“Onların məqsədi ancaq ondan ibarətdir ki, bu minvalla separatçı qurumu təbliğ etsinlər”
Məlum olduğu kimi, "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin sədri Tural Gəncəliyev Müstəqil Futbol Assosiasiyaları Konfederasiyasına (ConIFA) etiraz məktubu göndərib.
Buna səbəb FIFA və qitə futbol qurumları tərəfindən tanınmayan qondarma respublikaların etnik yığmalarını özündə birləşdirən "ConIFA"nın Ermənistan Silahlı Qüvvələrinin işğal etdiyi Azərbaycanın Dağlıq Qarabağ ərazisində 2019-cu il Avropa Kuboku turniri keçirmək istəyidir. Qurumun prezidenti Per-Anders Blində ünvanlanan məktubda yarışın təşkili ilə əlaqədar "ConIFA"nın rəsmi saytında yerləşdirilən məlumatın dərin narahatlıq doğurduğu vurğulanıb. Eyni zamanda, Ermənistanın hərbi təcavüzü nəticəsində Azərbaycanın ərazisinin işğal olunduğu bildirilib. Həmçinin qeyd olunub ki, "ConIFA"nın bu təxribatçı aktı təkcə regionda sülh və sabitliyi təhlükə altına qoymur, həm də sülh prosesini və tərəflər arasında aparılan danışıqları pozur.
Məktubda işğal olunmuş ərazilərdən azərbaycanlıları təmsil edən "Qarabağ" futbol klubunun olduğu xatırladılıb: "Hazırda bu klub erməni qoşunları tərəfindən tamamilə məhv edilmiş və işğalı altında olan Ağdam şəhərindən uzaqda - Bakıda məskunlaşıb. Təmsil etdiyi şəhərdən kənarda oynamasına baxmayaraq, "Qarabağ" UEFA Çempionlar Liqasının qrup mərhələsində iştirak edərək dünya səviyyəsinə qalxıb. "ConIFA"nın bu seçiminin UEFA-nın qaydalarına tamamilə zidd, Avropa, eləcə də dünya idman ictimaiyyətinə hörmətsizlik olduğunu görürük".
Qeyd edək ki, "ConIFA" 12 komandanın iştirak edəcəyi turniri 2019-cu ilin iyununda Xankəndidə keçirməyi planlaşdırır. Ermənilər də bundan təbliğat vasitəsi kimi istifadə etmək istəyir. Bundan əvvəl də Ermənistan tanınmayan separatçı qurumu təbliğ etmək üçün buna bənzər cəhdlər edib. Yəni müxtəlif adlar altında işğal olunmuş ərazilərdə beynəlxalq səviyyəli tədbirlər keçirməyə, müxtəlif beynəlxalq tədbirlərdə separatçı qurumu təbliğ etməyə cəhd edib. Ancaq Azərbaycan buna imkan verməyib. Görünən odur ki, ermənilər yenidən bu cür təxribata hazırlaşır.
Sözügedən məsələni dəyərləndirən Vətəndaş və İnkişaf Partiyasının sədr müavini Ramil Hüseynovun sözlərinə görə, fudbol ermənilər üçün bəhanədir: “Onların məqsədi ancaq ondan ibarətdir ki, bu minvalla separatçı qurumu təbliğ etsinlər. Dəfələrlə müxtəlif beynəlxalq tədbirlərdə təxribatçı xarakterli addımlar atıblar. Görürsən ki, hansısa yarışmalarda nümayişkaranə şəkildə Ermənistan idmançıları separatçı qurumun əski parçasını qaldırıblar. Mahnı yarışmalarında da analoji hallar yaşanıb. Ona görə də "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin məlum etiraz məktubu tamamilə adekvat addımdır. O mənada ki, bunun qarşısını almaq üçün hərəkətə keçib. Hesab edirəm ki, biz digər müstəvilərdə də buna öz etirazımızı bildirməliyik. Ən başlıcası isə, belə xoşagəlməz halların qarşısını almaq üçün bütün siyasi və diplomatik vasitələr işə salınmalıdır. İstənilən halda, bu kimi təxribatlara yol vermək olmaz. Ona görə ki, bu bütün mənalarda Azərbaycanın dövlət maraqlarına ziddir. ConIFA özünü müstəqil fudbol qurumu kimi təqdim etsə də, bu o demək deyil ki, məlum niyyətə etiraz etmək olmaz. Lazım gələrsə və zərurət yaranarsa, partiyalar, QHT-lər quruma öz etirazlarını bildirə bilər. Deməyim odur ki, biz bütün mümkün vasitələrdən istifadə edib bu təxribatın qarşısını almalıyıq. Separatçı qurumun təbliğinə yönəlik istənilən bu kimi cəhd yolverilməzdir və buna yol vermək olmaz”.
Vidadi ORDAHALLI
