“...Ona görə mən sizə tapşırıram, bütün hərbi hissələrdə ideoloji vəziyyətə xüsusi əhəmiyyət verilməlidir. Ölkəmizin tarixi - həm qədim tarixi, həm də müasir tarixi ilə əlaqədar hər bir əsgərdə, zabitdə dolğun təəssürat olmalıdır. Çünki mən bunu dəfələrlə demişəm, əfsuslar olsun ki, biz real tariximizi bilməmişik. Günah da bizdə deyil, çünki belə oxumuşuq, bizə belə dərs veriblər. Sovet vaxtında tarix dərslərinin çoxu saxta idi. Azərbaycan xalqının düşmənləri qəhrəman kimi qələmə verilirdi. Quldur 26 Bakı komissarı dəstəsi qəhrəman kimi təqdim edilirdi. O dəstənin başında dayanan cinayətkar erməni millətçiləri qəhrəman kimi təqdim olunurdu. Onların adına rayonlar verilirdi, onlara abidələr qoyulurdu. Azərbaycan xalqının cəlladı Şaumyana abidə qoyulmuşdu, onun adı əbədiləşdirilmişdi. Biz bu tarixi görmüşük. Yenə də günah bizdə deyil. Sovet hakimiyyətinin tarixi bu idi. Müstəqilliyi quranlar düşmən kimi qələmə verilirdi. Azərbaycan Xalq Cümhuriyyəti antimilli qurum kimi qələmə verilirdi. Ancaq bizim müstəqilliyimizi əlimizdən alanlar, yerli satqınlar qəhrəman kimi qələmə verilirdi. Küçələrə onların adları verilir, onlara abidələr, monumentlər qoyulurdu. Bəlkə də yaddan çıxıb, Sahil bağında 26 Bakı komissarlarına abidə qoyulmuşdu. Mən fikirləşdim ki, bu, nə məsələdir. Bunlar Azərbaycan xalqının qanını axıdıblar, bizi məhv ediblər. Heç şəhərin mərkəzində belə abidəmi olar? O abidə də və o quldur dəstəsinin üzvlərinin abidələri də söküldü və düz də etmişəm. Bütün dini ayinləri gözləmək şərtilə onların qəbirləri oradan köçürüldü. Ancaq bu, dözülməz idi ki, şəhərimizin mərkəzində Azərbaycan xalqının düşmənlərinə abidə ucaldılıb”. Bu fikirləri Azərbaycan Prezidenti, Silahlı Qüvvələrin Ali Baş Komandanı İlham Əliyev iyunun 25-də Müdafiə Nazirliyinin "N" saylı hərbi hissəsinin açılış mərasimində bildirib.
Azərbaycan Milli Elmlər Akademiyasının (AMEA) Fəlsəfə İnstitutunun aparıcı elmi işçisi, tarix üzrə fəlsəfə doktoru Faiq Ələkbərli baki-xeber.com-a bildirdi ki, Prezidentin hər bir əsgərdə, zabitdə tariximizlə bağlı dolğun təəssüratın olmalı olduğunu tövsiyə etməsi təqdirəlayiq haldır. F.Ələkbərlinin sözlərinə görə, ölkə başçısı bu mühüm, vacib faktora diqqət çəkməklə əsgər və zabitlərimizin şərəfli tariximizə daha möhkəm bağlarla bağlı olmasının çox önəmli olduğunu onların qarşısına məqsəd olaraq qoyub. “Əlbəttə ki, tarix çox ciddi məsələdir. Hər bir xalqı, dövləti ayaqda tutan onun tarixi və mədəni şüurudur. Bunlar ikisi isə bir yerdə milli şüuru təşkil edir. Hər bir xalq tarixi və mədəni şüurunu doğru-dürüst şəkildə mənimsəməli və ifadə etməlidir. Bu baxımdan, ölkə başçısının hərbi hissədə əsgər və zabitlərə verdiyi bu mühüm