Paytaxtın yeni binalarında istilik sistemi olsa da, köhnə tikilən binalar haqda bunu demək çətindir. Adətən hər il noyabrın 15-i Bakıda istilik mövsümünün başlanğıc günü kimi qəbul edilir.
Paytaxtda hələ də illərdir istilik üzünə həsrət qalmış yaşayış binaları var. O binaların sakinləri hər il payız gələndə yaşadıqları mənzillərə istiliyin veriləcəyini xəyal edə-edə qışı yaza dəyişirlər.
Soyuq qış fəslində çoxmərtəbəli binalarda yaşayanlar evlərini kombi və digər avadanlıqlarla isitmək məcburiyyətində qalır. Bu isə həmin sakinlər üçün əlavə xərc deməkdir. Danılmaz faktdır ki, qazanxanası olan binada yaşayanlar digər sakinlərlə müqayisədə təxminən 2 dəfə daha az pul ödəyirlər.
Onu da qeyd edək ki, bu il iyulun 1-dən yaşayış binalarının qazanxanaları üçün də təbii qazın tarifi 20 qəpikdən 13 qəpiyə endirilib.
Maraqlıdır, nə səbəbdən yeni binalar üçün qazanxana tikilmir?
Kamran Məmmədli: “Köhnə binaların istilik sistemlərinə çəkilən xərclər dövlət dəstəyi ilə həll olunur, yeni tikili binalarda isə bu tam fərqlidir”
Məsələ ilə bağlı fikir bildirən iqtisadçı ekspert Kamran Məmmədli dedi ki, paytaxtdakı yeni tikili çoxmənzilli binaların sayı, demək olar ki, köhnə tikili binaları üstələyib. Burada bir məqam da var: “Köhnə binaların istilik sistemlərinə çəkilən xərclər dövlət dəstəyi ilə həll olunur, yeni tikili binalarda isə bu tam fərqlidir. Müasir dövrümüzdə əksər insanlar qızdırıcı kimi kombi sisteminə üstünlük verir: “Təəssüflər olsun ki, digər istilik vasitələrindən daha az təhlükəsiz hesab olunan kombilər ekoloji baxımdan heç də təhlükəsiz sayılmır. Mərkəzi istilik sistemlərinin olmaması səbəbindən hər bir sakin öz evini isitmək və isti su ilə təmin etmək üçün kombi və qaz ilə işləyən istilik cihazlarından istifadə edir. Çoxmənzilli binalarda bəzən yüzlərlə mənzil olur. Hər bir mənzildə eyni anda kombi sistemi işə salındıqda isə ekologiyaya dəyən zərəri təsəvvür belə etmək çətindir. Eyvanlara qoyulan kombi aparatlarının borularından çıxan zəhərli qazlar hava yolu ilə digər qonşunun pəncərəsindən rahat bir şəkildə onun evinə dola bilir. Bu emal olunmuş zəhərli qazların nə qədər təhlükəli olmalı isə tam şəffaflığı ilə hər kəsə aydındı.
Dəm qazının insan orqanizminə təsiri məlumdur. Çox təəssüflər olsun ki, bu barədə hələ də heç bir ciddi addım atılmır”.
Ramin Qasımzadə: “ən kiçik qazanxananın tikintisi üçün azı milyon manat vəsait lazımdır, bu səbəbdən də MTK-lar…”
Əmlak məsələləri üzrə ekspert Ramin Qasımzadə bildirdi ki, ən kiçik qazanxananın tikintisi üçün azı milyon manat vəsait lazımdır: “Bu səbəbdən də MTK-lar qazanxana tikintisi üçün elə də həvəsli deyillər . Hesablamalara görə, yeni tikililərin təqribən 80 faizi qazanxana sistemindən istifadə etmir. Yeni çoxmərtəbəli binalar tikilərkən mərkəzi istilik üçün xüsusi borular qurulmalıdır. Həmin borular qurularsa təchizatın istilik xətti sisteminə həmin binalar da qoşular”.
Günel CƏLİLOVA
