Son illərdə Prezident İlham Əliyevin rəhbərliyi altında aparılan abadlıq və quruculuq işləri cənub mirvarisi olan Lənkəran sakinlərini ürəkdən sevindirir. Lakin ölkəmiz inkişaf etsə də, rayonun əhalisi bir sıra problemlə üz-üzə qalır.
Bunlardan biri də burada yararsız yolların çoxluğudur. Yəni şəhərin özündə dağılıb pis günə qalan küçələr, rayonun qəsəbə və kəndlərində uzun müddət təmiri yada düşməyən dərmə-deşik yollar adamları bezar edib. Dinamik inkişafda olan bir respublikanın cənub mirvarisi sayılan Lənkəranda belə acınacaqlı vəziyyətin hökm sürməsi yalnız yerli məmurların insanların həyat tərzinə biganə münasibətindən irəli gəlir. Həmçinin indiki tərəqqi zamanında vətəndaşın şəhərin mərkəzində rezin çəkmələrdə gəzməyi vəzifə başında duranların tam fəaliyyətsizliyi ilə bağlıdır. Ölkə rəhbəri gecə-gündüz çalışır insanlar daha rahat, firavan yaşasınlar, lənkəranlıların taleyinə məsul məmurlar isə yalnız öz rahatlığını düşünür...
Rayonda Tükəvilə, Ləj, Yuxarı Nüvədi kənd yollarında artıq hərəkət etmək böyük əzab-əziyyətə səbəb olur. Dağılıb sıradan çıxmış, hətta keçilməz hala düşmüş yolların ciddi təmirə ehtiyacı var. Qaldı ki, bu işləri görməyə məsul olan aidiyyəti qurumlar yalan vədlər verməklə yollarda illərin yaratdığı çuxurlara daha bir çuxur qatırlar. Yuxarı Nüvədi camaatı çoxdan yolların toz-torpağından, palçığından gileyli olsalar da, hələ ki, onların səsinə səs verən tapılmır. Çala-çuxur yolların əziyyəti şəxsi avtomobilləri demirəm, ictimai nəqliyyatın xidmətini də yox dərəcəsinə salır. Hətta uşaqların məktəbə getməyi artıq ciddi problemdir.
Yuxarı Nüvədidə olduğu kimi, Ləj kəndinin camaatı da uzun illərdir keçilməz yolların əzab-əziyyətini çəkirlər. Eləcə özləri ilə bərabər, bu səbəbdən halal zəhmətlə aldıqları vtomobilləri də tez-tez sıradan çıxır. İctimai nəqliyyat, taksilər bu yolu getmək istəmir. Çünki bir dəfə yolu getməklə dağılırlar. İşdir, kəndin xəstəsi olanda, onu vaxtında ünvana çatdırmaq müşkülə dönür. Uzun illərdir Tükəvilə kənd sakinlərin də yol sarıdan bəxtləri gətirmir. Artıq dərmə-deşik, çoxdan ömrünü başa vuran kənd yolu heç cür tələbatı ödəmir.
Zəfər ORUCOĞLU Azərbaycan Jurnalistlər Birliyinin üzvü
