"Əfsuslar olsun ki, bugünə kimi Qırmızı Xaç Komitəsinin Qarabağdakı ofisi Bakı ofisinə yox, İrəvandakı ofisə tabedir. Bu da yolverilməzdir. Çünki bütün dünya Qarabağı Azərbaycanın bir hissəsi kimi tanıyır". Bunu Azərbaycan Prezidenti İlham Əliyev “Euronews” televiziyasına müsahibəsində deyib.
Prezident qeyd edib ki, Qırmızı Xaç Komitəsi dava-dərmanın nəqlini və Ermənistanda müalicəyə ehtiyacı olan xəstələrin təxliyəsini bərpa etdi: "Lakin əfsuslar olsun ki, Qırmızı Xaç Komitəsinin yük maşınlarının yoxlanılması zamanı siqaret, iPhone-lar və benzin kimi məhsulların qaçaqmalçılıqla keçirilməsi aşkar olundu. Qırmızı Xaç Komitəsi bunu etiraf etdi və bildirdi ki, onlar buna görə heç bir məsuliyyət daşımırlar. Lakin bu yük maşınlarının üzərində Qırmızı Xaçın emblemi var idi və sürücülərin uniformaları üzərində də emblemlər var idi. Beləliklə, yol yenidən bu şəkildə bağlanıldı və biz Qırmızı Xaç Komitəsindən buna son qoyulmasını və bizimlə daha konstruktiv işləməsini xahiş etdik. Çünki əfsuslar olsun ki, bu günə kimi onların Qarabağdakı ofisi Bakı ofisinə yox, İrəvandakı ofisə tabedir. Bu da yolverilməzdir. Çünki bütün dünya Qarabağı Azərbaycanın bir hissəsi kimi tanıyır. Hətta Ermənistanın baş naziri dəfələrlə "Qarabağ Azərbaycandır" söyləyib. Bəs nəyə görə Qırmızı Xaç Komitəsinin Xankəndidəki ofisi Bakı ofisinə yox, İrəvandakı ofisə tabedir? Bu bizim legitim tələbimizdir".
Maraqlıdır, Qırmızı Xaç Komitəsinin Xankəndidəki ofisi Bakı ofisinə yox, İrəvandakı ofisə tabedir. Bu məsələ necə həll olunmalıdır?
"Humanitar yardım adı altında şou tərtib olunursa, demək, məsələ siyasiləşdirilir. BQXK-nin ofisinin Bakıya tabe olması labüddür"
Jurnalist Ekspert Mərkızinin sədri Ceyhun Musaoğlu "Bakı-Xəbər" ə açıqlamasında qeyd etdi ki, Beynəlxalq Qırmızı Xaç Komitəsi illər öncə də Ermənistana meylli olub. Torpaqlar işğaldan azad olunduqdan sonra Laçın sərhəd keçid məntəqəsindən onların maşını yoxlanılan zaman qeyri-qanuni yolla, deklarasiyadan gizlədilən məhsullar aşkar olundu. BQXK qaçaqmalçılıq hallarının sürücülərin əli ilə baş verdiyini iddia edir. Lakin hər bir halda bu kimi qanunsuzluqlara görə BQXK məsuliyyət daşıyır. Buna görə baş ofis cavab verməli və üzr istəməlidir: "Həmçinin, Beynəlxalq Qırmızı Xaç Komitəsi Xaçaturyanı sərhəddən keçirməyə cəhd etdi, lakin onların bu istəyi gerçək olmadı. Beynəlxalq Qırmızı Xaç Komitəsinin humanitar yardım adı altında quldurlara, işğalçı tərəfə dəstək olması beynəlxalq standartlara uyğun deyil. Onlar humanitar yardım adı altında narkotik, telefon və ən əsası da cinayətkarları daşıyırlar. Humanitar yardım adı altında şou tərtib olunursa, demək, məsələ siyasiləşdirilir. Bu səbəbdən də BQXK-nin ofisi Bakıya tabe olmalıdır".
Ekspert hesab edir ki, Azərbaycan Prezidentinin bu mesajı kanallarla onlara da çatdırılacaq, vaxt veriləcək ki, ofislərini Bakıya köçürsünlər: "Azərbaycan hər zaman humanitar prinsip və qanunlara tabe olan, beynəlxalq konvensiyalara hörmət edə ölkə olub. Buna görə də gərək Qırmızı Xaç Komitəsi də fəaliyyət göstərdiyi ölkənin qanunlarına hörmətlə yanaşsın. Beynəlxalq Qırmızı Xaç Komitəsi özünün nizamnamə və prinsiplərində nəzərdə tutulduğu kimi humanitar deyil, anti-humanitar fəaliyyət göstərir”.
C.Musaoğlu xüsusi olaraq vurğuladı ki, Azərbaycan onların İrəvan ofisini Bakıya köçürmələrini tələb edirsə, bu belə də olmalıdır: "Onu da deyim ki, BQXK qaçqın və məcburi köçkünlərə yardım edən bir təşkilatdır. Qarabağda yaşayan ermənilər isə nə qaçqındır, nə də köçkün. Xankəndidə yaşayan ermənilər də bizim vətəndaşlarımızdır".
Günel CƏLİLOVA
