İbrahim Rüstəmli: "Yeni yaradılan platforma, yeni yanaşma tərzi bu sahədə öz müsbət bəhrəsini verəcək"
Yayğın olmasa da, müəyyən faiz insanlar var ki, ehtiyac olmadan hərbi möhlət alırlar, özlərini nəyinsə müqabilində "əsgərliyə yararsız" çıxarıb əsgəri xidmətdən yayınmaq istəyirlər.
Hətta bəziləri uzun müddətdir buna nail olur da, təbii ki, komissiya üzvlərini "görmək" şərti ilə. Amma artıq bu neqativliyə yol açan hallara son qoyulur.
Məlum olduğu kimi, Prezident İlham Əliyevin "Müddətli həqiqi hərbi xidmətə çağırılan vətəndaşların tibbi şəhadətləndirilməsi sahəsində fəaliyyətin təkmilləşdirilməsi ilə bağlı bəzi tədbirlər haqqında" 6 oktyabr 2023-cü il tarixli fərmanına əsasən, gələn il iyulun 1-dən rayon, şəhər, şəhərdə rayon çağırış komissiyaları tərəfindən müddətli həqiqi hərbi xidmətə çağırılan vətəndaşların tibbi şəhadətləndirilməsi zamanı yekun tibbi müayinəsi Əmək və Əhalinin Sosial Müdafiəsi Nazirliyi tərəfindən həyata keçiriləcək.
Müddətli həqiqi hərbi xidmətə çağırılan vətəndaşların tibbi şəhadətləndirilməsi zamanı yekun tibbi müayinəsi Əmək və Əhalinin Sosial Müdafiəsi Nazirliyi tərəfindən həyata keçirililməsinin üstünlüyü nə ola bilər? Bu, neqativlərin üzə çıxmasına nə kimi təminat verir? Ümumiyyətlə, yeni platformanın üstünlükləri nədir ki, bu daha saxta yolla hərbi xidmətdən yayınmağa imkan verməyəcək?
"...Həm xəstə şəxslərin orduya göndərilməsinin qarşısı alınacaq, həm də əsgəri xidmətə yararlı olub ordudan yayınan insanların məsələsi öz həllini tapacaq"
Hərbi ekspert İbrahim Rüstəmli "Bakı-Xəbər"ə şərhində bildirdi ki, bu olduqca aktual və vacib bir məsələdir. Prezident İlham Əliyevin bu sahədə imzaladığı sənədin böyük əhəmiyyətini vurğulayan İ.Rüstəmli hesab edir ki, yeni qaydalarla yoxlanış mütləq mənada öz müsbət bəhrəsini verəcək. "Əlbəttə, bu cür neqativ halların qarşısının alınmasına nail ola biləcəyik. Çünki bizim nail ola bilməyəcəyimiz heç nə yoxdur. Bu sahədə neqativ halların qarşının alınması Azərbaycan üçün xüsusi strateji əhəmiyyət kəsb edir. Azərbaycan dörd tərəfdən düşmənlə əhatə olunmuş bir dövlətdir, belə bir dövlətdə bu cür saxtalarlıqlara, bu cür rüşvətxorluq və neqativ hallara qətiyyən yol vermək olmaz. Çünki bu bizim gələcəyimiz üçün təhlükəlidir, gələcəyimiz üçün təhdid yaradır. Fikrimcə, müddətli həqiqi hərbi xidmətə çağırılan vətəndaşların tibbi şəhadətləndirilməsi zamanı yekun tibbi müayinəsinin Əmək və Əhalinin Sosial Müdafiəsi Nazirliyi tərəfindən həyata keçirililməsi müsbət haldır. Biz müsbət nəticəyə nail olacağıq. Bilirsiz, hər şeyin başında insan amili dayanır. Hər şey insanın əlindədir və insan istəsə çox şey edə bilər. Hesab edirəm ki, yeni yaradılan platforma, yeni yanaşma tərzi bu sahədə öz müsbət bəhrəsini verəcək. Məlumdur ki, hərbi komissarlıqlar zaman-zaman rüşvət mənbəyi olub, burada çox böyük korrupsiya halları yanaşıb. Bu cür neqativlik mövcud olduğu üçün yüzminlərlə gənc ordudan yayınıb. Çox təəssüf ki, bu hal baş verib".
İ.Rüstəmli qeyd etdi ki, artıq bu məsələyə fərqli münasibət var. O vurğuladı ki, bu reallığa uyğun fərqli münasibət nəticəsində biz 44 günlük müharibədə qalib gəldik, torpaqlarımızı düşməndən azad etdik, sabun köpüyü kimi şişirdilən Ermənistan ordusunun olmayan nüfuzunu yerdən-yerə vurduq. "Biz artıq yeni mərhələyə qədəm qoymuşuq və bu mərhələnin əsasında da insan amili, ordumuz dayanır. Biz ordumuzu gücləndirmək üçün orduya yararlı gənclərin könüllü şəkildə orduda xidmət etməsinə şərait yaratmalıyıq. Biz elə etməliyik ki, insanlar orduya getməyi özlərinin vətəndaşlıq borcu hesab etsinlər, ordudan yayınmaq fikrinə düşməsinlər. Eyni zamanda rüşvətxorluq səbəbindən bəzən xəstə, orduya yararsız şəxslər də orduya göndərilir. Hesab edirəm ki, yeni qaydaların tətbiq olunması nəticəsində həm xəstə şəxslərin orduya göndərilməsinin qarşısı alınacaq, həm də əsgəri xidmətə yararlı olub ordudan yayınan insanların məsələsi öz həllini tapacaq"-deyə qeyd edən İ.Rüstəmli vurğuladı ki, Prezident sərəncamında öz əksini tapan məsələlərin praktikada öz uğurlu həllini tapacağına və neqativlərin birdəfəlik sıradan çıxarılacağına inanır.
İradə SARIYEVA
