Neftçala rayonunun Bankə qəsəbəsində şəhid anasına qarşı baş verən quldurluq hadisəsi sosial şəbəkələrdə ciddi şəkildə müzakirə edilir. Həm fiziki, həm də mənəvi cinayəti törədən şəxsə qarşı sərt cəza tədbirinin seçilməli olduğu deyilir.
Yayılan məlumata görə, Bankə qəsəbəsində yaşayan şəhid anası İlşad Kəlbiyevanı evinə axşam saatlarında daxil olan cinayətkar tənha yaşayan vətəndaşı hədələyərək onun 800 manat pulunu alıb. Quldurluq edən şəxs naməlum istiqamətdən həyətə və oradan evə daxil olub. Üzündə maska olan şəxs ananı bıçaqla hədələyərək pulunu alıb. Hadisə ilə bağlı Neftçala Polis İdarəsinə müraciət edilib. Məsələ ilə əlaqədar Daxili İşlər Nazirliyinin Mətbuat Xidmətinin Şirvan regional qrupunun rəhbəri, baş inspektor, polis mayoru Nizam Həmidovun sözlərinə görə, sözügedən cinayət işi ilə əlaqədar olaraq Neftçala rayon Polis Şöbəsində cinayət işi açılıb. Qeyd edək ki, İlşad Kəlbiyeva Vətən müharibəsi şəhidi Telman Kəlbiyevin anasıdır. Şəhid anası pensiyasından qənaət edib yığdığı pulu şəhid oğlunun ildönümünü qeyd etmək üçün saxlayıbmış.
Telman Kəlbiyev öz ailəsini, anasını cəmiyyətə etibar edib canını vətən yolunda fəda edib. Çox təəssüf ki, yaşadığımız cəmiyyətdə şəhid anasına bıçaq çəkəcək, şəhidin ehsan puluna göz dikəcək dərəcədə alçalmış və vicdan hissini itirmişlər də var. Şəhidin evini necə qarət etmək olar? O, canını Vətən yolunda qoyub, ailəsini cəmiyyətə etibar edib, amma kimsə onun anım günü üçün yığılan pulu oğurlayıb
Şəhidin evini qarət edən oğruya hansı cəza verilməlidir ki, bu bir dərs olsun?
Elyar İslamoğlu: "Şəhid evinə uzanan əl dərhal qırılmalıdır"
Filologiya üzrə fəlsəfə doktoru Elyar İslamoğlu "Bakı-Xəbər"ə şərhində "Bu hadisə barədə sosial şəbəkələrdə oxudum. Dərhal şəhid Telman Kəlbiyevin həyat yoldaşı ilə əlaqə saxladım, baş vermiş hadisənin detallarını öyrəndim. Ailə çox pərişan və məyusdur. Hadisə gecə olub. Şəhid anasının 72 yaşı var. Şəhidimizin xanımı da hərbiçidir, iki övladı ilə birlikdə Bakıda yaşayır. Anaya nə qədər israr etsələr də Bakıya gəlməyib, rayondakı evdə oğlunun xatirələri ilə yaşayacağını, orada qalanda oğlunun məzarını da tez-tez ziyarət edə bildiyini deyib.
Div cüssəli igid Telman Kəlbiyev yeddi bacının yeganə qardaşı idi. "Onun sağlığında qapımıza heç kim pis niyyətlə yaxınlaşa bilməzdi. İndi bizi sahibsiz görüblər, dünən gecə evə maskalı şəxs girib, şəhidin anasına bıçaq çəkib evdəki pulu aparıblar. Anam şəhid üçün verilən təqaüdü toplayaraq Telmanın ildönümünə hazırlaşırdı. Heç olmasa qapımızdakı bayraqdan utanardılar. Telman anasını, bacılarını, həyat yoldaşını, övladlarını gözü yaşlı qoydu, bizi Azərbaycan xalqına əmanət edib döyüşə getdi" deyir şəhidin xanımı.
Təəssüf ki, şəhid əmanətlərinə sahib çıxa bilmirik. Artıq neçənci şəhid ailəsidir ki, evindən, çantasından oğurluq edilir.
Cəzalar sərtləşdirilməlidir. Şəhid evinə uzanan əl dərhal qırılmalıdır. Bu qəhrəman igidlər ailələrini xalqa, dövlətə əmanət edib. Əmanətə sahib çıxılmalıdır. Yüzlərlə tənha şəhid anası var. Bu hadisə həmin analara çox böyük zərbə oldu. Tənha anaların təhlükəsizliyi təmin olunmalıdır" - deyə bildirdi.
E.İslamoğlu onu da qeyd etdi ki, şəhid Telman Kəlbiyevin anası kimi analar çoxdur, onlar övladlarının məzarına yaxın olmaq, qəbrini tez-tez ziyarət etmək üçün tənha yaşamağa üstünlük verirlər.
E.İslamoğlunun sözlərinə görə, bu gün Telmanın anasının boğazına bıçaq dirənməsi həm də cəmiyyətin günühıdır ki, biz şəhidlərin əmanətinə sahib çıxa bilmirik: "Halbuki, biz şəhidləri dəfn edəndə onlara söz vermişdik ki, ailələriniz bizə əmanətdir. Amma təəssüflər olsun ki, nə aidiyyəti qurumlar, nə də cəmiyyət lazımı şəkildə şəhid ailəsinə sahib çıxa bilir..."
E.İslamoğlu qeyd etdi ki, Ağstafada, Mingəçevirdə də analoji hadisə baş verib. Müsahibimiz bir daha qeyd etdi ki, cəmiyyət şəhid ailəsinə sahib çıxmalıdır. O, həmçinin "bu cür hadisələrə görə hətta ömürlük həbs cəzası verilməlidir ki, digərilərinə də dərs olsun" - dedi.
Əziz Qəmbərov: "Ona ən böyük cəza mənəvi cəza olmalıdır"
Hüquqşünas, tanınmış vəkil Əziz Qəmbərov da "Bakı-Xəbər"ə müsahibəsində baş verən olayı təəssüflə qarşıladı. "Oğurlanan vəsait məbləğindən və iştirakçıların sayından aslı olaraq qanunla müəyyən edilmiş cəza dəyişir. 177.1. Oğurluq, yəni özgənin əmlakını gizli olaraq talama-
üç yüz altmış saatdan dörd yüz səksən saatadək ictimai işlər və ya iki ilədək müddətə islah işləri və ya iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır. Bu, qanunla müəyyən edilmiş cəzadır. Minimum və maksimumu nəzərdə tutulur.
Deyərdim ki ona ən böyük cəza mənəvi cəza olmalıdır. Beləsinin ətrafında olan insanlar ondan uzaq durmalı və ona adi salam da verməməlidir Ancaq məncə, bu mənəvi cəza da ona təsir etməz. Mənəviyatı olan şəhid ailəsindən oğurluq etməz, ən azından utanar...Belələri mənəvi cəhətdən aşınmış adamlardır" - deyə Ə.Qəmbərov əlavə etdi.
İradə SARIYEVA
