3 min nəfər həm tələbə adı aldı, həm də təhsildən imtina etdi - bu nə deməkdir?...
Azərbaycanın ali məktəblərinə qəbul olunmuş abituriyentlərin qeydiyyatı artıq başa çatıb. Tələbə adını qazanmalarına baxmayaraq, bəzi abituriyentlərin qəbul olunduqları ali məktəblərdə qeydiyyatdan keçmədiyi aşkar olunub.
Məlumat üçün bildirək ki, bu il ali məktəblərə təqribən 51 min, kolleclərə isə ümumilikdə 25 min plan yeri ayrıldı. Qəbul imtahanında cəmi 47 min abituriyent müsbət nəticə əldə edib. Ali məktəbələrə qəbul planında 4 min tələbə yeri boş qalmaqla yanaşı, qeydiyyat prosesındən sonra daha 3 min yerin boş qaldığı məlum olub. Bu 3 min nəfər ali məktəbə daxil olduğu halda tələbə adından imtina edənlərdir.
Onu da qeyd edək ki, universitetə daxil olduğu halda sonradan tədris almaq fikrindən daşınmalar ali məktəbə qəbul ola bilməyənlərin haqlı narazılığına səbəb olub. Onlar bildirir ki, universitetdə oxumayacaqdılarsa niyə qəbul imtihanında iştirak edib plan yerini tuturdular?
Maraqlıdır, 3 min tələbə niyə tələbə olmaqdan, ali təhsil almaqdan imtina edib?
- “Qəbul olduğu universitetdən imtina halları daha çox özəl və rayonlarda fəaliyyət göstərən universitetlərə qəbul olan tələbələr arasında yaşanır”
Məsələ ilə bağlı fikir bildirən təhsil eksperti Kamran Əsədov qeyd etdi ki, plan yerləri ayrılarkən tələbələr üçün ayrılan xərclər də nəzərə alınır: “Bir təhsil müəssisəsi hansısa bir ixtisas üçün 100 plan yeri müəyyənləşdirirsə, xərcləri də həmin plan yerinə əsasən hesablayır. Tələbələrin sayı azalanda həmin ali təhsil ocağının xərclərində balans pozulur. Adətən belə hallar abituriyentin “filankəs universitetə daxil ola bilmədi” kimi ictimai qınaqlardan çəkinərək bəyənmədiyi aşağı ballı ixtisasları da seçim siyahısına daxil etməsindən, amma sonradan bu ixtisas üzrə təhsil almaqdan imtina etməsindən qaynaqlanır. Bəziləri isə şəxsi ambisiyalarından çıxış edərək, sırf sosial şəbəkələrdə tələbə adını qazandığını qeyd etmək üçün bu ixtisasları da yazır”.
Təhsil ekspertinin sözlərinə görə, bu cür mənfi tendensiyanın qarşısının alınması üçün bir çox xarici ölkələrdə cəza mexanizmləri də tətbiq edilir: “Qəbul olduğu universitetdən imtina halları daha çox özəl və rayonlarda fəaliyyət göstərən universitetlərə qəbul olan tələbələr arasında yaşanır”.
Günel CƏLİLOVA
