət Məcəlləsinin 179.4-cü (xüsusilə külli miqdarda ziyan vurmaqla mənimsəmə törətmək) maddəsi ilə ittiham irəli sürülüb. Cinayət işi üzrə ümumilikdə dövlətə dəymiş ziyan 143 milyon manat hesablanıb.
Müdafiə Nazirliyində 143 milyonun mənimsənilməsi ilə bağlı Cəlal Kazımov açıqlama verib və o bildirib ki, mənimsəmədə birbaşa əli olan şəxslər hazırda azadlıqdadır.
Maraqlıdır, məhkəmənin gedişində üzə çıxan bu kimi nüanslar niyə kənarda qalır? Bu çox ciddi ittihamdı, C.Kazımov deyir ki, 7 milyonu Xələfov mənimsəyib, amma məsuliyyətdən kənarda qalıb. Belə ciddi məqamları məhkəmə niyə nəzərə almır?
“Təqdirləndirilən şəxslərin ifadələri əsasında azadlıqda olanların məhkəməyə dəvət olunması mütləqdir”
Hüquqşünas Şəmsəddin Əliyev “Bakı-Xəbər”ə “tam səmimi deyim ki, bu faktlar tükürpədici faktlardır. Yəqin ki, işin ilkin istintaqı ya Korrupsiyaya qarşı Mübarizə Baş İdarəsində, ya da ola bilsin, Dövlət Təhlükəsizlik Xidmətində aparılıb. Hər halda cinayət işinin ilkin istintaqı çox şeydən xəbər verir. Burda mənim hüquqşünas müşahidələrib belədir. Yayılan məlumatdan belə görünür ki, istintaqın ilkin mərhələsində kifayət qədər boşluqlar var. Yəni ilkin istintaq zamanı Kazımovla Xələfovun üzləşdirilməsi lazım idi. Çünki Kazımov deyir ki, 7 milyonu Xələfov mənimsəyib. Ortada 143 milyonun mənimsənilməsi var və Kazımov məlumat verib ki, mənimsəmədə birbaşa əli olan şəxslər azadlıqdadır. Məsələ ilə bağlı həbsdə olan şəxslərin hər birinin ilkin dindirmə zamanı ifadələri alınmalı idi, yəni kifayət qədər ətraflı şəkildə aydın olsun ki, burda kimin əli var, pul kimə verilib, pulu kim mənimsəyib və sair. Eyni zamanda hər biri ilə mütləq mənada üzləşmə olmalı idi. Bu üzləşmə prosesual həqiqəti ortaya çıxarmış olardı. Amma istintaqın ilkin mərhələsində buraxılan o boşluqlar məhkəmə istintaqı zamanı tamamlanmalı idi. Sosial ədaləti bərpa edən, Azərbaycan dövlətinin adından akt qəbul etmək səlahiyyətinə malik olan məhkəmə hakimiyyətinin nümayəndələrinin bu işə niyə belə səhlənkar yanaşmasını anlaya bilmirəm. Məsələn, Rəfail Xələfovun birinci istintaq mərhələsində dəvət olunub dindirilməməsi, məhkəmə istintaqından kənarda qalması da çox suallar doğurur. Niyə?
Ş.Əliyevin sözlərinə görə, bu pulları mənimsəyənlərin kimliyi, kimlərin imzası ilə götürüldüyü, eyni zamanda həbs olunanların heç bir günahı yoxdursa, bütün bu məsələlərin hamısı məhkəmə istintaqı zamanı dövlət ittihamçısı və vəkillər tərəfindən həqiqəti ortaya çıxarmaq üçün vəsatətə baxılmalıdır. O qeyd etdi ki, burda vəkilin, eyni zamanda dövlət ittihamçısının vəsatəti ola bilər. “Hətta təqdirləndirilən şəxslərin ifadələri əsasında azadlıqda olanların məhkəməyə dəvət olunması mütləqdir. Müəyyən ekspertizaların təyini ilə bağlı addımlar atılmalıdır. Amma təqdirləndirilən şəxslərin vəsatətlərinin təmin olunmaması absurddur. Təbii ki, məhkəmə hakimiyyətinə kölgə salan belə halların, faktların olması məhkəmə hakimiyyətinə baş ucalığı gətirmir. Hətta bir az da utanc gətirir”.
Ş.Əliyev qeyd etdi ki, bu faktlar koorupsiya cinayətlərinə və vəzifəli şəxslərin qulluq mənafeyi əleyhinə olan cinayətlər fəslinə aiddir, burda vəzifə səlahiyyətlərindən sui-istifadə halları məsələsi, dövlət büdcəsinin məqsədli şəkildə talanması, o vəsaitdən təyinatı üzrə istifadə edilməməsi var. O vurğuladı ki, burda eyni zamanda vəzifə səlahiyyətlərini aşmaq, rüşvət almaq və digər faktorlar mövcuddur: “Ona görə də bunlar xüsusilə ağır cinayətlərdir və burda vəzifəli şəxsin xidməti vəzifədə icrası ilə əlaqədar özü və digər şəxslər üçün qanunsuz üstünlük əldə etməsi məqsədi və qulluq mövqeyindən sui-sitifadə etmək faktorları var”.
Ş.Əliyev hesab edir ki, bu məsələlərə məhkəmə ciddi yanaşmalıdır.
“Məhkəmə hakimiyyəti hakimiyyətin bir qoludur, sosial ədalət məhkəmədə təmin olunur. Azərbaycan Prezidenti məhkəmə hakimiyyətinin müstəqilliyinin təmin olunmasında zəmanət verir.
Fikir verin, burda nə qədər nüanslar var. Həm də bizim konstitusiya ilə yanaşanda məhkəmələrin səlahiyyətləri nadir hallarda dəyişilə bilər. Ona görə də hakimlər qərəzsiz, ədalətlə, tərəflərin hüquq bərabərliyinə faktlara əsasən və qanuna müvafiq baxmalıdırlar. Ədalət mühakiməsi vətəndaşların qanun və məhkəmə qarşısında bərabərliyi əsasında həyata keçirilir. Hakimlər müstəqildir. Bunlar səlahiyyətləri müddətində dəyişməzdilər, yalnız ölkənin konstitusiyasına və qanunlara tabedirlər. Burda tərəflərin hüquq bərabərliyi pozulub axı. Ona görə də düşünürəm ki, hakimlər özlərinin toxunulmazlığına məsuliyyətli olmalıdırlar. Kifayət qədər onlara şərait yaradılıb, hamıdan çox əməkhaqqı alırlar. Yenə deyirəm, ictimai rəydə məhkəmə hakimiyyəti haqqında imicə ziyan gələn o dəhliz qapanmalıdır. Bir az da dərindən düşünəndə, il ərzində bizim məhkəmə hakimiyyətinin yanlış qərarları nəticəsində gəldiyi qənaətlər Avropa İnsan Hüquqları Məhkəməsində baxılarkən ləğv olunur, dövlət büdcəsindən təzminat ödənilir. Bax, bunlar məhkəmələrin yanlış qərarları nəticəsində baş verir”.
İradə SARIYEVA
