Kamran Əsədov: "Güzəştlərin 35 yaşa qədər nəzərdə tutulması müəyyən narazılıqlar doğurur, amma…"
Ölkədə son illərdə müəllimlərin işə qəbulu, onların sosial problemlərinin həlli istiqamətində mühüm addımlar atılıb. Bir çox yerlərdə müəllimləri cəlb etmək üçün həvəsləndirmə (H1,H2) tətbiq edilir. Qeyd edək ki, həvəsləndirmə rayon mərkəzindən 3 km-dən artıq məsafədə yerləşən kənd məktəbləri üçün nəzərdə tutulub. Həvəsləndirmənin 2 istiqaməti var: H1 və H2.
Məlumat üçün bildirək ki, H1-rayon mərkəzindən 3 km-dən 20 km-ə, H2 isə 20 km-dən artıq məsafədə yerləşən kənd məktəbləri üçün nəzərdə tutulub. Əgər gənc müəllim MİQ müsabiqəsində iştirak edib H1 və ya H2 tətbiq olunan hər hansı məktəbə müddətsiz müqavilə əsasında işə qəbul olunubsa və yaşı 35-dən çox deyilsə, seçdiyi vakant yerdə tətbiq olunan həvəsləndirmədən asılı olaraq hər ay əmək haqqına H1-60 manat, H2-160 manat əlavə olunur.
Maraqlıdır, müavinətlərin 35 yaş həddinin olmağı və 5 ildən sonra kəsilməyinin səbəbi nədir?
Təhsil eksperti Kamran Əsədov "Bakı-Xəbər"ə açıqlamasında bildirdi ki, son 5 ildə Azərbaycanda 18 136 müəllim işə qəbul olunub. Bu müddətdə 142 mindən çox müəllimin diaqnostik qiymətləndirilməsi başa çatdırılıb. Onların həftəlik dərs yükü 1,5 dəfə, vəzifə maaşı 2 dəfə artırılıb.12 minə yaxın müəllim üçün müxtəlif həvəsləndirmə tədbirləri tətbiq olunub.
Ekspertin sözlərinə görə, ucqar kənd məktəblərində əmək fəaliyyətinə başlayan və 3 il müddətində bu fəaliyyəti həmin məktəbdə davam etdirən gənc mütəxəssislərə bir sıra həvəsləndirmə tədbirləri tətbiq olunur: "Müəllimlərə yol, əmlakın daşınması üçün nəqliyyat xərci, ilkin yaşayış şəraitinin yaradılması məqsədilə əməkhaqqının 2 misli həcmində birdəfəlik yardım, 3 il müddətində kommunal xidmətlərini ödəmək üçün 40 manat məbləğində kompensasiya verilir. Rayon mərkəzindən 20 km-dən artıq məsafədə yerləşən kənd məktəbində əmək fəaliyyətinə başlayan və 3 il müddətində bu fəaliyyəti həmin məktəbdə davam etdirən gənc mütəxəssislərin əməkhaqqına sadalanan həvəsləndirmə tədbirləri ilə yanaşı, hər ay 70 manat əlavə olunur. Mövcud qanunvericilik aktları gənc müəllimlərə geniş imkanlar versə də, təəssüf ki, yerli icra hakimiyyəti orqanları və bələdiyyələr gənc müəllimlərin yaşayış sahələrinə ehtiyaclarının ödənilməsinə, daimi məskunlaşmaq üçün torpaq sahələri ayrılmasına və ipoteka kreditlərinin verilməsinə köməklik göstərmirlər. Son illər qeyd olunan məsələlərlə bağlı müraciətlərin çox az qisminə müsbət cavab verilib".
Həmsöhbətimiz hesab edir ki, yaş həddinin 35-dən yuxarı qaldırılmasına ehtiyac yoxdur: "Əlbəttə, güzəştlərin 35 yaşa qədər nəzərdə tutulması müəyyən narazılıqlar doğurur. Amma mən hesab edirəm ki, bunun yuxarı yaş həddinə qaldırılmasına ehtiyac yoxdur. Çünki 35 yaşına qədər ancaq sosial yardımlara meyl edənlər şəxsi inkişafdan geri qalacaqlar. Özləri fərdi inkişafda maraqlı olmayacaqlar".
Günel CƏLİLOVA
