Azər Allahverənov: "Son qanun layihəsi qeyri-qanuni miqrantların həyatını çətinləşdirəcək"
Rusiyada qeyri-qanuni yaşayan miqrantlarla bağlı bir çox qadağalar tətbiq olunacaq. Belə ki, Rusiya Daxili İşlər Nazirliyi onlar üçün məhdudiyyətlər nəzərdə tutan nəzarətli qalma rejimi tətbiq etməyi təklif edib.
Lakin yeni qanun layihəsi miqrantların narazılığına səbəb olub.
Çünki onların avtomobil idarə etməsi, sürücülük vəsiqəsi alması və pul köçürməsi qadağan edilib. Qeyri-qanuni miqantlara sürücülük imtahanından keçməyə, sürücülük vəsiqəsi dəyişdirməyə, bank hesabı açmağa və nikah bağlamağa da icazə verilməyəcək.
Nəzarətli qalma rejiminin Rusiyada qalmaq üçün qanuni hüququ olmayan miqrantlara tətbiq edilməsi təklif edilir, onların müvafiq reyestrə daxil edilməsi planlaşdırılır. Nəzərə almaq lazımdır ki, rublun ucuzlaşması da oradakı vətəndaşlarımızın vəziyyətinə ciddi təsir edir. Bu qanun layihəsinin təsdiqlənməsindən sonra isə onların həyatının daha da çətinləşməsi gözlənilir.
Maraqlıdır, bu qanun layihəsinin təsdiqlənməsindən sonra azərbaycanlıların Rusiyadan "böyük köç"ü başlaya bilər?
"Bu qayda Rusiyaya axının qarşısını alacaq, təbii olaraq azərbaycanlılara da təsir edəcək"
"Avrasiya Miqrasiya Təşəbbüsləri Platforması" İctimai Birliyinin sədri Azər Allahverənov "Bakı-Xəbər"ə açıqlamasında qeyd etdi ki, Rusiya uzun muddətdir qeyri-qanuni miqrasiya ilə bağlı çox sərt qaydalar tətbiq edir. Maksimum çalışırlar ki, ölkə ərazisində qalan miqrantların sayı azalsın. Onu da deyim ki, son iki il ərzində Rusiyada miqrasiya sahəsi ilə bağlı yeni mənzərə müşahidə olunur. Rusiya-Ukrayna müharibəsinə görə çoxlu sayda yerli vətəndaş ölkə ərazisini tərk etdi və boş iş yerlərinin sayı artdı. Belə olan halda Rusiyaya gedən, çalışmaq istəyən miqrantların sayı artdı. Bu səbəbdən Rusiya hökumət nümayəndələri zamanla miqrantlarla bağlı müxtəlif təkliflər irəli sürdü, yeni qanun layihələri hazırlandı. Son qanun layihəsi isə qeyri-qanuni miqrantların həyatını çətinləşdirəcək. Belə ki, miqrantların avtomobil idarə etmək, nikah bağlamaq, pul köçürtmək kimi problemləri olacaq. Bu qadağalar əmək fəaliyyəti ilə məşğul olan miqrantlara təsir edəcək"
Həmsöhbətimiz hesab edir ki, Rusiya ərazisində qanuni əsaslarla qalmaq istəyən vətəndaşlar xüsusi dövlət reyestrinə daxil ediləcək. Bütün informasiyalar həmin reyestrdə saxlanılacaq: "Qeyri-qanuni miqrantlarla bağlı məlumatlar xüsusi dövlət reyestrinə salınacaq ki, onlarla hər hansı bir müqavilələrin bağlanması mümkün olmasın. Bu addımlar fonunda həmin kateqoriyadan olan insanlar sahibkarlıq fəaliyyətlərilə məşğul ola bilməyəcək. Onlar öz mülkiyyətlərini də qeydiyyata ala bilməz. Rejimə düşən qeyri-qanuni miqrantlar hətta nikah da bağlaya bilməyəcəklər. Bunun nəticəsində Rusiyada işləyən milyonlarla miqrantın həyatı dözülməz olacaq. Həmin qanunla üzləşənlər ölkə ərazisini tərk etmək məcburiyyətində qalacaq. Bəzi iqtisadi sahədə çalışan əcnəbilərin sayı kifayət qədər yüksəkdir. Təklif olunur ki, həmin sahədə çalışan əcnəbilərin sayı 5 faizdən yuxarı olmasın".
A.Allahverənov onu da əlavə etdi ki, bu qayda Rusiyaya axının qarşısını alacaq. Yeni qayda təbii olaraq azərbaycanlılara da təsir edəcək: "Qeyri-qanuni miqrant qismində yaşayan və ya vaxtları bitmək üzrə olan soydaşlarımız üçün bu fonda Rusiyada qalmaq olduqca çətin olacaq. Bu da müəyyən mənada geriyə axına səbəb olacaq. Düzdür, orada qeyri-qanuni əsasla yaşayan soydaşlarımızın sayı elə də çox deyil".
Günel CƏLİLOVA
