Azərbaycanda uşaq idmanının tarixi yeni deyil və bu sahədə çox dərin ənənələr mövcuddur. Tarixən Azərbaycan özünün pəhləvanları, idman ustaları ilə tanınıb və bu gün də onların şöhrəti ilə öyünürük.
Bütövlükdə, Azərbaycanda idmanın inkişafına xüsusi diqqət yetirilir və ölkədə uşaq idmanının təşəkkülü, formalaşması üçün böyük işlər görülür. Dövlətimizin uşaq idmanı siyasəti tam aydındır və bunun nəticəsidir ki, həm Bakıda, həm də bölgələrdə idman məktəbləri, idman klubları, olimpiya mərkəzləri, kompleksləri fəaliyyət göstərir ki, burada uşaqların kütləvi axını baş verir. Sevindirici haldır ki, ölkəmizin hər bölgəsində idmanın müxtəlif sahələri üzrə uşaq idmanı formalaşıb.
Məlumdur ki, müstəqil Azərbaycanda uşaq idman siyasətinin əsasını Heydər Əliyev qoyub. Ulu öndər ikinci dəfə hakimiyyətə qayıtdıqdan sonra əsas diqqət yetirdiyi sahələrdən biri məhz idman sahəsi oldu. O dövrdən başlayaraq Azərbaycan idmançıları beynəlxalq nüfuzlu idman yarışlarında kütləvi şəkildə iştirak etməyə başladılar. Ulu öndər idmanın dövlətimizin dünyada tanınmasında, imicinin möhkəmlənməsində müstəsna rolunu önə çəkərək deyirdi: "İdman, bədən tərbiyəsi xalqın sağlamlığı ilə bağlı olan mühüm sosial sahədir. Azərbaycan bayrağı dünyada, demək olar ki, iki dəfə qaldırılır. Bu, bir Azərbaycanın dövlət başçısı hər hansı ölkəyə gələrkən və bir də idmançılarımız beynəlxalq yarışlarda çempion adını qazanarkən baş verir. Azərbaycan himni səslənir, dövlət bayrağı qaldırılır".
Uşaq idmanının inkişafı dövlətin əsas prioritetlərindəndir...
Bir aralar hətta məlumat yayıldı ki, Azərbaycanda uşaq idman federasiyaları yaradılacaq.
Bir neçə il əvvəl qeyd edilirdi ki, uşaqlar üçün ayrıca idman federasiyaalrının yaradılması dövlətin prirotetlərində idmana olan qayğının tərkib hissəsidir və bu çox vacibdir. Ekspertlər bildirirlər ki, idmanla böyüyən uşaqlar daha aktiv, özünə güvənən və nizam-intizamlı olaraq daha sağlam bir insan olaraq böyüyürlər.
Bütün bölgələrdə Gənclər və İdman Nazirliyi yanında Gənclər və İdman Regional İdarələri fəaliyyət göstərir və bölgələrdə idman siyasətini həmin qurumlar həyata keçirir. Bu gün Azərbaycanın bölgələrində uşaq və gənclər mərkəzləri də fəaliyyətdədir, burada da uşaqlara idmanın sirrləri öyrədilir. Azərbaycanda uşaq idmanı çox inkişaf edib və paytaxtda olduğu kimi bölgələrdə də, bütün idman növləri yayılıb, klublar, mərkəzlər, ali dərəcəli məşqçi-müəllimlər fəaliyyət göstərirlər. Taekvondo, karate, cüdo, boks, güləş, şahmat, volebol, baskedbol və başqa idman növləri regionlarda da inkişaf edir. Əlbəttə, burada uşaq – gənclər idman məktəblərinin müəllimlərinin, rəhbərlərinin, idman klublarının, idman mərkəzlərinin də xüsusi rolu var. Əlbəttə, bölgələrdə Olimpiya İdman Komplekslərinin də açılmasında məqsəd uşaq və gənclərin idmana kütləvi şəkildə cəlb edilməsi olub. Bu gün bölgələrdə uşaqların kütləvi olaraq idmana maraq göstərməsi müsbətdir.
