Əliməmməd Nuriyev: "Tərtər hadisələri zamanı baş verən ölüm hallarının yenidən araşdırılması zəriri idi"
"Tərtər işi" ilə bağlı vaxtında istintaq apardıq. Bunu jurnalistlərə açıqlamasında Azərbaycanın baş prokurorunun müavini, hərbi prokuror Xanlar Vəliyev deyib.
"İndi iş Baş Prokukorluqda aparılır. Biz vaxtında istintaq apardıq, müəyyən qisim işlər gördük. Baş Prokukorluq işi təzələyib, istintaq aparılır", - deyə X.Vəliyev bildirib.
Hərbi cinayətlərdən bəhs edən Xanlar Vəliyev bildirib ki, hər il ən azı 98-99 faiz cinayətin üstü açılır.
"Xüsusən ölüm halları ilə bağlı 100 faiz cinayətin üstü açılır. Tapşırıq vermişəm ki, hər bir ölüm halı ilə bağlı dərhal cinayət işi başlanılmalıdır", - deyə o əlavə edib.
Xanlar Vəliyev qeyd edib ki, "Tərtər işi" ilə bağlı cinayət işi yenilənib, oradakı ölüm faktlarının hamısı yenidən araşdırılır. Nə gözlənilir, nə iş görüləcək? Ölüm işlərinin yenidən araşdırılması nədən irəli gəldi?
"Bu prosesdə iştirak edən və təqsirli olduğu təsdiqlənən hər bir şəxs öz layiqli cəzasını alacaq"
Konstitusiya Araşdırmaları Fondunun rəhbəri Əliməmməd Nuriyev "Bakı-Xəbər"ə şərhində bildirdi ki, "Tərtər işi"ndə ölüm hallarının yenidən araşdırılması zəriri idi və artıq bu yöndə işlər aparılır. "Qeyd etmək lazımdır ki, Baş prokurorun göstərişi ilə "Tərtər işi"nin, bu hadisələrin ciddi araşdırılması davam etməkdədir. Əlbəttə, Tərtər hadisələri bizim hərbiçilərimizə qarşı, yumşaq desək, bir təxribat idi. Nəticədə bizim bir çox peşəkar hərbiçilərimizin təmiz adına ilk ləkə salındı. Eyni zamanda bu proseslər zamanı qeyri-obyektiv yanaşmalar nəticəsində bizim bir çox əsgər və zabitlərimiz işgəncələr nəticəsində həlak oldular. Həmçinin xeyli sayda insan da əsassız olaraq uzunmüddətli azadlıqdan məhrumetmə cəzasına məhkum edildir. Əlbəttə, burada keçmişdə aparılan istintaqın da böyük səhvi vardı, eyni zamanda məhkəmə də bu işə obyektiv yanaşmamışdı. Yəni burada zəncirvari bir yanaşma olmuşdu. Onu da vurğulayaq ki, "Tərtər işi" həm də saxtalaşdırılmış bir iş olmuşdu. Baş prokuror Kamran Əliyevin göstərişi, təşəbbüsü ilə artıq bu məsələnin hərtərəfli, obyektiv araşdırılmasına başlanılıb. Yeni araşdırmalar nəticəsində xeyli sayda hərbiçimiz bəraət aldı, eyni zamanda hərbiçilərə işgəncə verilməsi prosesində iştirak edən bir çox şəxs cinayət məsuliyyətinə cəlb olunur, bir çoxunun barəsində hökm var, bəziləri haqda istintaq gedir. Tərtər hadisələri zamanı baş verən ölüm hallarının yenidən araşdırılması zəriri idi və hərbi prokurorun da dediyi kimi, iş tamamilə yenilənib, istintaq gedir, bu istiqamətdə yenidən ətraflı araşdırma aparılır. Əminəm ki, bu prosesdə iştirak edən və təqsirli olduğu təsdiqlənən hər bir şəxs öz layiqli cəzasını alacaq. Əsas məsələ ədalətin bərqərar olmasıdır. Bir sıra hallarda buna gec nail olunsa da, əsas odur ki, cinayət cəzasız qalmır".
Ə.Nuriyevin sözlərinə görə, cinayətkarın cəzalanması nəticəsində bizim hərbiçilərimizin də şərəfli adı yenidən özlərinə qaytarılır. Həmin hadisələr zamanı hərbiçilərin bir çoxlarının çox ağır mərhumiyyətlərə düçar olduqlarını deyən Ə.Nuriyev qeyd etdi ki, "günahlandırılan" şəxslərin xeyli hissəsi sonradan bəraət aldı, onlar hətta 44 günlük müharibədə də iştirak etdilər, şərəfli adlarını bir daha təsdiqlədilər.
Ə.Nuriyev vurğuladı ki, bu araşdırma nəticəsində əsl günahkarlar aşkarlanıb üzə çıxarılacaq: "Bir çoxları barədə artıq yetərli məlumatlar vardı. Bütün hallarda biz istintaqın nəticələrini gözləməliyik. İstintaq nəticəsində həmin şəxslərin əməlində cinayət tərkibi olması aşkarlanarsa, onlar məhkəmə qarşısına çıxarılacaq və layiqli cəzalarını da alacaqlar. Eyni zamanda bu prosesdə iftiralara, işgəncələrə məruz qalmış şəxslər tam bəraət alıblar, almaqda da davam edəcəklər. Onlara qanunvericilikdə nəzərdə tutulan bütün təzminatlar ödənilməlidir. Əlbəttə, bu təzminat onların zamanında əziyyət, işgəncə çəkdiklərini əvəzləməyəcək, eyni zamanda, o işgəncələr nətəcəsində ölən şəxsləri geri qaytarmayacaq. Əsas məsələ onların təmiz adının bərpa olunmasıdır.
Burada həmçinin başqa bir məqama da diqqət yetirməliyik. İstintaq prosesində iştirak edib qərəzli mövqe tutmuş, eyni zamanda sübutların saxtalaşdırılmasında iştirak etmiş, özlərini qeyri-obyektiv aparmış şəxslər də məsuliyyətə cəlb olunmaqda davam etməlidir. Bütövlükdə, bu prosesi quranların, onun təşkilatçılarının bir çoxu məsuliyyətə cəlb edilib. Ümid edərdim ki, sonrakı istintaqın gedişində bu şəxslər cinayət məsuliyyətinə cəlb eidlməklə öz layiqli cəzalarını alacaqlar".
Leyla QARAXANLI
