Məhəmməd Əsədullazadə: “Erməni mafiya rəhbərləri bu dövlətin diplomatik pasportlarından və avtomobil nömrələrindən istifadə edərək...”
Məlum olduğu kimi, Almaniyanın ARD ictimai televiziyasında 19 dekabr tarixində efirə getmiş "Mərc mafiyası: Almaniya və mütəşəkkil futbol cinayətkarlığı” sənədli filmi və həmin televiziyanın sportschau.de idman xəbərləri saytında dərc olunmuş "Erməni mərc mafiyası Almaniyada da fəaliyyətdədir” başlıqlı məqalədə Almaniyadakı erməni mafiya şəbəkəsinin idman mərclərinin manipulyasiyası yolu ilə gəlir əldə etməsi barədə xəbər verilir.
Məlumatlarda qeyd edilir ki, erməni mafiyası mütəşəkkil cinayətkarlığın ən qorxunc və ən təhlükəli qruplaşmalarından hesab olunur və bu şəbəkə bütün Avropada, o cümlədən Almaniyada fəaliyyət göstərir. Vurğulanır ki, bu cinayətkar şəbəkə o cümlədən futbol, həndbol, basketbol, voleybol, tennis və digər idman oyunları üçün keçirilən mərclərdə qanunsuz manipulyasiyalar etməklə gəlir əldə edir.
ARD televiziyasının erməni mafiyası daxilində anonimliyi qorunan mənbəyə istinadən təqdim etdiyi məlumata əsasən, erməni mafiyası müxtəlif idman növlərində yaxşı transmilli əlaqələrə malikdir və xüsusilə keçmiş Şərq blokuna daxil olan ölkələrdən olan idmançılarla əlaqələr hesabına idman oyunlarının mərcində manipulyasiyalar edilir. Onu da qeyd edək ki, sözügedən məlumatlar 02.11.2018 tarixində “Spiegel online” xəbər saytında dərc edilmiş “Erməni mafiyası Almaniyada necə fəaliyyət göstərir” başlıqlı məqalə və 07.11.2018-ci tarixində MDR televiziyasında efirə verilməli olan, amma həmin gün Berlin məhkəməsinin qərarı ilə müvəqqəti olaraq nümayişi dayandırılmış “Almaniyada xaç ataları: Erməni mafiyası və qanuni oğrular” başlıqlı sənədli filmin ardınca alman mətbuatının erməni mafiyası mövzusunda apardığı araşdırmanın yeni nəticələridir.
Onu da qeyd edək ki, sözügedən araşdırmada həm də Ermənistan dövlət rəsmilərinin mafiya ilə əlaqələri öz əksini tapmışdı. Son araşdırma bir daha ermənilərin bu kimi qaranlıq və çirkin işlərlə məşğul olduğunu bir daha ortaya qoydu.
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Ermənistan daim xaricdə diasporun yaratdığı mafiyanın çirkli pulları ilə təmin olunub: “Bu onu göstərir ki, rəsmi İrəvan mafiya ilə ciddi əlaqələrə malikdir. Kriminal yollarla qazanılan vəsait ölkənin gəlirlərinə daxildir. Burada Ermənistanın dövlət rəsmiləri, xüsusilə Xarici İşlər Nazirliyi, bu ölkənin səfirlikləri mafiya və quldur banda dəstələrini himayə edirlər. Sirr deyil ki, erməni mafiya rəhbərləri bu dövlətin diplomatik pasportlarından və avtomobil nömrələrindən istifadə edərək, sərbəst şəkildə öz qanunsuz əməllərini icra edirlər. Avropanın bir neçə ölkəsində ermənilərin bu kriminal fəaliyyəti ifşa olunsa da, göründüyü kimi, bu onun sonunu gətirmir. Çünki bu, Ermənistan dövləti tərəfindən idarə olunur. Almaniyada mərc oyunlarında erməni rəsmilərinin əməllərinin ifşa olunması bu kriminal siyasətin tərkib hissəsidir. Hesab edirəm ki, erməni dövlət işçiləri məhz mafiyanın üzvləridir və bu kimi qanunsuz əməllərdə iştirak edirlər. Təbii ki, Qərbin mütərəqqi dövlətləri erməni dövlətinin mafiya siyasətini ifşa etməli, bu kimi kriminal siyasətinə son verməlidirlər. Belə hallar Qərbin hüquq sisteminin zədələnməsinə gətirir. Avropada Ermənistanın səfirlikləri mafiyaların qərargahı kimi fəaliyyət göstərirlər. Bu gün Ermənistanda formalaşan iqtidar da Avropadakı erməni mafiyasına dəstək verəcək. Çünki bununla maliyyə qaynaqları əldə edirlər”.
Vidadi ORDAHALLI
