Respublikada qızılca epidemiyası ilə bağlı həyəcan artır. Xüsusən də məktəblilər arasında qızılca xəstəliyinə tutulanların sayının artması, hətta ölüm halının baş verməsi, məktəblərdən birinin distant təhsilə keçməsi narahatlığı daha da artırır.
Qrip, qızılca, su çiçəyi kimi xəstəliklər uşaqların yaxasına çökməkdədir. Ölkədə qızılca problemi ilə isə hələ ki, yalnız Elm və Təhsil Nazirliyi məşğul olur. "Qızılcanın tədris prosesinə mane olmamasına çalışırıq. Bizim üçün əsas uşaqların sağlamlığıdır. Artıq məktəblərdə uşaqların hərarəti ölçülür". Bu barədə elm və təhsil naziri Emin Əmrullayev jurnalistlərə açıqlamasında bildirib.
"Bizim indi üzləşdiyimiz vəziyyət 9-10 il əvvəl valideynlərin verdiyi qərarın nəticəsidir. Bu virusda peyvəndlənmə önəmlidir. Hazırkı rəqəmlər onu deyir ki, böyük bir pandemiya təhlükəsi yoxdur. Ayrı-ayrı yerlərdə, məktəblərdə yoluxmalar var. Başqa məktəblər və ya siniflər distant təhsilə keçirilməyib, yalnız bir məktəbdə yoluxma sayı çox olduğu üçün distant təhsilə keçilib", - deyə nazir əlavə edib.
Belə görüntü yaranıb ki, hazırda ölkədə məktəblərdə şagirdlər arasında qızılcaya qarşı mübarizə ilə ancaq Elm və Təhsil Nazirliyi məşğul olur.
Məktəblərdə qızılca ilə mübarizənin təşkili Elm və Təhsil Nazirliyinin əsas vəzifəsidir, yoxsa Səhiyyə Nazirliyi və TƏBİB-in? Elm Təhsil Nazirliyi olmazmı ki, elə elm və təhsillə məşğul olsun, bu xəstəliyə qarşı mübarizə Səhiyyə Nazirliyinin əsas fəaliyyət istiqaməti deyilmi? Bəyəm qızılca ilə mübarizənin yükünü Elm və Təhsil Nazirliyi çəkməlidir?
Sabah başqa bir sahədə xəstəlik yayılarsa, bununla mübarizəni həmin sahəyə baxan nazirlik aparası deyil ki. Ölkədə səhiyyəyə cavabdeh dövlət qurumları var. Bu işin ağırlığını Elm və Təhsil Nazirliyi deyil, Səhiyyə Nazirliyi və onun strukturları öz üzərinə götürməlidir, amma elə rəy və təəssürat yaranır ki, qızılca ilə mübarizənin bütün ağırlığı Elm və Təhsil Nazirliyinin çiynindədir. burada Səhiyyə Nazirliyi, TƏBİB görsənmir.
Ədalət Rüstəm: "Bütün dövlət qurumları qızılcaya qarşı mübarizəyə səfərbər olmalıdır"
Azərbaycan Həkimlər Birliyinin İdarə Heyətinin üzvü Ədalət Rüstəm "Bakı-Xəbər"ə şərhində bildirdi ki, hazırda ölkə ərazisində yayılan qızılca ilə mübarizədə heç bir aidiyyəti qurum yaxasını geri çəkməli deyil. O hesab edir ki, Xarici İşlər Nazirliyindən və Müdafiə Nazirliyindən başqa bütün nazirliklər, dövlət qurumları qızılca ilə mübarizədə aktiv iştirak etməlidir. "Qızılca ilə mübarizədə Səhiyyə Nazirliyi kənarda qalmamalıdır. Ölkədə iki nazirlik istisna olmaqla, Səhiyyə Nazirliyi də, TƏBİB də, Elm və Təhsil Nazirliyi də daxil olmaqla bütün dövlət qurumları qızılcaya qarşı mübarizəyə səfərbər olmalıdır. Ölkəni bu bəladan qurtarmaq üçün bütün qurumlar fəaliyyətini ortaya qoymalıdır. COVİD-19-da olduğu kimi hər kəs bu xəstəlikə mübarizədə iştirak etməlidir. Qızılca mini koviddir, ona qarşı mübarizə aparılmalıdır. Səhiyyə Nazirliyi, TƏBİB və başqa orqanlar qızılca ilə mübarizədə çox aktiv olmalıdır. Həyəcan təbili çalınmalıdır"-deyə Ə.Rüstəm qeyd etdi.
