Azərbaycanda arıçılığın inkişafı üçün əlverişli imkanlar var. Ölkəmizin gözəl iqlim şəraiti, zəngin bitki aləmi arıçılığın genişləndirilməsinə böyük təbii imkanlar yaradır. Arıçılığın inkişafı üçün yaradılan şərait nəticəsində Azərbaycan balı dünyanın əksər ölkəsində tanınır. Məlumdur ki, Azərbaycanın bir sıra bal sortları var.
Məlumat üçün qeyd edək ki, "Azərbaycan Respublikasında arıçılığın inkişafının stimullaşdırılması haqqında" Azərbaycan Prezidentinin 2018-ci il 5 mart tarixli sərəncamına əsasən arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə subsidiya müəyyən edilib. Bu da ölkədə arıçılığın inkişafına öz müsbət təsirini göstərməklə yanaşı, kənd yerlərində məşğulluğun təmin edilməsi və əhalinin gəlirlərinin artımı baxımından mühüm əhəmiyyət kəsb edir.
Qeyd etdiyimiz kimi, arıçılığın inkişafı istiqamətində görülən işlər istehsal olunan balın həcminə müsbət təsir edib. Belə ki, bu il həm Qarabağ zonasında, həm Aranda, həm də Quba-Qusar bölgəsində arıçılıqda məhsuldarlıq yaxşı olub. Ancaq məhsuldarlığın çox olması arıçılar üçün satışda müəyyən problemlər yarada bilər. Arıçılıqla məşğul oanlar bildirir ki, Azərbaycan balının çox cüzi hissəsi xaricə ixrac edilir. Məhsulun az hissəsinin ixrac olunması bu sahə ilə məşğul olanların narazılığına səbəb olur.
“Qiyməti yüksək olduğuna görə xarici alıcılar Azərbaycan balına o qədər də maraq göstərmir”
Peşəkar Arıçılar Birliyinin sədri Elxan Ələkbərov bildirdi ki, bunun səbəbi az bal istehsal etməyimiz deyil, ortada başqa amillər var: “İlk olaraq deyim ki, Azərbaycanda balın qiyməti dünya qiymətlərindən ən azı 3 dəfə yüksəkdir. Balın qiyməti yüksək olduğuna görə xarici alıcılar Azərbaycan balına o qədər də maraq göstərmir. Digər məsələ odur ki, sifarişçilər arıçılardan böyük miqdarda bal alarkən məhsulun hamısının eyni növə aid olmasını, yəni bütün balların eyni cür olmasını istəyirlər. Azərbaycanda böyük arıçılıq təsərrüfatlarının sayı çox az olduğundan arıçılar sifarişçilərə eyni cür bal verə bilmir. Müxtəlif balları birləşdirib eyni bal növündə salmaq üçün tələb olunan avadanlıqlar da yalnız bir necə arıçıda var. Balın çox az ixrac edilməsinin səbəblərindən biri də ixrac işinin təşkil edilməməsidir. Bu məsələ ilə bağlı araşdırma aparılmalıdır. Macarıstanın “Akasiya” balı premium formasında dünya bazarına çıxarılır. Dünyada akasiya balı çoxdur, amma biyan balı azdır. Biyan müalicəvi bitki olduğundan onun balı qiymətlidir. Biz də biyan balını Azərbaycan markası olaraq dünya bazarına çıxara bilərik”.
Günel CƏLİLOVA
