Eyyub Hüseynov: "Dağ suyu, mineral su adı altında satılan suların tərkibi araşdırılmalıdır"
Son günlər sosial platformada satışa çıxarılan suların əhaliyə verilən su xətlərindən doldurularaq sexlərdə qablaşdırıldığına dair məlumatlar yayılır. Sosial şəbəkələrdə yayılan bir videodan isə hətta məşhur brendlərin belə müştərilərə təklif etdiyi suyun bulaq və dağ suyu olmadığı bəlli olur.
Belə ki, paytaxt sakini "Slavyanka", "Sirab", "Bonaqua" kimi suların keyfiyyətini xüsusi cihazla yoxlayıb və bu prosesi videoya çəkib. Məlum olub ki, bu suların bəzilərini içmək olduqca təhlükəlidir.
"İçməli su istehsalı ilə məşğul olan sexlər Bakıda "krantdan" gələn xlorlu suyu qablaşdıraraq dağ suyu, mineral su adı altında satışa çıxarırlar"
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında qeyd etdi ki, içməli su istehsalı ilə məşğul olan sexlər Bakıda "krantdan" gələn xlorlu suyu qablaşdıraraq dağ suyu, mineral su adı altında satışa çıxardırlar: "Qablaşdırılmış suların bir litrini 0,90-1 manata satışa çıxardırlar. Bu, istehlakçını aldatmaqdır. Hər bir brend suyun saxta variantları da var. Çünki istehlakçı onun saxta olduğunu müəyyən edə bilmir. Qablaşdırılmış sular istehsal olunan zaman onun tərkibinə adi xlorlu su qatılır, yaxud da mərkəzləşmiş sudan istifadə etməklə satışa çıxardılır. AQTA məsələ sosial şəbəkələrdə ictimailəşdikdən sonra yoxlama aparsa da, indiyədək su sexləri bu qanunsuzluqlara yol veriblər. Çox yaxşı olardı ki, AQTA bütün su istehsalı ilə məşğul olan sexlərdə ekspertiza aparsın. Suyun tərkibinin etiketlərindəki məlumatların düz gəlib-gəlmədiyini araşdırsın. AQTA-nın yoxlaması zamanı suyun mənbəyi, sanitar vəziyyət və tərkibinin etiketlə uyğunluğu araşdırılıb. Bu isə çox vacib məsələdir. Yoxlama zamanı üzə çıxır ki, dağ suyu, mineral su adı altında satılan suların tərkibi nədir. İllərdir etiketlə istehlakçıların aldadılması halları baş verir. Buna son qoyulmalıdır. Əksər hallarda malların tərkibi ilə etiket məlumatları düz gəlmir".
Ekspert onu da əlavə etdi ki, malların üzərində insanlara çağırış edilməsi qadağan olunmalıdır: "Qida və ərzaq mallarının üzərində "ekoloji təmiz", yaxud filan xəstəliyin dərmanıdır və s. kimi çağırışlara son qoyulmalıdır. Bu, istehlakçıların aldadılmasıdır. Etiketdə müəyyən çağırış etmək üçün o mal eksperimentdən keçirilməli, laboratoriyalarda yoxlanmalı və cavabdeh institutlar tərəfindən icazə verilməlidir. 1995-ci ildə qəbul edilmiş "Ərzaq Məhsulları Haqqında" Qanunda göstərilir ki, malların üzərində belə yazılar yalnız müvafiq icra hakimiyyəti orqanlarının icazəsi ilə olmalıdır".
Günel CƏLİLOVA
