15/08/2020 20:19
728 x 90

Koronavirusluların ev müalicəsində böyük problem – sistemi 30, 40, hətta 100 manata qoşurlar...

Rasif Bağırov: “Sahə həkimlərinin koronavirus haqda təsəvvürləri yox səviyyəsindədir”

img

Azərbaycanda koronavirus xəstələrinin evdə müalicə olunması müşkülə çevrilib. Xəstəxanaların yalnız ağır vəziyyətdə olan xəstələri qəbul etməsi, yüngül və orta halda olan COVID-19 xəstələrinin isə sahə həkimləri tərəfindən evlərdə müalicə olunmasına başlanması çətinlik yaradıb.

Doğrudur, son günlərdə epidemiya sönməyə doğru yön alıb, sağalanlar yoluxanları aşkar fərqlə üstələməkdədir. Amma yüngül və orta ağır xəstələrin üzünə xəstəxanalar bağlanıb. Ölkədə fəaliyyət göstərən 30-dan çox tibb müəssisəsi sırf koronaviruslu xəstələrin müalicəsi üçün ayrılıb. Özəl tibb müəssisələrindən isə bəziləri bu xidmət üçün tam hazır vəziyyətə gətirilərək xəstələrin istifadəsinə verilib.

Qeyd etdiyimiz kimi, koronavirusun yüngül formasına yoluxanlar evdə müalicə almaqda çətinlik çəkirlər. Virus daşıyıcılarının müalicə alması üçün onlara sistem və digər preparatlar vaxtlı-vaxtında vurulmalıdır. Ancaq tibb bacıları vəziyyətdən istifadə edib bunu 30, 40, bəzən isə 100 manata edirlər.

  • “Tibb bacıları isə evlərə getmək istəmirlər, yoluxmaqdan qorxurlar, bu səbəbdən...

Məsələ ilə bağlı fikir bildirən həkim-ekspert Rasif Bağırov qeyd etdi ki, sahə həkimlərinin koronavirus haqda təsəvvürləri yox səviyyəsindədir, onlara təlimlər keçirilməyib, dərman təchizatı yoxdur. Ona görə xəstələr də məcbur qalırlar ki, qohum-qonşudan tibb bacıları tapsınlar. Tibb bacıları isə evlərə getmək istəmirlər, yoluxmaqdan qorxurlar: “Bu səbəbdən evlərdə xəstə müalicəsinə getməyə razı olan tibb bacıları yüksək qiymət tələb edirlər. Məsələn, bir sistemi qoşmaq üçün 30-40, hətta eşitdiyimə görə bəzi hallarda 100 manat istəyirlər".

Həmsöhbətimizin sözlərinə görə, tibb bacılarının tələbini anlayışla qarşılamaq lazımdır: “Bu da təbiidir, özləri risq altındadırlar, xüsusi geyimləri yoxdur, maska ilə COVID-19 xəstəsi ilə təmasda olanda yoluxa bilir, nəticədə baha qiymətə evlərə getməyə razılaşırlar. Digər tərəfdən isə evdə müalicə olunan xəstələr həddindən artıq çoxdur. Stasionar qəbul olunan xəstə sayı gündəlik 400 civarındadır. Rəsmi göstəricidə 400 nəfər ətrafında olan rəqəmlər bütün xəstələrin 20 faizini təşkil edir. Qalan 80 faizi gündəlik 3200-3500 xəstə deməkdir. Onlar yüngül və orta ağır xəstələrdir”.

Son olaraq bildirək ki, koronavirusdan əziyyət çəkən şəxsin sağalması üçün ona vurulacaq sistem və digər preparatlar üçün artıq pul tələb etmək düzgün deyil. Nəzərə almaq lazımdır ki, həmin şəxs virus daşıyıcısı olduğu üçün işləmir və onlara həm maddi, həm də mənəvi dəstək olmaq lazımdır.

Günel CƏLİLOVA

Son xəbərlər