Hind turistlərin Azərbaycandan “qisas aktının” heç bir ciddi təsiri ola bilməz...
Ceyhun Aşurov: “Azərbaycan daim yeni bazarlarda təbliğat işləri aparır, yeni turizm…”
Hindistanla son qarşıdurma zamanı Türkiyə və Azərbaycanın Pakistana dəstək verməsindən sonra hindistanlılar bu ölkələrdəki istirahət məkanlarına planlaşdırılmış tətillərini ləğv edirlər. Bu barədə "Reuters" Hindistandakı turizm rezervasiya şirkətlərinə istinadən bildirib.
Hindistanlılar üçün məşhur və münasib büdcəli istirahət məkanları olan Türkiyə və Azərbaycan Hindistanın hava zərbələrindən sonra İslamabada dəstək ifadə edən bəyanatlar veriblər. "Son bir həftə ərzində Azərbaycana və Türkiyəyə sifarişlər 60 faiz azalıb, eyni dövrdə ləğvlərin sayı isə 250 faiz artıb", - “MakeMyTrip” onlayn rezervasiya şirkətinin sözçüsü bildirib. Şirkətin baş icraçı direktoru Rikant Pitti isə deyib ki, son geosiyasi gərginliklərə görə platforma üzərindən Türkiyə üzrə səyahət rezervasiyalarının ləğvi 22 faiz, Azərbaycan üzrə isə 30% artıb. O əlavə edib ki, hindistanlı turistlər indi Gürcüstan, Serbiya, Yunanıstan, Tailand və Vyetnama üstünlük verirlər. Şirkətin təsisçisi və idarə heyətinin sədri Nişant Pitti bildirib ki, ötən il 287 min hindistanlı Türkiyəyə, 243 min nəfər isə Azərbaycana səfər edib: “Bu xalqlar Pakistanı açıq şəkildə dəstəkləyirsə, biz onların turizmini və iqtisadiyyatlarını gücləndirməliyikmi?”.
Maraqlıdır, Hindistandan turist axınının azalması Türkiyə və Azərbaycanın turizm sektoruna ciddi mənfi təsir göstərə bilərmi?
Bir çox ekspertlər hesab edir ki, Hindistanın başlatdığı bu xoşagəlməz kampaniyanın Azərbaycan bazarına elə də ciddi təsiri ola bilməz, çünki ölkəmizə təkcə Hindistandan deyil, dünyanın ayrı-ayrı ölkələrindən çoxlu sayda turist gəlir.
“Əlbəttə ki, bu siyasi məsələdir”
Turizm üzrə ekspert Ceyhun Aşurov “Bakı-Xəbər”ə bildirdi ki, Hindistanda blogerlər, siyasətçilər Azərbaycanın mövqeyinə, qardaş Pakistana açıq şəkildə dəstək verdiyinə görə bu cür qərarlar veriblər: “Qərar veriblər ki, Hindistandan olan turistlər, vətəndaşlar xaricə səfər edərkən Azərbaycan, Türkiyə, Özbəkistan və digər türk ölkələrinə səyahət etməsinlər. Belə bir çağırışlar var. Əlbəttə ki, bu siyasi məsələdir. Digər bir medianın yaydığı xəbərdə də oxuduq ki, artıq Azərbaycan danışıqlar aparır. Birbaşa uçuşlar müharibə şəraiti, gərginliklə bağlı dayanmışdı. Yaxın zamanlarda birbaşa uçuşları bərpa etməyə çalışırlar. Ümid edirik ki, bu gərginlik davam etməz və tezliklə məsələ qaydasına düşər. Əlbəttə, bu, əhalisi çox olan iki böyük ölkə üçün həm də böyük regional bir risqdir, gərginlikdir. Çünki Hindistan bazarı kifayət qədər böyük bazardır, 1, 4 milyard əhalisi olan bir ölkədir və az qala Çin qədər əhali sayına malikdir. Nəzərə alaq ki, Çin də böyük bazardır. Hindistandan Azərbaycana gələn turistlərin sayı ildən-ilə artırdı”.
C.Aşurov qeyd etdi ki, bütün ölkələrə Hindistandan turistlər gedir. “Son dövrlər Hindistandan uçuşların birbaşa olması səbəbilə o ölkədən gələnlərin sayı 240 mindən çox idi. Bu 2019-cu illə, pandemiyadan əvvəlki dövrlə müqayisədə 4 dəfəyə qədər artım demək idi.
Nəzərə alsaq ki, keçənilki statistikaya görə, Azərbaycana gələn turistlərin arasında Hindistandan gələn turistlər üçüncü yerdədir. Əlbəttə, bu ciddi rəqəmdir. Bu, ölkəmizə gələn turistlərin ümumi sayına da öz təsirini göstərə bilər. Ona görə də Azərbaycan daim yeni bazarlarda təbliğat işləri aparır, yeni turizm destinasyalarından hava nəqliyyatı vasitəsilə birbaşa uçuşlar həyata keçirməyə çalışır, vizaların sadələşdirilməsi prosesini davam etdirir.
Məsələn, son dövrlər Çinlə olan yaxınlaşma, strateji əməkdaşlıq və sair kimi müsbət hadisələrin turizm bazarına da öz müsbət təsirini göstərəcəyi gözlənilir.
Amma bəzən gərginliklər də qaçılmazdır. Ümid edirik, bu gərginliklər tezliklə arxada qalacaq və Hindistandan Azərbaycana olan uçuşlar və münasibət bərpa olunacaq”-deyə C.Aşurov qeyd etdi.
İradə SARIYEVA
