Məlum olduğu kimi, Azərbaycanın turizm sektoru Yeni il şənliklərinə hazırlaşır. Bölgələrdəki istirahət mərkəzləri və hotellər Yeni il proqramları və qiymətlərini açıqlamağa başlayıblar.
Sevindirici haldır ki, işğaldan azad edilən Şuşa şəhərindəki hotellərdə də bu il ilk dəfə olaraq Yeni il şənlikləri keçiriləcək. İşğaldan azad edilən ərazilərdə keçiriləcək Yeni il şənliklərinin qiyməti ölkənin digər bölgələri ilə müqayisədə qat-qat bahadır.
Turizm şirkətlərinin açıqladığı məlumata görə, "Shusha" hotelində Yeni il şənliyi böyük məbləğə başa gələcək. Yeni ili Şuşada qarşılamaq istəyənlər 2 nəfərə 2500-3500 manat sərf etməli olacaqlar.
Burada standart otaq üçün qiymət 2500 AZN-dən, Deluxe suit otaqlarda 3300 AZN-dən, Apartmant suit otaqlarda isə 3500 AZN-dən başlayacaq.
Paketə Şuşa hotelində 2 gecə 3 gün qalmaq, Yeni il şənliyi, müxtəlif musiqi və şou proqramlar, atəşfəşanlıq və s. aiddir. Elanı paylaşan şirkətlər bildirir ki, bu paketi alanların işğaldan azad olunan ərazilərə girişi üçün icazə məsələsi həll olunacaq.
Elçin Rüstəm: "Qiymət hansısa turizm şirkəti tərəfindən deyil, otel və başqa bir təşkilatçı qurum tərəfəndən həyata keçirilir"
Turizm sahəsi üzrə ekspert Elçin Rüstəm "Bakı-Xəbər"ə açıqlamasında qeyd etdi ki, məbləğ bazar qiymətinə uyğun olaraq hesablanır: "İlk olaraq qiymətin 2500-dən başlaması kimlər üçünsə böyük görünə bilər. Ancaq nəzərə almaq lazımdır ki, həm ekskluziv bir turdur, həm də əlamətdar gündür. Bundan başqa, nəinki Şuşaya, Laçına və digər ərazilərə də tur təşkil olunur. Qiymət hansısa turizm şirkəti tərəfindən deyil, otel və başqa bir təşkilatçı qurum tərəfəndən həyata keçirilir. Otellərin baha olması təşkilatçı qurumdan asılıdır. Otelin baha olması oteldə göstərilən xidmət, təşkilatçı qurum, oteldə verilən qida məhsulları, təşkil olunan ekskursiya turlarına görə hesablanır".
Aytəkin Kamranqızı: "Azərbaycan sahibkarları birdən-birə çox qazanmaq istədikləri üçün bu gün itirir"
Sosioloq Aytəkin Kamranqızı "Bakı-Xəbər"ə açıqlamasında bildirdi ki, Yeni il şənliyi üşün qiymətin 2500-3500 arasında müəyyən olunması təəssüf doğurur: "Şuşa müqəddəslik anlamı daşıyır. Şuşanın azadlığı üçün qəhrəman oğullarımız hansısa sahibkar bayramlarda 4-5 qat qazanc qazansınlar deyə canlarını fəda etməyib. Əlbəttə, sahibkar qazanmalıdır. Ancaq elə qiymət müəyyən olunmalıdır ki, orta səviyyəli büdcəyə malik ailə gedə bilsin. Təəssüf ki, Azərbaycan sahibkarları birdən-birə çox qazanmaq istədikləri üçün bu gün itirir. Bu hal həm turizm sektorunda yaşanır, həm də biznes sektorunda. Xarici ölkələrdə, elə qonşu ölkələrdə də elə qiymət təyin olunur ki, hər kəs üçün əlçətan olsun".
Günel CƏLİLOVA
