İlahiyyatçı Hacı Təyyar Hüseynlinin "Ginekoloji və estetik əməliyyat zamanı qadın kişi həkimlə siğə etdirməlidir" açıqlaması ictimaiyyətdə müzakirəyə səbəb olub. Bu fikirlərlə razışlaşmayan kəsim ilahiyyatçıya bu fikirlərinə görə sosial şəbəkələrdə tənqid və təhqirlər yağdırıb.
Bu azmış kimi, ilahiyyatçı növbəti dəfə açıqlama verərək, ümumiyyətlə kişi və qadınların, harada olmasından aslı olmayaraq, bir yerə düşərlərsə siğə etdirməli olduqlarını deyib:"Evli xanımlar bu cür tibbi proseslərdən öncə həkimlə dini cəhətdən müqavilə bağlamalıdır ki, kişi həkimin qadına toxunması günah sayılmasın. Bu tələb dini cəhətdən vacib sayılır. Bu cinsi məsələ deyil, qarşılıqlı müqavilə məsələsidir. Bu, ilahi qadağanın tənzimləmə məsələsidir. Qadınlar qadın həkimlərə müraciət etsin, kişilər kişi həkimə. Bu daha rahat olar... "
Aytəkin Kamranqızı: "Biz hansı əsrdə, hansı ölkədə yaşayırıq ki, siğədən danışırıq?"
Sosioloq Aytəkin Kamranqızı "Bakı-Xəbər" ə açıqlamasında qeyd etdi ki, həkim-xəstə münasibəti hər kəsə bəllidir: "Belə bir fikri səsləndirən şəxsin psixi problemi var. Gün ərzində həkim neçə xəstə qəbul edir, müayinə edir. Məlumat üçün deyim ki, "Quran"da heç bir yerdə siğə anlayışı yoxdur. Bu, qonşu ölkələrdə uydurulmuş, İslama calaq edilmiş, fahişəliyin dini vacibat olduğunu təbliğ etmək üçün düşünülmüş gedişlərdən biridir. Siğə mollaların, dinçi kütlənin kütləvi əxlaqsızlığının ört-basdır edilməsi üçün nəzərdə tutulub".
Həmsöhbətimiz onu da əlavə etdi ki, son zamanlar bir qisim şəxslər gündəmdə qalmaq üçün bilərəkdən cəmiyyəti qıcıqlandıran ifadələr işlədir: "Ötən ay bir psixoloq xanım emosianal ehtiyacı ödəməyən kişinin boşanmasından danışdı. İndi də bir molla siğəni təbliğ edir. Siğənin təbliği açıq-aşkar fahişəliyi təbliğ etmək deməkdir. Bunu deyənlər bilməlidir ki, bu kimi fikirlər cəmiyyəti məhvə aparır. Biz hansı əsrdə, hansı ölkədə yaşayırıq ki, siğədən danışırıq? Bu sözü işlədən şəxs qınanmalıdır"
Hacı Nizami Rza: "Həkimliyin yerinə yetirilməsində naməhrəmlik anlayışı yoxdur"
İlahiyyatçının məlum fikri ilə bağlı rəy bildirən dinşünas Hacı Nizami Rza bildirdi ki, məlum fikirləri söyləyən adam Azərbaycanda İranın "əldəqayırma ayətullahlarının" qulbeçəsidir. Yeri isə azadlıq deyil: "Bu kimi İslami qaydalara zidd fikirləri din pərdəsi altında ortaya çıxanlar səsləndirir. Belə bir şey qəti olaraq yoxdur. Bunun adı şirkdir. Heç kəsə islami təlimatlara özündən nəsə əlavə etməyə icazə verilmir. Həkimin, qarşısındakının cinsiyyətindən asılı olmayaraq, vəzifə borcu var. Həkimliyin yerinə yetirilməsində naməhrəmlik anlayışı yoxdur. Naməhrəmlik evdə, küçədə, iş yerində, ictimai yerdə ola bilər. Ancaq həkim-pasiyent münasibətində belə bir anlayış yoxdur".
Günel CƏLİLOVA
