Ermənilərdən azad edilmiş şəhər və kəndlərimiz "ağıllansa"...

Kamran Məmmədli: “Qarabağda “ağıllı şəhər”, “ağıllı kənd”in yaradılması həmin bölgənin...”

img

Elm, texnologiya inkişaf etdikcə, dünya daha çox dəyişikliklərə məruz qalır. "Ağıllı şəhər” (Smart City) layihəsi də bu dəyişikliyin əsas hissələrini özündə ehtiva edir. Dünyada "ağıllı şəhərlər” elm və texnologiyanın ən üst səviyyədə inkişaf etdiyi, cəmiyyətin, insanların həyat tərzinin fərqli yön aldığı şəhərlər sayılır.

"Ağıllı şəhər” fikri son illərdə texnoloji şirkətlər və şəhər planını hazırlayanlar arasında çox müzakirə edilən mövzudur. Hesab edilir ki, şəhərlərimizin daha ağıllı hala gəlməsi ilə gündəlik həyatımız daha da asanlaşa bilər.

Artıq işğaldan azad edilmiş ərazilərdə qurulacaq şəhərlər və kəndlər “ağıllı şəhər”, “ağıllı kənd” konsepsiyası əsasında qurulmalıdır. Bu barədə Prezident İlham Əliyev yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən çıxışı zamanı deyib.

Dövlət başçısı qeyd edib ki, azad edilmiş ərazilərdə qurulacaq şəhərlər və kəndlər “smart-city”, “smart-village”, - yəni, “ağıllı şəhər”, “ağıllı kənd” konsepsiyası əsasında qurulmalıdır. “Bu işləri indidən planlaşdırın ki, şəhərsalma aparılarkən, layihələr icra edilərkən mütləq dünyanın ən qabaqcıl texnologiyaları orada tətbiq olunsun. Ondan sonra və bəlkə də bununla paralel olaraq, bizim digər şəhər və kəndlərimizdə buna oxşar layihələri də icra etmək lazımdır. Çünki əgər biz bunu bu gün etməsək, sabah geri qalacağıq. Biz geri qala bilmərik. Bildiyiniz kimi, Davos Ümumdünya İqtisadi Forumunda iştirakım zamanı 10-larla şirkətlə görüşlərim olur, onların böyük əksəriyyəti texnoloji şirkətlərdir. Bu görüşlər əsnasında görürəm ki, dünyada hansı yeniliklər var, hansı müsbət inkişaf var və çalışıram ki, o şirkətləri Azərbaycana cəlb edim. Ona görə “ağıllı şəhər”, “ağıllı kənd” konsepsiyası işlənməlidir və tətbiq edilməlidir".

  • “Müasir texnologiyadan istifadə etməklə Qarabağda bəzi şəhər və kəndlərin infrastrukturunu inkişaf etdirmək mümkün olacaq”

“Ağıllı şəhər” və “ağıllı kənd” layihəsinin əhəmiyyət haqqında danışan iqtisadçı-ekspert Kamran Məmmədli qeyd etdi ki, Qarabağda “ağıllı şəhər”, “ağıllı kənd”in yaradılması həmin bölgənin inkişaf etməsinə səbəb olacaq: “Ağıllı şəhər” layihəsinin istiqamətləri çoxdur. Məlumat üçün bildirim ki, layihə vətəndaş və hökumət arasında daha sıx əməkdaşlığın formalaşmasına kömək edəcək. Belə ki, həmin şəhərdə yaşayan sakinlər də fərqli alətlərdən, internet üzərindən və mobil tətbiqlərdən, portallardan, onlayn platformalardan istifadə etməklə, şəhər idarəetməsi ilə birbaşa əlaqə qururlar. "Ağıllı şəhər”in daha bir üstünlüyü təhlükəsiz icmaların yaradılmasıdır. Ümumiyyətlə, dünya praktikasında daha təhlükəsiz icmalar yaradılır. "Ağıllı şəhər” təhlükəsiz şəhərdir. Bu, birbaşa onunla bağlıdır ki, burada texnologiyalardan ciddi şəkildə istifadə olunur. Bu, texnoloji olaraq cinayətlərin üstünün daha tez və qısa zamanda açılmasına imkan yaradır və şəhəri təhlükəsiz şəhərə çevirir. Ətraf mühitin qorunması baxımından, alternativ enerji mənbələrinin imkanlarından "ağıllı şəhər”lərdə istifadə olunur. Həmçinin, "ağıllı şəhər” nəqliyyatın inkişaf etməsinə imkan verir”.

Həmsöhbətimiz hesab edir ki, müasir texnologiyadan istifadə etməklə Qarabağda bəzi şəhər və kəndlərin infrastrukturunu inkişaf etdirmək mümkün olacaq.

Günel CƏLİLOVA

Son xəbərlər