Barəsində yazdığım insan el-oba içində kifayət qədər tanınan, xeyirxah işləri ilə çoxlarına nümunə olan, səmimi dost, zəhmətkeş ailə başçısı, əsil ziyalı Nəcməddin Mürvətovdur.
Nəcməddin müəllim, eyni zamanda gözəl pedaqoq, daima təhsildə yenilik axtaran və onu tətbiq edən təcrübəli, intellektual biliyə malik olan və sadəliyi ilə fərqlənən bir insandır.
Əməkdar müəllim, "Tərəqqi" medallı, tanınmış şair Nəcməddin Mürvətov uzun illərdir ki, Siyəzən şəhəri, Cəfər Cabbarlı adına 1 saylı tam orta məktəbə rəhbərlik edir. Onun yüksək təşkilatçılıq və idarəçilik bacarığı, fədakar əməyi sayəsində məktəb bir çox uğurlara imza atmışdır.
Ulu Öndərimiz Heydər Əliyev demişdir: "Rəhbərlik etmək, adamları öyrətmək və tərbiyələndirmək üçün gərək mənəvi haqqın olsun".
Nəcməddin müəllim rəhbərlik etməyə mənəvi haqqı və təcrübəsi olan şəxsiyyətlərdəndir.
Nəcməddin müəllim kimi, bütün təhsil ocaqları və digər təşkilatlar tərəfindən verilən tapşırıqları vaxtında, tam dəqiqliklə yerinə yetirən ikinci bir direktor təsəvvürümə gətirə bilmirəm. O, həm də tanınmış şair kimi neçə-neçə kitabın müəllifidir. 2016-cı ildən "Cabir Novruz" Mədəniyyət Fondunun vitse-prezidentidir. Dəfələrlə rəhbərlik etdiyi məktəbdə şeir gecəsi, viktorinalar, hətta tanınmış şairlərlə görüşlər keçirilib. Xalq şairi Cabir Novruzun 85 illiyi, Mikayıl Müşfiqin 110 illiyi, yazıçı-dramaturq Seyfəddin Dağlının 100 illiyi və digər mədəniyyət və incəsənət xadimlərinin yubileyləri onun rəhbərlik etdiyi məktəbdə keçirilmişdir.
Ömrünün 70-ci zirvəsinə çatan Nəcməddin müəllim çevrilib arxaya baxanda həyatını mənalı, sevimli baba, gözəl ailə başçısı kimi xatırlayacaq. Xeyirxahlıq, düzlük Nəcməddin müəllimin ömrünün bəzəyidir.
O, Azərbaycan Yazıçılar və Jurnalistlər Birliklərinin üzvü kimi 2019-cu ildə qələmə aldığı on səkkizinci "İnsanlıq" - bir ömür öyrəndiyim fənn kitabında "Hərəyə bir ömür" şeirindən bir neçə bənd şeiri ilə bitirirəm.
Günlər ötüb gedir səssiz, səmirsiz,
Qəlpələr qoparır bir-bir ömürdən.
Dünya təknəsini qoymur xəmirsiz,
Zamanı dəyirman, bizdən ömür-dən.
Gəlmişik dünyaya yaşayaq, köçək
Taleli, qismətli bir ömür payı.
Yox da ki, ixtiyar biz ondan seçək,
Yaxşını götürüb, tullayaq zayı.
Anadan olmasının 70, əmək fəaliyyətinin 50 illiyi münasibətilə gözəl insan, səmimi dost, təcrübəli pedaqoq, Əməkdar müəllim, "Tərəqqi" medallı, Azərbaycan Yazıçılar və Jurnalistlər Birliklərinin üzvü, "Cabir Novruz" Mədəniyyət Fondunun vitse-prezidenti Nəcməddin Tacı oğlu Mürvətovu səmimi qəlbdən təbrik edir, uzun ömür, cansağlığı, işlərində uğurlar arzulayıram.
Cavanşir Qurbanov Yasamal rayon Ağsaqqallar şurasının sədri, "Cabir Novruz" Mədəniyyət Fondunun prezidenti, professor
