Çox təəssüflər olsun ki, uzun illərdir bəzi mətbuat orqanları, xüsusən də televiziyalar şou-biznesçilərin, toy müğənnilərinin həyatında baş verən qalmaqalları günün əsas mövzusuna çevirirlər. Sanki bu ölkədə müğənninin problemindən başqa problem yoxdur, elə TV-lər, radiolar, sosial media bunlara işləməlidir.
Son həftələr əməkdar artist Cavanşir Məmmədovun ailə məsələsini gündəmdən düşməyə qoymurlar. Ölkənin bu qədər problemi, dərdi - səri olduğu halda Cavanşir Məmmədovla kürəkənin mübahisəsi, onların ailə söhbətləri bir aydan çoxdur ki, Azərbaycanın efir məkanını tutub. Bu media qurumları nə fikirləşirlər, niyə bu məsələni gündəmə çevirirlər? C.Məmmədovun ailə söhbətlərini media gundəminə çevirən media subyektləri, media orqanları nə fikirləşirlər?
“Hansısa media belə bir qeyri-ciddi məsələ ilə uzun-uzadı məşğul olursa, həmin medianın özü qeyri-ciddi duruma düşür”
Media eksperti Azər Həsrət “Bakı-Xəbər”ə şərhində bildirdi ki, ümumiyyətlə medianın daha ciddi, daha vacib məsələlərə diqqət ayırması önəmlidir, gərəklidir. “Əlbəttə ki, hansısa məşhurun həyatı, onların ailələrində baş verən hadisələr - bunlar da maraqlı ola bilər. Bu və digər mənada ictimai əhəmiyyət kəsb etdiyi təqdirdə müzakirəyə çıxarılması mümkündür. Amma indi kimsə öz ailəsində digər bir ailə üzvü ilə münaqişə vəziyyətindədirsə, bunun cəmiyyətə bir isti-soyuğu yoxdursa, təbiidir ki, media orqanları, jurnalistlər işlərini-güclərini atıb bu məsələ ilə məşğul olmamalıdırlar. Bu dedi-qodu, qeybət kateqoriyasına aid məsələdir, media da dedi-qodu, qeybətlə məşğul olmamalıdır. Əlbəttə ki, cəmiyyətin daha ciddi məsələləri var, o məsələlər ətrafında fokuslanmaq lazımdır. Bu baxımdan düşünürəm ki, adını çəkdiyiniz şəxsin ailə içi məsələləri ilə bu qədər uzun müddət məşğul olmaq normal bir yanaşma deyil. Açığını deyim ki, heç mənim bundan xəbərim də yoxdur. Siz sual verdiniz xəbərim oldu. Xəbərim olsaydı belə, bunu müzakirə edəcək deyiləm. Kiminsə ailəsinin içində kiminləsə problemi varsa, o adam çox məşhur biridirsə bunun bizə isti-soyuğu yoxdur. Bu şəxsi və ailəiçi məsələdir və ailəiçi məsələlərə də jurnalistika, media bu qədər diqqət ayırmamalıdır”.
A.Həsrətin sözlərinə görə, amma ailə içi məsələ ictimai vəziyyətə təsir etmiş olardısa bu başqa məsələ, adı çəkilən şəxsin ailəsinin daxində baş verənlərin bizim cəmiyyətə bu və ya digər şəkildə hansısa təsirindən necə danışa bilərik?
A.Həsrət “hansısa media belə bir qeyri-ciddi məsələ ilə uzun-uzadı məşğul olursa, həmin medianın özü qeyri-ciddi duruma düşür. Ona görə də tövsiyə edərdim ki, həmkarlarımız bu kimi məsələlərdə diqqətli olsunlar. Dedi-qodu, qeybət, bulaqüstü söhbətlər medianın mövzusu olmamalıdır. Kimsə onu medianın mövzusuna çevirirsə artıq jurnalistika ilə deyil, bazar qeybətləri ilə məşğuldur, öz jurnalist səviyyəsini aşağı endirir və əlbəttə ki, bu aşağı enmə ümumilikdə cəmiyyətin də bu və digər mənada dəyərlərinin aşağı enməsinə səbəb olur”-deyə bildirdi.
Aytəkin KƏRİMLİ
