Prezident İlham Əliyev “Euronews” televiziyasına müsahibəsində Avropanın Qarabağda erməni separatizminə münasibətdə ikili standartlardan çıxış etməsini tutarlı arqumentlərlə ifşa etdi:
“İndi biz separatizmə qarşı mübarizə aparmaqda Ukraynaya kömək etmək üçün Avropa və Qərbin necə birləşdiyini görürük. Bəs bizə gəldikdə nəyə görə bizim separatizmə qarşı mübarizəmizə fərqli yanaşma sərgilənir? Nəyə görə Gürcüstanın separatçı regionları ilə bağlı yanaşması Qərb cəmiyyəti və siyasətçiləri tərəfindən tamamilə anlaşılır, lakin bizim eyni mənşədən olan separatizmə son qoymaq üçün legitim istəyimiz sual altına alınır? Nə üçün İspaniya Kataloniyaya referendum keçirməyə icazə vermir, baxmayaraq ki, onların sayı 5, yaxud 6 milyon nəfərdir və yaxınlıqda öz dövləti olan ermənilərdən fərqli olaraq, onların öz dövləti yoxdur. Nə üçün biz separatizmə dözməliyik? Biz bunu etməyəcəyik”.
“Əli qana batan separatçılar ya həbs ediləcək, ya da ölkədən qaçıb gedəcəklər”
Məsələ ilə bağlı fikirlərini “Bakı-Xəbər”lə bölüşən Böyük Azərbaycan Partiyasının sədri Elşad Musayev hesab edir ki, bununla bağlı Prezidentin tənqidləri əsaslıdır: “Məlum olduğu kimi, Azərbaycan və Ermənistan dövlət başçıları “Euronews” televiziyasına müsahibələr verib. Prezident İlham Əliyevin verdiyi müsahibə daha çox pozitiv notlara köklənmişdi, beynəlxalq hüquqa əsaslanırdı. Prezident həm Avropa təsisatlarına haqlı suallar ünvanlayırdı, həm də beynəlxalq hüquqa uyğun Azərbaycanın mövqeyini ortaya qoyurdu. Ermənistanın baş naziri isə verdiyi müsahibədə cığal mövqedən çıxış edirdi və bu, açıq-aydın hiss olunurdu. Azərbaycan Prezidenti ikili standartlardan tutmuş bir sıra məsələlərə toxundu. Qərbin bəzi məsələlərə riyakarcasına yanaşmasını faktlarla ortaya qoydu. Eyni zamanda, beynəlxalq hüququ saymayaraq Qərbin müəyyən dairələrinin ortaya ermənipərəst mövqe qoyması ilə bağlı bir sıra həqiqətləri açdı. Dövlət başçısı haqlı olaraq soruşdu ki, nəyə görə separatizmlə bağlı Qərb Ukraynaya, Gürcüstana dəstək verir, Azərbaycana gəldikdə isə bu baş vermədi. Uzun illər sözügedən məsələdə Azərbaycana dəstək verilmədi. Çox qəribədir ki, erməni separatçılarına dəstək verən ölkələrdən biri də İspaniyadır. O İspaniya ki, özü dövlət olaraq separatizmdən əziyyət çəkir. İspaniya erməni separatizmini dəstəkləyirsə, o zaman nəyə görə sayı 5-6 milyon nəfər olan Kataloniya əhalisinin adicə referendum keçirməsinə icazə vermir? Bundan başqa, Fransa Korsika adasını işğal edəndən sonra oradakı yerli əhalinin hüquqlarını pozur. Belə olan halda biz nəyə görə erməni separatizminə dözümlü yanaşmalıyıq? Bütün bunlar onu göstərir ki, nə qədər ikili standartlar olsa da Azərbaycan Qərbin təzyiqlərinə duruş gətirir. Hesab edirəm ki, bundan sonra da Azərbaycan heç bir kənar təzyiqlərə baxmadan separatizmin kökünü kəsəcək. Həmçinin əli qana batan separatçılar ya həbs ediləcək, ya da ölkədən qaçıb gedəcəklər. Sözügedən məsələdə kimsə bizim qarşımızı ala bilməz”.
Vidadi ORDAHALI
