Vətən sevgisi Vüsal Kazımovun canına, qanına elə hopmuşdu ki, İkinci Qarabağ müharibəsi başlanan andan onun harayına birinci səs verib.
Döyüşən cəbhədə əlinə silah alıb, 30 il cənnət-məkan yurd yerimiz olan Qarabağı əsir edən erməni dığalarla döyüşə girib. Baş leytenant odun-alovun içində misilsiz qəhrəmanlıq örnəyi göstərməklə Füzulinin, Cəbrayılın, Xocavəndin azadlığı uğrunda yağıya qan qusdurub. Onun ən ağır savaşı Şuşa naminə olub. Son damla qanına qədər vuruşub. Ölümə meydan oxuyan Vətən sevdalısı düşmən gülləsinə müharibə meydanında tuş gəlib. Bir müddət sonra doğulduğu Lənkəran rayonu, Yuxarı Nüvədi kəndində əbədi məkan tapıb...
Şəhid Vüsalı Kazımovun canından artıq sevdiyi torpağa tapşırılan gündən üç il ötdü. Bu münasibətlə təşkil olunan anım mərasimində bütün Lənkəran camaatı iştirak etdi. Qəhrəman şəhidin məzarı ziyarət olundu, önünə gül dəstələri düzüldü.
Lənkəran Şəhər İcra Hakimiyyətinin başçısı Taleh Qaraşov bir daha şəhid ailənin qayğı və problemlərini öyrənib və dedi: - Azərbaycan xalqını zəfərə aparan Vüsal Kazımov kimi igidlər cismən aramızdan getsələr də, illər, qərinələr boyunca onların xatirələri hər zaman ehtiramla xatırlanacaq. Vüsal indi nəinki doğmaları üçün bütün Vətən üçün əzizdir. Ölkə Prezidenti, Ali Baş Komandan İlham Əliyevin rəhbərliyi altında xalqımız tam qələbəyə nail oldu. 30 ilə qədər düşmən tapdağında qalan Qarabağ torpaqları işğaldan azad edildi. Şəhidlərin intiqamı kimi indi Xankəndində 3 rəngli bayrağımız dalğalanır. Bundan sonra da şəhid ailələri daim dövlətin diqqətində olacaq, xalq tərəfindən onlara ehtiram, məhəbbət heç vaxt əskilməyəcək.
Onu da bildirək ki, 1990-ci ildə Lənkəranın, Yuxarı Nüvədi kəndində dünyaya göz açan Vüsal Kazımov Lənkəran şəhər Uşaq Poliklinikasında psixi sağlamlıq bölməsində müalicəvi bədən tərbiyəsi üzrə təlimatçı, daha sonra şəhər Gənclər və İdman İdarəsinin nəzdində Uşaq-Gənclər İdman Mərkəzində direktor vəzifəsində çalışıb. İki ali savad almışdı. Hər şeydən Vətənini əziz tutan igid Vüsalın yarımçıq qalan arzularını cücərdəcək iki qız övladı- Nuray və Aynur bizlərə əmanət qalıb. Həmçinin şəhid baş leytenant ölümündən sonra 3-cü dərəcəli "Vətənə xidmətə görə" ordeni, "Vətən uğrunda", "İgidliyə görə", Xocavəndin və Füzulinin azadlığı uğrunda medalları ilə təltif edilib.
Zəfər ORUCOĞLUAzərbaycan Jurnalistlər Birliyinin üzvü
