Putin ölkədə etnik-dini kimlik məsələsinə çox qızğın yanaşdı...
Abutalıb Səmədov: "Ona görə də Rusiya bu gün parçalanmaq təhlükəsi ilə üz-üzədir"
"Vahid Rusiya" partiyasının 22-ci qurultayında Rusiya prezidenti Vladimir Putin ölkənin birliyini pozmaq cəhdlərini sərt şəkildə yatıracağını və "bütün cəbhələrdə" cavab verməyə hazır olduğunu bildirib:
"Bütün tarixi dövrlərdə rəqiblərimiz bu birliyi pozmağa çalışıblar və indi yenə də başqalarının işləyib hazırladığı ssenariyə uyğun olaraq insanları parçalamağa, milli və ya dini kartla oynamağa çalışırlar, bütün çağırışlara və bütün cəbhə boyu döyüşməyə hazırıq".
Onun sözlərinə görə, Rusiya ötən illər ərzində keyfiyyətcə dəyişib, ölkənin inkişaf gündəliyi strateji xarakter alıb və gələcəyə yönəlib. Rusiya gecikmədən yeni genişmiqyaslı məqsədlər və istiqamətlər müəyyən etməlidir.
Putin ölkədə dini və etnik parçalanma cəhdlərinə niyə belə, sanki konkret informasiyası varmış kimi həssas yanasır?
Baki-xeber.com saytının suallarını cavablandıran politoloq Abutalıb Səmədov bildirdi ki, 2022-ci ilin fevralında Ukrayna ərazisinə daxil olmaqla Rusiya prezidenti çox böyük avantüraya girişdi: "Doğrudur, onun müraciətlərinə Qərbin etinasız yanaşması, xəbərdarlıqlarına əhəmiyyət verməməsi Putini bu addımı atmağa müəyyən qədər məcbur etdi. Çünki artıq qoşunlar sərhəddə yerləşdirilmişdi və hamı Rusiyanın Ukraynaya hücumunu gözləyirdi. Fevral ayında Makronun əvvəl Moskvaya, sonra isə Kiyevə sülh missiyali səfəri də uğursuzluqla nəticələndi. Rusiya iki şərt qarşılığında müharibə etməmək öhdəliyini götürdu. Bu şərtlər də Minsk-2 razılaşmasının icrasına başlamaq və Ukraynanın neytrallığı şərtləri idi. Zelenski Makronla görüşdən sonra keçirilən mətbuat konfransında susdu, Fransa prezidenti onun adından dedi ki, o, təklifi qəbul edib. Ancaq sonra Almaniyada keçirilən görüşdə Ukrayna bu şərtləri qəbul etmədiyini açıqladı. Bundan sonra isə hər iki tərəfə böyük fəlakətlər gətirən müharibə başlandı. Bu gün Rusiya Ukraynanın 123-124 min kvadratkilometr ərazisini işğal edib və əməliyyatlar Rusiyanın üstünlüyü ilə davam edir. Bu günlərdə Ukrayna üçün böyük əhəmiyyətə malik olan Pokrovsk şəhərinin işğal edilməsi gözlənilir və bu, Ukraynanın durumunu bir qədər də ağırlaşdıra bilər.
Eyni zamanda, bu ilin avqust ayında Ukrayna gözlənilmədən Kurska hücum etdi və 1300 kvadratkilometr Rusiya ərazisini ələ keçirdi. İndi həmin ərazinin yarıdan bir qədər artıq hissəsi Ukraynanın nəzarətindədir. Hadisələr göstərir ki, burada Trampın andiçməsinə qədər Ukraynanın müqavimət göstərməsi çox çətin olacaq.
Hərbi əməliyyatlar zamanı Rusiyanın canlı itkiləri 600-700 min nəfər hesab edilir. Söhbət həm ölənlərdən, həm də yaralanaraq sıradan çıxanlardan gedir. Rusiyanin bu müharibəyə gündəlik xərcləri 200-300 milyon dollar təşkil edir. Rusiya 10 mindən artıq sanksiya ilə üzləşib, beynəlxalq miqyasda ciddi zərbələr alıb. Ən son zərbəni Moskva Suriyada aldı və buradan çəkilmək zorunda qaldı.
Eyni zamanda, Ermənistanla da problemlər ortadadır, MDB və KTMT-nin birliyi əvvəlki səviyyədə deyil. Təbiidir ki, Rusiya bu müharibədən zəifləyib çıxacaq. Burada ən böyük təhlükə müxtəlif millətlərin təşkil etdiyi vilayətlərin və respublikaların Rusiyanın tərkibindən çıxması təhlükəsidir. Rusiyanın əleyhinə olan qüvvələr daima bu istiqamətdə iş aparıblar, indi isə daha da fəallaşıblar. Çünki Rusiya-Ukrayna müharibəsində ölənlər təkcə ruslar deyil, bəlkə də daha çox qeyri-rus millətlərdir. Bu da həmin xalqların kəskin narazılığına səbəb olur. Rusiyanın zəifləməsini istəyənlər ölkə ərazisində müxtəlif dinə və irqə mənsub olan əhali arasında iş aparırlar. Ona görə də Rusiya bu gün parçalanmaq təhlükəsi ilə üz-üzədir. Lakin Qərb bu hadisələrin bu gün və surətlə baş verməsini istəmir. Qərbin istəyi Rusiyanın zəifləməsidir, ancaq o bu prosesin tədricən, yavaş-yavaş, ciddi problemlər yaratmadan baş verməsini arzulayır.
Putinin hazırki bəyanatı da bugünə yox, gələcəyə hesablanmış çağırışdır. O bildirir ki, onlara qarşı iş aparılır, Rusiyanı parçalamaq cəhdləri var və deyir ki, biz bu cəhdlərin qarşısını vaxtında almalıyıq. Putin də yaxşı başa düşür ki, dünyanın ən çox nüvə başlıqlarına malik dövlətin parçalanmasını böyük dövlətlərin heç biri istəmir. Çünki nüvə silahı nəzarətdən çıxa və dünyanın ciddi probleminə çevrilə bilər. Lakin həm Putin, həm də digər komanda üzvləri yaxşı başa düşür ki, Qərb dairələri tədricən bu prosesin aparılmasında maraqlıdır. Onların sülh cəhdlərinin qarşısının alınmasının kökündə də məhz bu dayanır. ABŞ, Qərb və Böyük Britaniya müharibənin baş verməməsı üçün müəyyən addımlar ata bilərdilər, amma atmadılar. Sonradan İstanbulda müəyyən razılaşmalar oldu, lakin ABŞ və Böyük Britaniya bunun da qarşısını aldı. Məqsəd Ukraynanı qurban verməklə Rusiyanı zəiflətmək idi və müəyyən mənada buna nail olundu. Ancaq gözləntilər tam özünü doğrultmadı, sanksiyalar arzulanan nəticələri vermədi. İqtisadi baxımdan Rusiya ötən il Avropa dövlətlərindən daha yüksək sürətlə inkişaf etdi.
Ancaq Rusiyanın parçalanmaq təhlükəsi qalır, bu gün əgər Putin güc, zorakılıq hesabına bu proseslərin qarşısını almağa nail olubsa, gələcək 10 il ərzində bunu etmək daha cətin və problemli olacaq. Putinin bu çuxışı da onunla bağlı xəbərdarlıq xarakteri daşıyır".
Dəniz NƏSİRLİ
