İlhami Cəfərsoy: "Böyük inamım vardı ki, Prezient mütləq belə bir Sərəncam imzalayacaq"
Prezident İlham Əliyev "Qarabağ Universiteti"nin yaradılması haqqında" Sərəncam imzalayıb.
Sərəncama əsasən, Xankəndi şəhərində yerləşən ali təhsil müəssisəsinin əsasında Azərbaycan Respublikası Elm və Təhsil Nazirliyinin tabeliyində "Qarabağ Universiteti" publik hüquqi şəxs yaradılır.
Nazirlər Kabinetinə iki ay müddətində Qarabağ Universitetinin nizamnaməsini təsdiq etmək və bu barədə Azərbaycan Respublikasının Prezidentinə məlumat vermək tapşırılıb. Nazirlər Kabineti, həmçinin universitetin fəaliyyətinin maliyyələşdirilməsi ilə bağlı zəruri tədbirlər görəcək, universitetin Xankəndi şəhərində torpaq sahəsi, tədris və yataqxana binaları, idman meydançası və digər infrastruktur obyektləri ilə təminatı məsələlərini həll edəcək.
Sərəncamda qeyd olunur ki, Azərbaycan Prezidentinin 2022-ci il 16 noyabr tarixli Sərəncamı ilə təsdiq edilmiş "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı"na uyğun olaraq, işğaldan azad olunmuş ərazilərin yenidən qurulması, dayanıqlı inkişafı və həmin ərazilərdə yüksək həyat səviyyəsinin təminatı üçün genişmiqyaslı bərpa-quruculuq işləri həyata keçirilir.
Əhalinin dayanıqlı məskunlaşması və ərazilərin iqtisadi fəaliyyətə reinteqrasiyası istiqamətində müəyyənləşdirilmiş hədəflərin reallaşdırılmasında nəzərdə tutulan müasir yanaşmalar, o cümlədən qabaqcıl standartların, yüksək texnologiyaların tətbiqi və hər bir rayonun ixtisaslaşma sahəsinə müvafiq inkişafı yüksəkixtisaslı kadrların cəlb edilməsini şərtləndirir.
Qarabağ regionunda ali təhsil ənənəsi tarixən mövcud olub. Burada ilk ali təhsil ocağı 1969-cu ildə Azərbaycan Pedaqoji İnstitutunun filialı kimi qurulub, 1973-cü ildən 1988-ci ilədək ali təhsil müəssisəsi kimi fəaliyyət göstərib, ərazilərimizin işğalı dövründə isə fəaliyyətini dayandırıb.
İşğaldan azad edilmiş ərazilərin iqtisadi potensialı, aparılan bərpa-quruculuq işləri, eləcə də əmək bazarının tələbləri regionda yüksəkixtisaslı kadrların hazırlığını həyata keçirən ali təhsil müəssisəsinin təşkili zərurətini meydana çıxarıb.
"Bu böyük tarixi hadisələrdən biridir və bu günü 30 il gözləmişik"
Xankəndi Pedaqoji İnstitutunun sabiq kafedra müdiri, AMEA Dilçilik İnstitutu Qədim Dillər və Mədəniyyətlər şöbəsinin müdiri, filologiya elmlər doktoru İlhami Cəfərsoy "Bakı-Xəbər"ə bildirdi ki, Prezident İlham Əliyevin "Qarabağ Universiteti"nin yaradılması ilə bağlı imzaladığı sərəncamı yüksək qiymətləndirir və bu sərəncamın imzalandığı tarix onun üçün çox əzizdir. "Əvvəl təyinatla Xankəndi Pedaqoji İnstitutunda müəllim işlədim. Sonra ermənilər "Arsaq" barədə "ApKom" partiyada məsələ qaldırdılar və mən "Arsaq" haqda məqalə çap etdirdim, onda partiya töhməti verib məni işdən çıxarmaq istəyirdilər. Şuşanın birinci katibi rəhmətlik Qəşəm Aslanov məni Şuşaya çağırdı, məktəbli gənclər şöbəsinin müdiri qoydu. Sonra institut Şuşaya köçəndə kafedra müdiri oldum. Xankəndi Pedaqoji İnstitutunun Dilçilik və Dil Tədrisi metodikası kafedrasının müdiri vəzifəsində işlədim. Biz ordan çıxanda kafedra müdiri idim...
Prezidentin bu sərəncamını 30 il gözləmişdim. Bu xəbəri eşidəndən sevincimdən ayağım yerdən üzülüb. Mən AMEA-nın Dilçilik İnstitutunda tutduğum vəzifədən istefa verib ora getmək, "Qarabağ Universiteti"ndə işləmək istəyirəm.
Anadan olduğum gün, balalarımın ad günləri, başqa hadisələr heç biri mənə bu qədər təsir etməyib. 30 il həsrətində qaldığım yerlərə qayıtmaq çox xoş olar. Mən də, dostlarım da həmişə arzulayırdıq ki, Qarabağ alınsın, Şuşadan, o hündür yerdən aşağıya - Xankəndiyə baxaq. O günü arzulayan dostlarımın, iş yoldaşlarımın bəziləri indi sağdır. Böyük inamım vardı ki, Prezident mütləq belə bir Sərəncam imzalayacaq. Prezidentə ömür boyu minnətdarıq ki, o sərəncamı verdi. Akademiyada bu sərəncam çox yüksək dəyərləndirilir. Əslən Şuşadan, Xankəndidən, Xocalıdan olmayan alimlər də deyirlər ki, biz ora gedib "Qarabağ Universiteti"ndə işləmək istəyirik. Mən Şuşaya, evimə qayıtmağa ərizə vermişəm, ancaq desələr ki, Xankəndidə yaşa, orada işlə, böyük məmnuniyyətlə razı olaram. Şuşada yaşayıb Xankəndidə işləməyə də razıyam, arası 15 dəqiqə yoldur. Mən qədim erməni dili üzrə mütəxəssisəm. Hələ Sovet dönəmində ermənilərlə vuruşa-vuruşa Urartu üzrə namizədlik dissertasiyası yazmışam, təsdiq ediblər. Ermənilərə göz dağı vermək üçün bizim ora qayıtmağımız, universitetimizin fəaliyyət göstərməsi, bölgə üçün peşəkar kadrlar yetişdirməyimiz mütləq vacibdir. Arzum budur ki, bu universitetdə yeni kafedra yaradılsın. Bir halda ki, Prezidentimiz Qazaxıstandan başlamış Türkiyəyə qədər Turan yolunun açılması ideyasının rəhbərlərindən biridir, biz "Qarabağ universiteti"ndə Turanşünaslıq kafedrası yaradaq".
Vaxtilə Matenadaranda, Tiflisdə, Macarıstanda, Polşanın Krakov şəhərində işlədiyini deyən İ.Cəfərsoy vurğuladı ki, çoxlu materiallar toplayıb. İ.Cəfərsoy qeyd etdi ki, bu universietdə gənclərə təhsil verilməsi, regionun əmək bazarına uyğun kadrların hazırlanması ilə yanaşı Turan ideyasının, türk birliyinin inkişafına da töhfə verilməlidir, bu yöndə tələb olunan materialın 60-70 faizi hazırdır.
İ.Cəfərsoyun sözlərinə görə, bu universitetin yaradılması böyük tarixi hadisədir: "Bu, böyük tarixi hadisələrdən biridir və bu günü 30 il həsrətlə gözlədim..."
İradə SARIYEVA
