Aytəkin Kamranqızı: "Təlimlər keçirilən zaman müəllimlərin əmək hüququ kobud şəkildə pozulur"
Məlum olduğu kimi, digər peşə sahibləri kimi müəllimlər də ixtisasartırma təlimlərində iştirak edir. Ancaq pedaqoqların hər biri ixtisasartırma təlimlərindən razı qalmır.
Son zamanlar müəllimlərin bir qismi Elm və Təhsil Nazirliyi (ETN) tərəfindən təşkil edilən ixtisasartırma təlimlərindən narazıdır. Onların narazılığına səbəb ixtisasartırma təlimlərinin keçirildiyi günlə bağlıdır: "Həftənin beş günü işdəyik, altıncı və bazar günləri də təlimə yazıblar. Saat 14:00-da keçirilən təlimdə iştirak edəcək müəllimləri məcburi səhər məktəbə çağırırlar və imzanı saat 13:00-da çəkdirirlər. Kənddə işləyən müəllimlər də hər dəfə şəhərə təlimə getmək üçün öz ciblərindən 25-30 manat xərcləyirlər. Bundan əlavə, saat 1-dən 6-dək təlimdə otururlar. Burada hansı effektivlikdən söz gedə bilər? Heç olmasa, təlimin müddəti 1-2 saat olsun. Bu müəllimlərin ailəsi, uşağı yoxdur? Kimlərsə pul qazanacaq deyə müəllimlər istismar olumalıdır?"
"Istirahət günü müəllimləri təlim adı ilə şəxsi işlərindən ayırıb saatlarla orda saxlamaq düzgün deyil"
Məsələ ilə bağlı fikir bildirən sosioloq Aytəkin Kamranqızı "Bakı-Xəbər"ə açıqlamasında qeyd etdi ki, ixtisasartırma təhsili əlavə təhsilin bir istiqamətidir: "Bu, dövlət sənədi olan kadrların fasiləsiz təhsil almaq imkanını təmin etmək məqsədi ilə əlavə təhsil müəssisələri tərəfindən həyata keçirilən bir təhsil növüdür. Bu metod ümumi təhsil və ilk peşə-ixtisas təhsili müəssisələrinin pedaqoji və digər işçilərinin bilik, bacarıq və peşəkarlıq səviyyələrinin, dünyagörüşlərinin inkişaf etdirilməsinə daha mütərəqqi üsullarla nail olmaq məqsədilə yaradılır. Bu xidmət nəticəsində respublikanın ümumtəhsil məktəblərində çalışan müəllimlər öz biliklərindən xəbərdar olmaqla yanaşı, eyni zamanda, yüksək əmək haqlarına da nail olurlar. Təlimlər keçirilən zaman müəllimlərin vəziyyətini nəzərə almaq lazımdır. Son zamanlar bu mövzu ilə bağlı şikayətlərin sayı artıb. Hazırda təlimlər keçirilən zaman müəllimlərin əmək hüququ kobud şəkildə pozulur. Qeyri-iş saatlarında, yaxud iş saatlarında müəllimlər ixtisasartırma kurslarına göndərilir. Təlimlərdə keyfiyyət olmadığına görə müəllimlər həm vaxtlarını, həm də pullarını itirir".
Ekspert onu da əlavə etdi ki, təlimlər dövlət büdcəsi hesabına həyata keçirilsə də, arzuolunan nəticə əldə olunmur. Təlim elə keçirilməlidir ki, müəllimin nə işinə, nə də şəxsi həyatına təsir etsin: "Məlum, şənbə-bazar istirahət günüdür. Istirahət günü müəllimləri təlim adı ilə şəxsi işlərindən ayırıb saatlarla orda saxlamaq düzgün deyil. Yaxşı olar ki, təlimlər zamanı müəllimlər bir neçə günlük və ya bir ay tədris prosesindən ayrılsın".
Günel CƏLİLOVA
