Ermənistanın spikeri 6 təklifin sırasında status məsələsinin də olduğuna ümidlidir - necə?

Məhərrəm Zülfüqarlı: “Ermənistanı buna məcbur edən Rusiya faktorudur”

img

Ermənistan Parlament sədri Alen Simonyan Dağlıq Qarabağın gələcək statusu barədə danışıb. O, erməni mediasına açıqlamasında bəyan edib ki, Ermənistanın təklifləri mahiyyət etibari ilə Qarabağın statusunu özündə ehtiva edir:

“Ermənistanın təklifi elə status məsələsidir. Amma Ermənistanın status məsələsi barədə təklifi müzakirə mövzusudur. Burada sirr kimi saxlanan heç nə yoxdur. Danışıqlar vaxtı hər hansı nüans bir saat ərzində dəyişə bilər. Çox vaxt belə olur ki, Azərbaycan tərəfindən sənəd daxil olur. Biz bəzən bir sözü bir həftə müzakirə edə və dəyişikliyə çalışa bilərik. Amma müxalifət deyir ki, “elə indi və birbaşa mətnlə verin”. Belə olmur, axı”.

Erməni spiker Qarabağ erməniləri üçün konkret olaraq hər hansı muxtariyyət barədə suala belə cavab verib: “Baş nazirin xüsusi tapşırıqlar üzrə xüsusi nümayəndəsi bu suallara artıq cavab verib. Daha doğrusu o, baş nazirin belə bir mülahizəsini diqqətə çatdırıb ki, status məsələsi insan haqlarından irəli gəlir. Biz bunun əksini etmirik. Biz eyni şeyi nə qədər təkrar etsək də, nə qədər izah etsək də, qarşı tərəfdən tənqid səslənəcək. Amma onlar heç bir təklif vermirlər. Bugün müxalifət nə təklif edir? Heç nə”.

Görünən odur ki, Ermənistan Qarabağın statusu ilə bağlı məsələdən əl çəkmək istəmir.

  • “Paşinyan komandasının son vaxtlar status məsələsini mütəmadi qabartması müəyyən məqsədlərə hesablanıb”

Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Paşinyan komandasının son vaxtlar status məsələsini mütəmadi qabartması müəyyən məqsədlərə hesablanıb: “44 günlük Vətən müharibəsində Azərbaycanın qələbəsindən sonra ermənilər bütün vasitələrlə prosesi uzatmağa və vaxt qazanmağa çalışırlar. Xüsusən də Rusiya sülhməramlılarının Qarabağa yerləşməsi ermənilərin əlinə fürsət verib. Son vaxtlar Paşinyanın bəyanatlarında olan ziddiyətlər və status məsələsini gündəmə gətirməsi təsadüfü deyil. Bu bir daha onu göstərir ki, ermənilər özbaşına hərəkət etmirlər. Ermənistanı buna məcbur edən Rusiya faktorudur. Ona görə də indiki dövrdə əsas diqqət Rusiya-Ukrayna müharibəsinə yönəldilməlidir. Onun nəticəsindən asılı olaraq bunun dünyada, o cümlədən Qarabağda gedən proseslərə çox güclü təsiri olacaq. Rusiyaya tətbiq olunan sanksiyalar, Ukraynada gedən müharibə gələcəkdə Rusiyanın Cənubi Qafqazdan çəkilməsinə səbəb ola bilər. Bu da Qafqazda sülhün bərqərar olmasına bilavasitə təsir göstərə bilər. Ancaq Ermənistan tərəfi nə qədər çalışsa da, Azərbaycan status məsələsini qəbul etməyəcək”.

Vidadi ORDAHALLI

Peşə etikası

Son xəbərlər