“Tovuzda uşaq idmanı inkişaf edir”
İdmanın müxtəlif növlərini yüksək səviyyədə inkişaf etdiyi rayonlarımızdan biri də Tovuzdur ki, Tovuz idmançılarının şöhrətini bütün dünya duyub. Azərbaycan idmanının əfsanəsi, dünya şöhrətli idman ustası mərhum Süleyman Məmmədli də bu yurdun yetirməsidir. Tovuz idman mühiti daha neçə-neçə idmançını xalqımıza, dövlətimizə bəxş edib.
Azərbaycan Respublikası Elm və Təhsil Nazirliyi Tovuz rayonu Uşaq-Gənclər İdman Şahmat məktəbi rayonun idman mənzərəsinin formalaşmasında xüsusi rol oynayır, onlarla uşaq bu məktəbdə idmanın müxtəlif növləri ilə məşğul olur.
Tovuz taekvondo klubunun və şəhid Zaur Axundov adına Taekvondo klubunun baş məşqçisi, Tovuz rayonu Uşaq-Gənclər İdman Şahmat məktəbinin məşqçi müəllimi Ümid Axundov “Bakı-Xəbər”ə açıqlamasında bildirdi ki, Tovuzda idmanın inkişafı ilə bağlı çox işlər görülüb və rayonda idmanın müxtəlif növlərinə kütləvi axın mövcuddur. Ümid Axundovun sözlərinə görə, dövlətin həyata keçirdiyi uğurlu idman siyasəti nəticəsində ölkəmizdə idmana kütləvi maraq yaranıb: “Azərbaycanın digər rayonlarında olduğu kimi, Tovuzda da uşaq idmanı inkişaf edir. İdman sahəsinə maraq böyükdür. Bizim rayonda demək olar ki, əksər idman növləri var, işləyirik, fəaliyyət göstəririk. Yarışlara gedirik, uşaqlarımızın uğurları çoxdur. Uşaqların idmana marağı çox böyükdür. İdmana meyl göstərən hər uşaq öz idman növünü seçir və məşğul olur. Mən taekvondo məşqçisiyəm. İki klubumuz var, həm Tovuz Taekvondo klubunun, həm də şəhid Zaur Axundov adına taekvondo klubunun baş məşqçisiyəm, eyni zamanda da Azərbaycan Respublikası Elm və Təhsil Nazirliyi Tovuz rayonu Uşaq-Gənclər İdman Şahmat məktəbində (UGISM) məşqçi-müəllim işləyirəm. Hər iki klubumuz fəaliyyət göstərir, ikisinin də çox böyük nəticələri var. Rayonun idman mühiti çox gözəldir. Bizim rayonda idman sahəsinin inkişafı və uşaqların kütləvi olaraq idmana cəlb edilməsi sahəsində Tovuz rayonu Uşaq-Gənclər İdman Şahmat məktəbinin rolu çox böyükdür. UGISM-in direktoru Əmirzadə Məleykə Əli qızı uşaqların idmana cəlb edilməsi sahəsində çox gözəl işləyir. Məleykə xanım rəhbərlik etdiyi məktəbdə idmanın hər bir növünə xüsusi diqqət ayırır. Burada şahmat, futbol, boks, güləş, həndbol, voleybol və başqa idman növlərinə diqqət yüksəkdir” - deyə Ü.Axundov qeyd etdi.
Heç şübhəsiz, Bakıda və regionlarda Gənclər və İdman Nazirliyi ilə paralel olaraq Elm və Təhsil Nazirliyinin də uşaq idman məktəbləri var. İdman təkcə bədənin deyil, eyni zamanda ruhun və mənəviyyatın tərbiyəsidir. İnanırıq ki, bu sahə daha da inkişaf edəcək və uşaq idmanına diqqət, qayğı daha da genişlənəcək.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
