Azərbaycan Avrasiya İqtisadi Birliyinin toplantısında da qonaq qismində iştirak edib. Ekspertlər hesab edir ki, bu, Azərbaycanın bütövlükdə Avrasiyadakı nüfuzundan qaynaqlanır. Quruma üzv ölkələr özləri də Azərbaycanla münasibətlərini inkişaf etdirməkdə maraqlıdır.
Azərbaycanın Rusiya və Belarusla ənənəvi ticarət əlaqələri var və Orta Asiya ölkələri ilə, o cümlədən Qazaxıstanla, Özbəkistanla, Qırğızıstanla ikitərəfli əlaqələri getdikcə genişlənir. Onu da nəzərə alaq ki, Azərbaycan “Şərq-Qərb”, “Şimal-Cənub” dəhlizlərinin, logistik marşrutların mərkəzində yerləşir. Bu mənada həmin təşkilata üzv dövlərlərlə ikitərəfli əlaqələrin genişləndirilməsi bütün tərəflər üçün mühüm önəm kəsb edir.
Azərbaycanın bu imkanları Avrasiya İqtisadi Birliyinin də xüsusi diqqət mərkəzində yer alır. Bu həm də ondan qaynaqlanır ki, Prezident İlham Əliyevin də bildirdiyi kimi, Azərbaycanın dayanıqlı və özünü təmin edən müstəqil iqtisadiyyatı və xarici siyasəti var. Bu, ölkəyə müstəqil xarici siyasət yürütməyə imkan verir. Yeri gəlmişkən qeyd edək ki, Azərbaycanın sözügedən təsisata üzvlüyünə zərurət də yoxdur. Ümumiyyətlə, Ermənistan istisna olmaqla, Azərbaycanın Avrasiya İqtisadi Birliyinin üzvləri ilə əməkdaşlığı 30 il ərzində uğurla inkişaf edir.
Təəssüflər olsun ki, Azərbaycanın qonaq qismində həmin tədbirdə iştirakına başqa don geyindirənlər də var. Bunu elə əsaslandırmağa çalışırlar ki, güya bu iştirak Azərbaycanın Avrasiya İqtisadi Birliyinə üzv olması ilə nəticələnəcək və ölkəmiz Moskvanın təsir dairəsinə düşəcək.
Maraqlıdır, Avrasiya İqtisadi Birliyi ilə sıx əməkdaşlıq bizə nə verir və Azərbaycan nə vaxtsa bu quruma üzv ola bilərmi?
Politoloq Amid Əliyev “Bakı-Xəbər”ə açıqlamasında bildirdi ki, ölkə başçısının son bir ildəki xarici səfərlərinə diqqətlə nəzər yetirsək görərik ki, Azərbaycan Orta Asiya, Avropa və Afrika dövlətlərinin həm siyasi, həm də iqtisadi məzmunlu təşkilatlarında yüksək səviyyəli qonaq qismində iştirak edib:
“ Bu ilk növbədə Azərbaycana və onun Prezidentinə olan yüksək ehtiramın bir işarəsidir. Moskvada keçirilən görüşdə iştirak Azərbaycana və xüsusilə də onun milli maraqlarına heç bir təhdid yaratmır. Eyni zamanda bu iştirak Azərbaycana həmin təşkilat qarşısında da bir asılılıq yaratmır. Ümumiyyətlə, Azərbaycanın xarici itisadi siyasətinin əsasında balanslaşdırılımış və hansısa təşkilata qoşulmamaqla iqtisadi dividendlərin əldə edilməsinə yönəlib. Bununla yanaşı, təşkilata daxil olan üzv ölkələrlə də qarşılıqlı və ikitərəfli əməkdaşlıq platforması mövcuddur ki, burada da Azərbaycanın iqtisadi göstəriciləri həmin dövlətlər üçün olduqca vacibdir. Yəni bu gün istər Avrasiya məkanı olsun, istərsə də Avropa və ərəb ölkələri olsun, Azərbaycanı onlar seçir. Məhz həmin dövlətlər Azərbaycanla hər bir müstəvidə əməkdaşlığa can atırlar. Öz növbəsində də Azərbaycan bu dövlətlərin bütün çağırışlarına açıq olub və qarşılıqlı etimad əsasında münasibətlərin qurulmasını təşviq edir. Nəzərə almaq lazımdır ki, Avrasiya məkanının ən vacib iqtisadi təşkilatlarından biri kimi Avrasiya İqtisadi
Şurası çıxış edirsə, eyni zamanda onun üzvlərinin 80%-i həm də hərbi siyasi təşkilat olan KTMT çərçivəsində müttəfiqdirlər. Bu dövlətlərin hər biri ilə Azərbaycanın siyasi, iqtisadi və mədəni əlaqələri var. Eyni zmanda bu iki təşkilata üzv olan dövlətlərin əksəriyyəti ilə Azərbaycan Türk Dövlətləri Təşkilatı daxilində də əməkdaşlıq edir. Dünən ölkə başçısı öz çıxışında Azərbaycanın iqtisadi göstəriciləri haqqında müfəssəl təqdimatı iştirakçıların nəzərinə bir daha çatdırdı. Xüsusi ilə Azərbaycanın nəqliyyat sahəsindəki uğurları və infrastrukturu vacib məqam kimi vurğulandı. Çıxış zamanı qeyd olunan faktlar iştirakçılarda Azərbaycan üzərindən yüklərin daha effektli və qısa zaman kəsiyində daşınmasının mümkünlüyü bir daha sübut olundu. Beləliklə, ölkə başçısının sözügedən tədbirdə iştirakı ölkəmizin milli maraqlarına və iqtisadi siyasətinə uyğun şəkildə həyata keçirildi. Bundan əlavə isə, iştirakçılara son günlər bölgədə baş verən siyasi proseslər və Azərbaycan-Ermənistan sülh gündəliyi haqqında ətraflı məlumat verildi.
Azərbaycan hər zaman faydalı sayıla biləcək bütün növ platformalarda iştiraka açıqdır”.
Məhəmmədəli QƏRİBLİ
