Məlum olduğu kimi, bu günlərdə Meşəli soyqırımı qurbanları beynəlxalq ictimaiyyətə müraciət ünvanlayıb. Müraciətdə mühüm məqamlara toxunulur və bildirilir ki, 32 ildir Meşəlidə törədilmiş soyqırımı ilə heç bir beynəlxalq təşkilat maraqlanmayıb, heç bir insan hüquqları təşkilatı buna görə Ermənistana etiraz səsini ucaltmayıb, bizimlə sanki heç nə olmamış kimi davranıblar:
“Bu boyda faciəni görməyiblər, eşitməyiblər, biz yaxşı bilirik ki, məhz görmək istəməyiblər, eşitmək istəməyiblər. Amma müharibə cinayətkarı Vaqif Xaçaturyan ələ keçən kimi bu təşkilatlar peyda olub, bir-birinin ardınca onun azad edilməsinə çağırışlar edirlər. Biz – Meşəli sakinləri bundan böyük hiddət keçiririk, bunu özümüzə qarşı təhqir, həqarət kimi qəbul edirik”.
Müraciətdə ikili yanaşmaya son qoyulmasına çağırış edilir, tələb olunur ki, Vaqif Xaçaturyan və onun kimi digər müharibə cinayətkarları Azərbaycan məhkəmələrində cavab versin. Bundan başqa, beynəlxalq ictimaiyyətdən tələb edilir ki, Ermənistanı Azərbaycan xalqına qarşı insanlıq əleyhinə cinayətlər törətmiş şəxsləri cəzalandırmağa, onları təhvil verməyə məcbur etsin. Dilarə Əliyeva adına Azərbaycan Qadınlarının Hüquqlarını Müdafiə Cəmiyyətinin sədri Novella Cəfəroğlu bildirir ki, Meşəli sakinlərinin müraciəti beynəlxalq ictimaiyyətin erməni vandalizmi haqqında məlumatlandırılması baxımından çox önəmlidir. Onun sözlərinə görə, Qarabağ və ətraf rayonlarda ermənilər tərəfindən Azərbaycan xalqına qarşı törədilmiş cinayətlər barədə toplanmış bütün faktlar Beynəlxalq Cinayət Məhkəməsinə göndərilməlidir: "ABŞ prezidenti Cozef Bayden Ukrayna müharibəsi ilə bağlı danışarkən Rusiyanın törətdiyi bütün cinayətlərə görə Beynəlxalq Cinayət Məhkəməsi qarşısında cavab verməli olduğunu deyib. Azərbaycanın da belə bir hüququ var və bu hüququndan sonuna qədər istifadə etməlidir". Hüquq müdafiəçisi deyib ki, müharibədə hər iki tərəfdən insanlar ölür, lakin Azərbaycan xalqına qarşı törədilən vəhşilik, faşistlər kimi uşaq, qadın, yaşlı ayırd etmədən əliyalın əhaliyə edilən zülm, soyqırımı müharibə cinayətləri hesab olunur: "Həmin cinayətlərə görə də Ermənistan beynəlxalq məhkəmələr qarşısında cavab verməlidir. Burda söhbət sadəcə Vaqif Xaçaturyandan getmir. Həmin faciələrin törədilməsində Zori Balayan, Robert Koçaryan, Serj Sarqsyan kimi bir çox erməni cəlladının əli var və hər biri haqqında Beynəlxalq Cinayət Məhkəməsinə müraciətlər ünvanlanmalıdır. Məsələn, ermənilər bu gün də qondarma soyqırımı ilə bağlı dünyaya car çəkirlər". N.Cəfəroğlu Meşəli camaatının beynəlxalq ictimaiyyətə müraciətini son dərəcədə doğru hesab edir və düşünür ki, Xocalı, Başlıbel, Ağdaban kimi ermənilərin törətdikləri cinayətlərlə bağlı beynəlxalq ictimaiyyət daim məlumatlandırılmalıdır: "Eyni zamanda Azərbaycan xalqına qarşı ermənilər tərəfindən törədilmiş soyqırımı aktlarına görə beynəlxalq məhkəmələrdə Ermənistanın cəzalandırılması tələb edilməlidir".