tövsiyəni, etdiyi vacib çağırışı müsbət qiymətləndirirəm, bu doğrudan da əhəmiyyətlidir. Doğrudan da biz uzun illər öz milli ideologiyamızdan, tariximizdən, milli şüurumuzdan uzaq düşmüşük. Dövlət müstəqilliyimizi bərpa etdikdən sonra tarixi və mədəni şüurda elə də ciddi dəyişiklikləri görə bilmədik, amma hesab edirəm ki, bu yöndə dəyişikliklər vacibdir. Düzdür, müəyyən dəyişikliklər oldu. Deyək ki, Sovet dövründə yazılan tarix kitablarının məzmunu müstəqilliyimizin bərpasından sonra dəyişildi, amma əsaslı şəkildə dəyişmədi. Əlbəttə, hər bir əsgər və zabit Azərbaycan xalqının, dövlətinin, dövlətçiliyinin tarixini öyrənib dərk edərsə, milli şüurumuza, ideologiyamıza bağlı olarsa, onun əlində tutduğu silah onun üçün məhz bir qələbə inancına çevriləcəkdir. Prezidentin də çağırışında bu məqamlar mühüm götürülüb”.
F.Ələkbərli vurğuladı ki, Çar və Bolşevik Rusiyaları dövründə bizim şüurumuza yeridilmiş tarixi şüurdan tamamilə imtina edib milli tarixi şüurumuzu ortaya qoymalıyıq. “Prezidentin də öz nitqində ifadə etdiyi kimi, Sovetlər dövründə Bakının mərkəzində ucaldılmış 26 Bakı komissarlarına və digərlərinə qoyulan abidələr söküldü. Əlbəttə, bu, mühüm addımlardır. Şaumyanın və digərlərinin abidəsinin götürülməsi vacib idi və xalqımızın düşmənlərinin abidələri götürüldü.
Amma təəssüf ki, VII cildlik Azərbaycan tarixi kitabında əks olunan məsələlərin bir çoxu hələ də bizim tarixi, milli şüurumuza uyğun deyil. Yəni bu məsələlərdə çox həssas olmalıyıq. Prezident çox mühüm, ciddi istiqamətlər üzrə ideyalar verir, fikirlər səsləndirir, gərək müəyyən tarixçilər var ki, öz fəaliyyətlərində dönüş etsinlər, yazdıqları tarix kitablarında xalqımızın, dövlətçiliyimizin tarixini, tarixi keçmişimizi dürüst işıqlandırsınlar. Orta məktəb tarix kitablarında Azərbaycan türklərinin burada aborigen olduğu və burada mövcud olan Kutilər, Manna, Midiya, Albaniya, Atropatena kimi qədim dövlətlərin qurucusunun Azərbaycan türkləri, xalqımız olduğu qeyd edilsə də, təəssüf ki, VII cildlik Azərbaycan tarixi kitabında və bəzi Azərbaycan tarixi dərsliklərində bunun tamamilə əksi ortaya qoyulur. Bundan başqa, bəzi tarix kitablarımızda, xüsusən də VII cildlik Azərbaycan tarixi kitabında Ağaməhəmməd Şah Qacar, Nadir şah Əfşar, Şah Abbas, Abbas Mirzə İran adı altında “düşmən” kimi qələmə verilirlər. Halbuki, AMEA-nın prezidenti, akademik Ramiz Mehdiyevin bir sıra əsərlərində, o cümlədən də Nadir şah Əfşara və başqa şahlara həsr etdiyi əsərlərində Səfəvilər, Əfşarlar, Qacarlar dövləti Azərbaycan türklərinin dövləti, onların hökmdarı isə bizim hökmdarlarımız, dövlət başçılarımız kimi təqdim edilir. Əlbəttə, bu, düzgün yanaşmadır” - deyə F.Ələkbərli qeyd etdi.
İradə SARIYEVA
