Könül Həsənova: "Bu cür dərmanlar insanı özündən asılı vəziyyətə salaraq çox böyük fəsadlara gətirib çıxarır"
Artıq çəkisindən can qurtarmaq istəyən, bunun üçün böyük əziyyətlərə qatlanan bir çox insan var. Onlara verilən tövsiyələrin də sayı-hesabı yoxdur. Lakin bir də medalın digər tərəfi var.
Çəki itirmək istəyənlərdən əlavə, bir də min bir əziyyətlə kökəlməyə çalışan insanlar var. Bəzi işbazlar sosial şəbəkə vasitəsilə kökəldici dərmanların piarını aparır. Beləliklə, qısa müddətdə kökəlmək istəyənlər həmin dərmanlardan istifadə etməli olur. O dərmanlardan biri də "Samyun Wan" adlı preparatdır.
Adıçəkilən dərmanın ziyanlı olması barədə Azərbaycan Qida Təhlükəsizliyi Agentliyi (AQTA) məlumat yayıb. Məlumatda qeyd edilir ki, "Samyun Wan" preparatlarının tərkibində bioloji aktiv qida məhsullarına xas olmayan və insan sağlamlığı üçün təhlükəli hesab olunan kənar kimyəvi maddə aşkar edilib: "Qeyd edək ki, həmin məhsulun istehsalında istifadəsi qadağan edilən bu yad kimyəvi maddə insan həyat və sağlamlığına mənfi təsirlər göstərərək ciddi fəsadlar törədə bilir. Onu da bildiririk ki, ölkəmizə qanunsuz yollarla gətirilən "Samyun Wan" preparatı bioloji aktiv qida məhsulu deyil və Agentlik bu cür halların qarşısının alınması istiqamətində müvafiq tədbirlər həyata keçirir".
"Arıqlamağa və kökəlməyə kömək etdiyi iddia olunan bu preparatlar insan səhhəti üçün təhlükəlidir"
Dietoloq Könül Həsənova "Bakı-Xəbər"ə açıqlamasında qeyd etdi ki, arıqlamağa və kökəlməyə kömək etdiyi iddia olunan bu preparatlar insan səhhəti üçün təhlükəlidir. Çünki bu tip dərmanların tərkibində narkotik mənşəli və ağır qatqılı zəhərlər var: "Bu cür dərmanlar insanı özündən asılı vəziyyətə salaraq çox böyük fəsadlara gətirib çıxarır. Qara ciyərə, mədəaltı vəziyə dağıdıcı zərbə vurur, xərçəng xəstəliyinə meylliliyi aktivləşdirir. Kişilər və qadınlarda sonsuzluq, kişilərdə cinsi zəiflik yaradır, həmçinin qadınlarda süd vəzi xərçənginə səbəb olur. Əgər nəsildə genetik olaraq hansısa bir xəstəliyə, xüsusilə onkoloji xəstəliklərə meyllilik varsa, artıq orqanizmdə xəstəliyə olan meylin güclənməsi və zamanla özünü bəlli etməsi böyük ehtimaldır. 35 yaşından sonra belə dərmanlardan istifadə etdikdə kalsium bədəndən sovrulub çıxır və dayaq-hərəkət aparatının sümük sisteminə ziyan verir".
Günel CƏLİLOVA
