Nadim Əliyev: "Son vaxtlar dələduzlar bank kartlarını yox, bankların mobil tətbiqlərini oğurlayır"
Məlum olduğu kimi, Daxili İşlər Nazirliyi (DİN) kibertalamaya və kiberdələduzluğa qarşı növbəti maarifləndirici videoçarx hazırlayıb. Videoçarxda qeyd edilir ki, kart məlumatları yalnız kartın sahibinə təqdim olunur və tam məxfi saxlanılması zəruridir:
"Özünüzü dələduzlardan qoruyun. Heç bir halda bank və şəxsi məlumatlarınızı digərlərinə təqdim etməyin. Kartdan-karta pul vəsaitlərinin köçürülməsi üçün bank kartının önündəki 16 rəqəm kifayət edir. CVV kod və digər məlumatların məxfiliyini qorumaq vətəndaşın öhdəliyidir. DİN vətəndaşları ayıq-sayıq olub bu kimi detallara diqqət etməyə çağırır".
Qeyd edək ki, son zamanlar kart dələduzlarının artdığının şahidi oluruq.
"Şəxs öz istəyi ilə kodu vermədiyi halda onun kartından pul silinə bilməz, banklar vətəndaşa mesajla xəbərdarlıq edir, kod səhv yığıldıqda kartı bloklayır"
İKT sahəsi üzrə ekspert Nadim Əliyev "Bakı-Xəbər"ə açıqlamasında qeyd etdi ki, son vaxtlar dələduzlar bank kartlarını yox, bankların mobil tətbiqlərini oğurlayırlar. İnsanlara bununla bağlı təhlükəsizlik kodu göndərilir. Şəxsiyyət vəsiqəsinin FİN-i əldə olunaraq bank kartlarının hamısına birdən daxil olurlar. Bir kartı götürüb oradakı məlumatlarla bank tətbiqinə daxil olub digər kartlara keçid edirlər. Beləliklə, mobil tətbiqi oğurlayırlar deyə, həmin banka bağlı olan bütün kartları idarə edə bilirlər.
Ekspert xüsusi olaraq bildirdi ki, vətəndaşlar şəxsi kodlarını üçüncü tərəflə paylaşmamalıdır: "Vətəndaşlar şəxsiyyət vəsiqələrinin FİN kodlarını, mesajla gələn təhlükəsizlik kodlarını heç kimə verməli deyillər. Çünki FİN kodla da bankın mobil tətbiqlərində qeydiyyatdan keçmək olur. Qeydiyyatdan keçəndə 3D kod göndərilir. O kodu da adətən vətəndaşlardan istəyirlər. Onları necəsə aldadıb ələ keçirirlər".
Ekspert onu da əlavə etdi ki, son 2-3 ildir bank kartlarına qarşı dələduzluq halları çoxalıb. Bu problemlə mübarizə aparmaq üçün banklar da sistemlərini təkmilləşdirib: "Şəxs öz istəyi ilə kodu vermədiyi halda onun kartından pul silinə bilməz. Banklar vətəndaşa mesajla xəbərdarlıq edir, kod səhv yığıldıqda kartı bloklayır, zəng edib soruşur ki, əməliyyatı edən sizsiniz? 3D kod olmadan həyata keçirilən əməliyyatlarda müəyyən limitlər qoyur. Vətəndaş özü məlumatlarını verirsə, artıq bank sistemi onu tuta bilmir, vətəndaşın etdiyi əməliyyat kimi qəbul edir. Bankın məsuliyyəti yalnız vətəndaşa xəbərdarlıq etməkdir".
Günel CƏLİLOVA
