"Dəfn üçün müavinətin məbləği pensiyaçı şəxslər üçün 840 manat, pensiyaçı olmayanlar üçün 500 manatdır. Bu da sosial sığorta prinsiplərindən irəli gələrək müəyyən edilmiş məsələdir. Bu rəqəmlər 8 dəfəyə qədər artırılıb".
Bunu əmək və əhalinin sosial müdafiəsi naziri Sahil Babayev Milli Məclisin Əmək və sosial siyasət komitəsinin iclasında deyib.
Qeyd edək ki, dəfn üçün müavinətin məbləği zamanla artaraq 840 manat olub. Pensiyaçı olmayanlar üçün isə 500 manat müəyyən olunub.
Qanunvericiliyə görə, dəfn üçün müavinət birdəfəlik müavinət növü olmaqla, sığortaolunan, əmək pensiyaçısı və ya dövlət qulluqçularına ömürlük müavinət, yaşa görə müavinət, əlilliyə görə müavinət və ailə başçısını itirməyə görə müavinət alan, habelə işsizlikdən sığorta ödənişini alan şəxslər vəfat etdikdə təyin olunur və dəfn xərcini çəkən şəxsə ödənilir. Müavinətin məbləği pensiya alan şəxs vəfat etdikdə minimum əmək pensiyasının 3 misli, yəni hazırda 840 manat, ömürlük müavinət alan dövlət qulluqçuları, yaşa, əlilliyə və ailə başçısını itirməyə görə müavinət alanlar, sığortaolunan və işsizlikdən sığorta ödənişi alan şəxslər vəfat etdikdə isə 500 manat təşkil edir.
Vəfat etmiş şəxs eyni zamanda həm sığortaolunan, həm də əmək pensiyaçısı olduqda, dəfn üçün müavinətin biri - məbləği daha çox olan, yəni minimum əmək pensiyasının 3 misli (840 manat) qədər müavinət ödənilir.
İşləməyən, pensiya və sosial müavinət, eləcə də işsizlikdən sığorta ödənişi almayan şəxs vəfat etdikdə dəfn üçün müavinət verilməsi qanunvericilikdə nəzərdə tutulmayıb.
Maraqlı məqam ondan ibarətdir ki, hazırki məqamda müəyyən edilən müavinət dəfn xərclərini, xüsusilə basdırılma xərclərini ödəməyə kifayət edirmi?
Fuad İbrahimli: "Dəfn üçün müəyyən edilən müavinətin məbləği yetərli deyil"
Iqtisadçı ekspert Fuad İbrahimli "Bakı-Xəbər"ə açıqlamasında qeyd etdi ki, dəfn üçün müəyyən edilən müavinətin məbləği yetərli deyil: "Dəfn pulunun miqdarı artırılsa da, yenə də azdır. Bir insanın dəfni üçün nə qədər vəsait lazımdır, ona görə də bu vəsaitin qaldırılması ilə bağlı addımlar atılmalıdır".
Həmsöhbətimiz onu da əlavə etdi ki, dəfn xərclərinin artıq olmasında vətəndaşların özlərinin rolu var. İnsanlar izafi xərclər edir ki, sonrasını düşünmür: "Bu gün yaslarda israfçılıq baş alıb gedir. Mərasimlərin təşkili dinə uyğun deyil. Yəni din yas mərasimlərində israfçılığı, bahalı materiallardan qəbir daşlarının hazırlanması qəbul etmir. Sırf dini qaydalara əməl olunsa, mən hesab edirəm, məbləğ xeyli azala bilər. Amma bu gün dini qaydalara əməl olunmadığına görə problem yaşanır. İnsanlarımız buna əməl etsəydilər, bu gün vəziyyət bir az fərqli olardı".
Dövlət Sosial Müdafiə Fondu: "Cari ilin 9 ayı ərzində ölkə üzrə 34 min 300 nəfərdən çox şəxsə dəfnə görə müavinət verilib"
Dövlət Sosial Müdafiə Fondundan bildirildi ki, cari ilin 9 ayı ərzində ölkə üzrə 34 min 300 nəfərdən çox şəxsə dəfnə görə müavinət verilib: "Dəfn üçün birdəfəlik müavinət dəfn xərcini çəkən şəxsə təyin olunur. Bunun üçün dəfn xərcini çəkən şəxsin şəxsiyyət vəsiqəsi, ərazi üzrə bələdiyyə və ya yerli icra hakimiyyəti başçısının inzibati ərazi dairələri üzrə və ya sahə inzibati ərazi dairələri üzrə nümayəndələr tərəfindən verilən dəfn xərcinin çəkilməsinə dair arayış, Azərbaycan Respublikası Ədliyyə Nazirliyinin rayon (şəhər) qeydiyyat şöbəsinin arayışı tələb olunur. Əgər vəfat edən şəxs pensiyaçı və müavinət alan olubsa, dəfn xərcini çəkən şəxs həmin sənədlərlə Dövlət Sosial Müdafiə Fondunun rayon (şəhər) filiallarına, qəbul şöbələrinə, yaxud istənilən DOST mərkəzlərinə, işləyən şəxs olubsa, işəgötürən təşkilata, yəni vəfat edən şəxsin iş yerinə müraciət etməlidir. Dəfn xərcini çəkən şəxsə təyin olunan birdəfəlik müavinətin ödənişi müvafiq bank vasitəsilə həyata keçirilir".
Günel CƏLİLOVA
