2019-cu ildə Prezident Administrasiyasına bələdiyyələrin fəaliyyəti ilə bağlı daxil olan müraciətlərin ümumi sayı əvvəlki illə müqayisədə 31 faiz, şikayətlərin sayı 46,4 faiz artıb.
Bu barədə Azərbaycan Respublikasının Prezidenti Administrasiyasının Vətəndaşların müraciətləri ilə iş şöbəsinin müdiri Süleyman İsmayılovun rəsmi mətbuatda dərc edilmiş məqaləsində bildirilib.
Qeyd olunur ki, bələdiyyələrin fəaliyyətindən narazılıq bildirilən müraciətlər Binəqədi, Xəzər, Lənkəran, Şəki, Ağcabədi, Beyləqan, Bərdə, Biləsuvar, Cəlilabad, Gədəbəy, Göyçay, İmişli, Masallı, Saatlı, Sabirabad, Şabran, Şamaxı, Şəmkir, Zaqatala, Zərdab, digər şəhər və rayonlardan daha çox olub: “Hər birimizin yaddaşında islahatlar ili kimi qalan ötən 2019-cu il həm də bələdiyyə seçkiləri ili olub. Cəmiyyət bələdiyyə seçkilərinə böyük maraq göstərib, 40 mindən çox namizədin arasından 1606 bələdiyyəyə 15 min 156 nəfər üzv seçilib. İnanırıq ki, yeni seçilmiş bələdiyyə üzvləri zamanla ayaqlaşacaq, cəmiyyətin inkişafı üçün səylərini əsirgəməyəcək, bu sahədə yol verilən qüsurların aradan qaldırılmasına çalışacaq, növbəti illərdə onların fəaliyyəti barədə şikayətlər minimuma enəcək”.
Görünən odur ki, bələdiyyələrin fəaliyyətinin arzuolunan səviyyədə olmaması bu sahədən şikayətlərin artmasına səbəb olub. Maraqlıdır, bəs ekspertlər şikayətlərin sayının artmasını hansı səbəblərlə əlaqələndirirlər?
“Elə məsələlər var ki, bunun bələdiyyəyə heç bir aidiyyəti yoxdur”
Məsələyə münasibət bildirən bələdiyyə sahəsi üzrə ekspert Vüqar Tofiqlinin sözlərinə görə, yerli özünüidarəetmə orqanlarından şikayətlərin artması bir sıra amillərlə bağlıdır: “Çox yaxşı olardı ki, bələdiyyələrlə bağlı şikayətlərin klassifikasiyası göstərilsin. Yəni şikayətlərin konkret nədən olduğu bilinməlidir. Torpaqlar, evlərin sənədləşdirilməsi, kommunal məsələlərlə bağlı şikayətlərin daha çox olub-olmadığı bəlli olmalıdır. Deməyim odur ki, bütün bunlar bəlli olsaydı, o zaman problemin kökündə dayanan məsələləri daha dəqiq göstərmək olardı. Ümumi olaraq onu deyə bilərəm ki, bu gün vətəndaşlar bir sıra problemlərlə bağlı daha çox bələdiyyələrə şikayət edirlər. Baxmır, bu, bələdiyyəyə aiddir, yoxsa digər qurumlara. Bələdiyyədən rədd cavabı alanda dərhal ondan şikayət edirlər. Elə məsələlər var ki, bunun bələdiyyəyə heç bir aidiyyəti yoxdur. Məsələn, haradasa kanalizasiya ilə bağlı problem yaranır. Vətəndaş bununla bağlı bələdiyyəyə üz tutur. Hansı ki, sözügedən problemi bələdiyyə həll edə bilmir. Bələdiyyə vasitəçi kimi həmin problemi yuxarı instansiyalarda qaldıra bilər. Ancaq kanalizasiya probleminin həlli bələdiyyənin imkanı xaricindədir. Çünki bələdiyyələrin maliyyə imkanları çox məhduddur. İkincisi, vətəndaşların maarifləndirilməsində problemlər var. Elə məsələlər var ki, bunlar bələdiyyənin səlahiyyətinə aid deyil. Ona görə də bu və digər məsələlərlə bağlı bələdiyyələr əhalini maarifləndirməlidirlər. Bu sahədə problem olduğuna görə vətəndaşlar daha çox bələdiyyələrdən şikayətlənirlər. Deməyim odur ki, vətəndaşlar bəzən hansısa problemlə əlaqədar bilmədən bələdiyyələri günahlandırırlar. Hesab edirəm ki, bütün bu problemlər həllini tapsa, bələdiyyələrdən bu dərəcədə şikayətlər olmaz”.
Vidadi ORDAHALLI
