Vüqar Rəhimzadə: “Nə qədər erməni lobbisinin təsiri altında olub ədalətsiz mövqe sərgiləmək olar?”
ABŞ dövlət katibinin köməkçisi Filip Riker İrəvanda “Azadlıq” radiosunun erməni xidmətinə müsahibəsində bütün məsələlərə, xüsusən də diversantların qaytarılmasına toxunsa da, maraqlıdır ki, minalı ərazilərdən bir kəlmə də danışmayıb.
ABŞ-ın aparıcı diplomatı ötənilki Qarabağ müharibəsindən sonra hərbi əsirlərin buraxılmasında tərəqqi olmamasından narahatlığını dilə gətirib: “Atəşkəs razılaşmasında müharibə vaxtı saxlanmış hərbi əsirlərin və digər şəxslərin buraxılmasını nəzərdə tutan maddə var. Məncə, söhbətin insanlardan, münaqişənin hər iki tərəfindəki insanlardan, uşaqlardan, həyat yoldaşlarından, valideynlərdən getdiyini yadda saxlamalıyıq və saxlananların hamısının qaytarılmasını istəyirik. Mən, eləcə də Birləşmiş Ştatlar hökuməti əsirlərin, saxlananların hamısının azad edilərək evlərinə qayıtmasının vacibliyini dəfələrlə qeyd etmişik. Bu münaqişənin adamlara təsir göstərdiyini yadda saxlamalıyıq. Dövlət katibi Blinken bəyan edib ki, irəli getmək, münaqişənin bütün aspektlərini həll etmək, hərtərəfli həllə nail olmaqdan ötrü saxlananlar azad edilməlidir. Bu münaqişənin adamlara təsir göstərdiyini yadda saxlamalıyıq. Sərhədlər razılaşdırılmalıdır”.
Bəs minalar adamlara təsir etmir? Bu qədər sözügedən məsələni görməzdən gəlmək və ancaq diqqəti diversantların qaytarılmasına yönəltmək nə deməkdir?
- “ABŞ öz imkanlarından istifadə edərək Ermənistandan mina xəritələrinin verilməsini tələb etməlidir”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin fikrincə, bu cür mövqe sərgiləmək açıq-aşkar ədalətsizlikdir: “Bu dərəcədə qeyri-obyektiv mövqe sərgiləmək olmaz. Görünür, Riker müəyyən təsir altındadır. ABŞ-ın hərbi əsir hesab etdiyi şəxslər insan qatilləridir. Onların məqsədi Qarabağda təxribatlar törədib insanları qətlə yetirmək olub. Özü də həmin diversantlar 10 noyabr razılaşmasından sonrakı dövrdə zərərsizləşdiriliblər. Ona görə də diversantlar qanuna müvafiq olaraq sərt cəzalandırılmalıdırlar. Ermənistan işğal etdiyi əraziləri boşaldarkan kütləvi şəkildə minalayıb. Müharibənin bitməsinə rəğmən, minalanmış ərazilərin xəritələrini verməkdən nümayişkaranə formada imtina edir. Nəticədə baş verən mina partlayışları zamanı hərbçilərlə yanaşı, mülki şəxslər də həlak olur, ağır formada yaralanırlar. Bu günlərdə ikisi media təmsilçisi olmaqla 3 mülki şəxs mina partlaması nəticəsində həlak oldu. Atəşkəs barədə 10 noyabr 2020-ci il razılaşmasından bu yana 20 mülki şəxs və 7 hərbçimiz işğaldan azad olunmuş ərazilərdə minaya düşərək həlak olub. Bununla yanaşı, 89 hərbçi və 29 mülki şəxs isə yaralanıb. İnsan həyatından danışan Qərb diplomatları bəs bunları niyə görmürlər? Bütün bunları görməzdən gələrək ancaq diversantların qaytarılmasını qabartmaq qərəzli və birtərəfli yanaşmanı özündə ehtiva edir. Nə qədər erməni lobbisinin təsiri altında olub ədalətsiz mövqe sərgiləmək olar? ABŞ öz imkanlarından istifadə edərək Ermənistandan mina xəritələrinin verilməsini tələb etməlidir. Əgər sülhə, sabitliyə xidmət edirlərsə, o zaman ədalət mövqeyini itirməməlidirlər”.
V.Rəhimzadə onu da qeyd etdi ki, ABŞ rəsmilərinin bu cür subyektiv fikirləri işğalçı Ermənistanı aqressiv mövqedən çıxış etməyə cəsarətləndirir.
Vidadi ORDAHALLI
