“Müharibədə qalib gəlmək mənim həyatımın, siyasi həyatımın missiyası idi və o uğurla başa çatdı. Biz müharibədə qalib gəldik”. Bunu Prezident İlham Əliyev "Euronews" telekanalına müsahbəsində deyib.
"Biz ədaləti və ərazi bütövlüyümüzü bərpa etdik. Ermənistan sülh istəyərsə, biz ona nail olacağıq. Çünki bizim Ermənistana qarşı hər hansı bir ərazi iddialarımız yoxdur. Biz onların da Azərbaycana qarşı ərazi iddialarının olmamasını istəyirik. Qarabağda, hazırda müvəqqəti olaraq rusiyalı sülhməramlıların nəzarəti altında olan ərazidə yaşayan insanlar Azərbaycanda yaşayırlar. Onlar ölkəmizdəki digər çoxsaylı milli azlıqlar kimi Azərbaycan vətəndaşları olaraq yaşayacaqlarına, yoxsa Azərbaycanı tərk edəcəklərinə dair seçim etməlidirlər", - deyə Prezident İlham Əliyev bildirib.
Azərbaycan Prezidenti növbəti dəfə Qarabağda yaşayan ermənilərə mesaj verib və onlara konkret yol göstərərək, seçim etmələrini tövsiyə edib. Eksperlərə görə, sadə ermənilər bu mesajı yüksək dəyərləndirir və tezliklə bizim cəmiyyətə inteqrasiya olmaq istəyirlər.
“...Qarabağda yaşamaq istəyirlərsə, Azərbaycanın şərtlərini qəbul etməyə borcludurlar”
Məsələ ilə bağlı SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə şərhində “Azərbaycan yüz illərdir ki, torpaqlarını itirə-itirə gəlib və XX əsrdə də bir qismini itirib. Faktiki olaraq bu tarixi missiya da Prezident İlham Əliyevin üzərinə düşmüşdü və artıq Ali Baş Komandan kimi qərar verməyin vaxtı idi. Cənab Prezident bu tarixi missiyanı məharətlə yerinə yetirdi. O, həm Azərbaycan xalqına sədaqətli olacağına, həm də öz ata nəsihətini yerinə yetirməyə söz vermişdi. Hesab edirəm ki, müharibə başa çatandan sonra ikinci mərhələ də başa çatdırılmaq üzrədir. Elə bu tarixi missiyanın davamı olaraq da Ermənistan əhalisinin konkret qərar verməsinin zamanı yetişib. Onlar ya Qarabağdan çıxmaq haqqında, ya da Azərbaycan qanunları ilə yaşamaq haqqında qərarını verməlidir”.
Bəhruz Quliyev deyib ki, ölkə başçısı dəfələrlə müsahibələrində, eyni zamanda “Euronews”a müsahibəsində ermənilərin seçim etmək vaxtının çatdığını bildirib: “Çünki Azərbaycan dövləti Qarabağda yaşayan ermənilərə başqa etnik qruplar kimi Azərbaycan Konstitusiyası və qanunları ilə yaşamaq hüququ verir. Azərbaycan qanunları ilə yaşamaq istəyən ermənilər arasında vaxtilə azərbaycanlılara qarşı cinayət əməlləri törədənlər buna görə cəzalarını çəkəcəklər. Faktiki olaraq son zamanlarda bəzi ermənilərin Azərbaycanın aidiyyəti qurumları tərəfindən saxlanılmasından sonra Ermənistanda revanşist müqavimət hərəkatı hərəkətə başlayıb. Əgər ermənilər Azərbaycan qanunlarına uyğun Azərbaycan torpağında yaşayacaqlarsa və buna qərar verirlərsə, Rusiya sülhməramlılarına artıq zərurət qalmır və onlar Qarabağı tərk etməli olacaq. Çünki onların 5 illik missiyaları artıq başa çatır”.
Qurum rəhbəri bildirib ki, bu gün təəssüflər olsun, Fransa, Rusiya və digər ölkələr istəmirlər Azərbaycan öz torpaqlarına sahib dursun və münaqişəni həll etsin: “Münaqişə ocaqları adətən bir çox dövlətlərin maraqlarına xidmət edir. Hətta bəzən lokal kiçik münaqişə ocaqları yaradıb bundan istifadə edən super dövlətlər də vardır. Problemin həllinə mane olan səbəblərdən biri də budur. Ona görə də Ermənistanda Baş nazir Nikol Paşinyanın əleyhinə müqavimət hərəkatı mövcuddur və bəzi dövlətlər də bu hərəkatı qızışdırır. Lakin Paşinyan proseslərin çıxış yolunu yaxşı bilir. O, ermənilərə Qarabağda yaşamaq istəyirlərsə Azərbaycanın şərtlərini qəbul etməyə borcludurlar, deyə bir yol da göstərmiş oldu”.
İradə SARIYEVA
