Cəmi 1 il sonra lizinq şirkəti niyə bağlandı - lizinq şirkətləri şəffaf fəaliyyət göstərmir...
Aslan Əsədov: “Başlıca problem odur ki, lizinq şirkətləri müştəri mənmunluğunu yox, öz xeyirlərini güdürlər”
"SOA Leasing" Məhdud Məsuliyyətli Cəmiyyəti (MMC) ləğv olunur. Bu barədə şirkət özü elan edib.
MMC-nin hansı səbəbdən bu qərarı qəbul etməsi açıqlanmayıb. Yalnız bildirilib ki, kreditorlar iki ay ərzində tələblərini AZ1025 Bakı şəhəri, Xətai rayonu, Xocalı prospekti, ev 37 ünvanına bildirə bilərlər.
Qeyd edək ki, sözügedən MMC 2024-cü ildə dövlət qeydiyyatına alınıb. Nizamnamə kapitalı 136 min manat olan şirkətin qanuni təmsilçisi Alıyev Ruslan Nizami oğludur.
Göründüyü kimi, sözügedən lizinq şirkəti bağlanıb, amma bunun səbəbi bizə də məlum deyil. Lakin bütövlükdə, ölkədə lizinq şirkətləri ilə bağlı yaxşı əhval-ruhiyyə yoxdur. Lizinq şirkətlərinin fəaliyyətinin bir çox hallarda şəffaf olmadığı barədə fikirlər var. Təbii ki, bu bütün lizinq şirkətlərinə aid deyil. Xüsusən də lizinq şirkətləri ilə vətəndaşlar arasında çox böyük problemlər var. Bu problemlər bir çox hallarda məhkəmə ilə həll edilir. Bəzən isə, ümumiyyətlə tərəflər arasında problemlər həllolunmaz qalır. Hətta son vaxtlar belə məlumatlar var ki, illər öncə lizinq şirkətinin qarşısında bütün maliyyə öhdəliklərini ödəmiş şəxslər lizinq şirkətləri tərəfindən məhkəməyə verilir. Özlərindən xəbərsiz onlar barəsində axtarışa verilmə qərarları çıxartdırılır, küçənin ortasında adamları tutdurub aparırlar. Bu cür faktlar var. Yəni ölkədə vətəndaşlarla hüquq-mühafizə orqanlarının üz-üzə qoyulması kimi bir problemin üzə çıxmasında bəzi lizinq şirkətlərinin çox böyük ziyankar fəaliyyəti var. Əsasən də maliyyə öhdəliklərini qəpiyinəcən yerinə yetirən vətəndaşlara qarşı ədalətsiz davranırlar, onlara qarşı iddia qaldırırlar. Guya vətəndaşın borcu var.
“Faiz dərəcəsi o qədər yüksək olur ki, sonda görürsən 17 min manatlıq avtomobilə 25-26 min manat ödəmisən”
Sözügedən məsələni “Bakı-Xəbər”ə şərh edən ekspert Aslan Əsədovun fikrincə, həqiqətən də lizinq təşkilatları ilə bağlı cəmiyyətdə narazılıq var: “Yəni lizinq şirkətlərinin fəaliyyətindən narazılıq böyükdür. Səbəblər də müxtəlifdir. Başlıca problem odur ki, lizinq şirkətləri müştəri mənmunluğunu yox, öz xeyirlərini güdürlər. Məsələn, lizinq təşkilatları bir-birindən fərqli və cazibəli lizinq proqramları hazırlayıb ictimaiyyətə təqdim edir. Ancaq faiz dərəcəsi o qədər yüksək olur ki, sonda görürsən 17 min manatlıq avtomobilə 25-26 min manat ödəmisən. Çünki lizinq faizi olduqca yüksəkdir. Lizinq təklif edən şirkətlər özəl şirkətlərdir və kredit faizlərini özləri tətbiq edirlər. Lizinqlə avtomobil almaq daha tez və daha asan başa gəlsə də, vətəndaşlar fərdi qaydada daha çox kredit yolu ilə almağa üstünlük verməlidirlər. Avtomobil lizinqə salınarkən təxminən 40 faizədək əlavə xərcləri olur. Kreditdən fərqli olaraq, ödəniş ödənilmədiyi və gecikdirildiyi halda avtomobil həmin şirkət tərəfindən müsadirə olunur. Narazılıq əsasən bununla bağlıdır. Ona görə də vətəndaşlar diqqətli olmalıdırlar. Vətəndaşlar lizinq şirkəti ilə əməkdaşlıq etməzdən əvvəl, yaxşı olardı ki, lizinq şirkətləri barəsində geniş məlumat toplasınlar. Şirkətin nə dərəcədə ciddi olması, iş prinsipi, görəcəyi işlər, gələcək perspektivlər və bu kimi faktorlara, mütləqdir ki, önəm versinlər. Əfsuslar olsun ki, bir sıra hallarda vətəndaş aldanır. Ona görə də ekspert olaraq tövsiyəm odur ki, ayıq-sayıq olsunlar”.
Vidadi ORDAHALLI