Elyar İslamoğlu: "Belə rəy formalaşıb ki, məktəblərdə qıcılca ilə mübarizəni Elm və Təhsil Nazirliyi təkbaşına aparır, Səhiyyə Nazirliyi və TƏBİB problemə reaksiya vermir"
Filologiya üzrə fəlsəfə doktoru, ictimai fəal Elyar İslamoğlu "Bakı-Xəbər"ə "Qızılca ilə bağlı söhbətlər yayıldıqdan sonra biz yalnız Elm və Təhsil Nazirliyinin panikaya düşdüyünü, bu qurumun məktəblərdə tədbirlər görməyə çalışdığını görürük. Bir sözlə, cəmiyyətdə belə rəy formalaşıb ki, məktəblərdə qıcılca ilə mübarizəni Elm və Təhsil Nazirliyi təkbaşına aparır, Səhiyyə Nazirliyi və TƏBİB problemə reaksiya vermir. Təəssüflər olsun ki, biz Səhiyyə Nazirliyi və TƏBİB-in qızılca ilə bağlı hansısa geniş açıqlamasına, maarifləndirici tədbirlərinə rast gəlməmişik. Halbuki, istənilən yoluxucu xəstəliklərlə bağlı ilk növbədə Səhiyyə Nazirliyi və TƏBİB açıqlama verməlidir, mübarizə tədbirləri həyata keçirməlidir"-deyə qeyd etdi.
E.İslamoğlu qeyd etdi ki, ölkədə həm Səhiyyə Nazirliyi var, həm də TƏBİB, TƏBİB-in yaradıması ikitirəlik yaradıb. Alim bildirdi ki, ciddi bir problem olanda Səhiyyə Nazirliyi məsuliyyəti TƏBİB-in üzərinə atır, TƏBİB də Səhiyyə Nazirliyinin günahkar olduğunu deyir. O hesab edir ki, TƏBİB-lə nazirlik birləşdirilsə yaxşı olar, heç olmasa məsuliyyəti bir qurum daşıyar. "Qızılca çox qorxulu xəstəlik sayılır. Biz hamımız uşaq vaxtı qızılca keçirmişik, amma valideynlər arasında bu qədər təşviş yox idi, həkimə müraciət etmədən evdə uşaqlarını özləri müalicə edib sağaldırdılar. Uşaqlar on-on beş günün içində sağalıb ayağa dururdular. İndiyə qədər qızılcadan üç uşağın öldüyü açıqlanıb. Görünür ki, uşaqların immuniteti zəifdir. Uşaqların immunitetinin zəifləməsində qida məhsullarının keyfiyyətsiz olmasının, onların günəş altında az gəzməsinin, ev tapşırıqları ilə yüklənmələrinin də təsiri az deyil. Düşünürəm ki, Səhiyyə Nazirliyi və TƏBİB təxirəsalınmaz işlər görməlidir. Çünki artıq üç uşağın bu xəstəlikdən ölməsi kiçik göstərici deyil, nəzərə alsaq ki, ölkəmiz tibb sahəsində inkiaf etmiş ölkələrdəndir. Düzdür, bizdə səhiyyə sahəsində müəyyən çatışmazlıqlar, dərmanların keyfiyyətində problemlər var, səhiyyədə rüşvət var, dərman monopolyası mövcuddur. Amma bunlara baxmayaraq, bizim ölkəmiz səhiyyə sahəsində irəlidədir. XXI əsrdə bir şagirdin qızılcadan həyatını itirməsi yaxşı hal deyil. Yəqin ki, Səhiyyə Nazirliyi və TƏBİB qısa müddət ərazində öz vəzifələrinin öhtəsindən gəlməyə başlayacaqlar. Ola bilsin, Səhiyyə Nazirliyi və TƏBİB gözləyir ki, cənab Prezident qızılca məsələsini də nəzarətə götürsün, bundan sonra hərəkətə keçsin. Təcrübə göstərir ki, hansısa bir sahədəki problemi cənab Prezident nəzarətə götürən kimi nazirliklər əl-ayağa düşür. Əgər bu məsələni də cənab Prezident nəzarətə götürəcəksə, onda Səhiyyə Nazirliyi və TƏBİB nə üçündür? Ümid edirəm ki, ictimai rəydən nəticə çıxarıb qısa müddət ərzində məktəblərdə şagirdlərin qızılcadan qorunması istiqamətində mübarizə tədbirləri görərlər"-deyə E.İslamoğlu qeyd etdi.
Əli TURABOV