Xocalı Rayon İcra Hakimiyyəti başçısının müavini Lamiyə Qarayeva məsələ ilə bağlı bildirib: "Bütün Xocalı sakinləri istəyir ki, Meşəlidə cinayət törədən şəxslər cəzalandırılsın". Onun sözlərinə görə, Vaqif Xaçaturyanın saxlanılması onu göstərir ki, Qarabağda törədilən qətliamların günahkarları gec-tez cəzalarını alacaqlar: "Dövlət başçısının siyasəti nəticəsində şəhidlərimizin qisası alınır. Belə ki, Meşəli kəndində, daha sonra Xocalı rayonunda əli günahsız insanların qanına batmış Vaqif Xaçaturyanın Laçında saxlanılması xəbəri sevindiricidir. Beynəlxalq təşkilatların illərdir yerinə yetirmədiyi məsələlər dövlət başçısının iradəsi sayəsində həll olunur". "Ortaq Dəyərlər" İctimai Birliyinin sədri Aqil Camal bildirib ki, Meşəli sakinlərinin beynəlxalq ictimaiyyətə müraciəti təkcə bir kəndin deyil, bütövlükdə 90-cı illərdə Azərbaycan xalqının həmin bölgədə yaşayan əhalisinin qarşılaşdığı soyqırımı ilə bağlı bir çağırışdır. Onun sözlərinə görə, bu çağırış özündə yalnız emosiyaları deyil, real, çılpaq həqiqətləri əks etdirir: “İstər həmin faciə törədilən zaman, istərsə də onun üzərindən 30 ilə yaxın keçən müddətdə özlərini beynəlxalq ictimaiyyət, insan haqlarının müdafiəçiləri, “dünyanın demokratiya mərkəzi” hesab edən dövlətləri Azərbaycan xalqının, onun kəndlərinin, rayonlarının qarşılaşdığı məşəqqətləri, işğal aktını görməzdən gəliblər. Uzun illər həmsədrlik institutu adı altında prosesin uzadılmasına və qeyri-müəyyən bir məcrada davam etməsinə şərait yaradıblar. 44 günlük Vətən müharibəsindən sonra Azərbaycan öz torpaqlarını işğaldan azad etməklə yanaşı, eyni zamanda, 30 il əvvəl qarşılaşdığı hərbi cinayətin səbəbkarlarının, iştirakçılarının haqq məhkəməsinə çıxarılması üçün də indiyə qədər müəyyən işlər həyata keçirib. Bəlkə də bir zamanlar bu hadisələrlə əlaqədar cinayət işləri qaldırılanda insanlarımızda bir ümidsizlik olub ki, həmin cəlladları cinayət məsuliyyətinə cəlb etmək mümkün olmayacaq. Lakin bu gün ilahi ədalət öz sözünü deyir və heç kimin təsəvvür etmədiyi mənzərələrlə üz-üzə gəlmişik”. Heydər Əliyev adına Hərbi İnstitutun hərb tarixi müəllimi Vüqar Əliyev qeyd edir ki, Ermənistana gedərkən Laçın sərhəd-buraxılış məntəqəsində Azərbaycan Dövlət Sərhəd Xidməti tərəfindən həbs olunan Vaqif Xaçaturyan Meşəli qətliamında iştirak edib: “Ermənistan tərəfi işğal dövründə azərbaycanlılara qarşı insanlıq əleyhinə cinayətlər və kütləvi qırğınlar törədilməsinə görə məsuliyyət daşıyan şəxsləri müdafiə etmək yerinə, onların cinayət məsuliyyətinə cəlb edilməsi işinə dəstək verməlidir. Lakin hər zaman olduğu kimi, Ermənistan yenə də cinayətkarların əməllərini ört-basdır edir, Vaqif Xaçaturyanın Ermənistana xəstə adı ilə qaçma cəhdinin əsl səbəbini gizlədərək, onun həbs olunmasına siyasi don geyindirir, dünya mətbuatına, beynəlxalq ictimaiyyətə yalan məlumatlar ötürür. Azərbaycan tərəfi ölkəmizin ərazisində müharibə və hərbi cinayətlər törətmiş şəxslərə qarşı müvafiq cinayət işinin başladığını dəfələrlə açıq şəkildə bəyan edib, onlar barədə beynəlxalq axtarışlar elan edilib və istintaq tədbirləri çərçivəsində, ölkə qanunvericiliyinə və beynəlxalq təcrübəyə uyğun olaraq onların məsuliyyətə cəlb olunması istiqamətində tədbirləri davam etdirəcək”. Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bildirib ki, Meşəli soyqırımında iştirak etməkdə təqsirləndirilən Vaqif Xaçatryan erməni olduğuna görə deyil, cinayət törətdiyinə görə saxlanılıb. Polkovnik qeyd edib ki, Ermənistan, eləcə də onun havadarlarının Vaqif Xaçatryanın həbsi ilə bağlı ajiotaj yaratmaq cəhdi absurddur: “Vaqif Xaçatryan onlarla azərbaycanlının qətlə yetirilməsində, işgəncələrə məruz qalmasında iştirak edib, xalqımıza qarşı ağır cinayətlər törədib. Onun sərhədçilərimiz tərəfindən saxlanılması, müvafiq qaydada istintaqa cəlb edilməsi də məhz bununla bağlıdır. Yəni V.Xaçatryan konkret cinayət əməllərində təqsirli bilinir. Ancaq məlum olduğu kimi, Ermənistan, eləcə də Ermənistana havadarlıq edən xarici qüvvələr həmin cinayətkarın saxlanılmasına siyasi don geyindirməyə cəhd edir. Məqsəd Azərbaycanın beynəlxalq imicinə xələl gətirmək, ölkəmiz haqqında mənfi rəy formalaşdırmaqdır”.
Tahir TAĞIYEV
