Bu il ÇED-in təşkilatçılığı ilə Kıbrıs 8-ci Uluslararası Şeir və Musiqi festivalı Türkiyə Cümhuriyyətinin 100 illiyinə həsr edilmişdir.
Azərbayçan bu dəfə də geniş heyətlə (24.10.2023-31.10.2023) coşquyla,sayğıyla, dolu ürəkləriylə hər kəsin diqqətini çəkdi. Mən bu festivala ilk dəfə qatıldığım üçün artıq illərin qardaşılarına çevrilmiş qırğız, özbək, qazax, tatar, İraq kərkük qardaşlarımızın bir-birinə sarlaraq sevgiylə görüşməsi ilk dəqiqələrdən məni xoş hisslərə bürüdü. Bir həftə ərzində yaşanan gözəl günləri, təqdimatları tezis şəklində diqqətinizə çatdırmaq istərdim.
24.10.2023. Azərbaycandan gələn heyət İstanbulda qarşılandıqdan sonra axşam yemək masası ətrafında Avcılar Bələdiyyə başqanı bir qrup heyətlə bir araya gəldi. Azərbaycan heyətinin rəhbəri şair, yazar İlqar Türkoğlu festivala qatılan bütün iştirakçılar adından təşəkkür etdi. Azərbaycandan gələn şairlər Cümhuriyyətin 100-cü ildönümünə və Qazi Mustafa Kamal Atatürkə, eyni zamanda Qarabağa həsr olunmuş şeirlərini oxudular. Uzun illərdir Bursada yaşayan həmyerlimiz şair Hüseyn Gözəloğlu tarı sinəsinə basaraq Çırpınırdı Qara dəniz mahnısıyla gecəmizi coşdurdu. Eyni gündə bizimlə festivala qatılmaq üçün Qırğızıstandan və Özbəkistandan gələn bir neçə yaradıcı dostlarımız da bizmlə bərabər şeir deyib rəqs etdilər. Gecənin sonunda Azərbaycan heyətinin rəhbəri İlqar Türkoğlu Bələdiyyə başqanı Turan Hancarlıya, Yusuf Uzun və hər zaman ürəyi bizlərlə döyünən şair, yazar İsmaıl Hakkı Bağdata Cumhuriyyətin 100 illiyi münasibəti ilə təsis olunmuş medallarlı və hədiyyələri təqdim etdi. Gecə İlqar Türkoğlunun Türkiyə şeiri ilə başa çatdı.
TÜRKİYƏ
Atatürküm-böyük türkün ad-sanı,
Savaşların, hünərlərin dastanı.
Ulusumun tarixini yaz, tanı,
Bir yol gedir dünya boyda bir köyə
Sən and yerim, ümid yerim, Türkiyə!
Qüdrətlidi, şöhrətlidi əzəlin,
Dayağındı yüz ulusun, yüz elin.
Qutlu olsun, bu möhtəşəm "100" ilin,
Bələnmisən milyon-milyon sevgiyə.
Haray çəkdi səfi bəlli ərənlər,
Sinəsini düşmənlərə gərənlər.
Öpmək istər hilalımı görənlər,
Səmalarda dalğalandı hürr deyə.
Ayrı düşdük, çox qatdılar aranı,
Dur ayağa, özün sarı yaranı.
Quracaqsan bu gün-sabah Turanı,
Göylər oğlu, var ulduza, var göyə
Yerə dayaq, göyə dayaq Türkiyə!
Türk oğlunun hər məqamda üzü bir,
Ocağı bir, alovu bir, közü bir.
Amalı bir, əməli bir sözü bir,
Bir kök üstə ucalmışıq biz göyə,
Atatürkdən əmanətsən bizlərə,
İşığından nur ələnir gözlərə.
"Çanaqqalam, salam olsun sizlərə"!
İgidlərin savaşlarda bərkiyər.
Türkoğluyam, yaranışdan var adım,
Tariximi vərəq-vərəq aradım.
Müqəddəsdir Turan-arzum, muradım,
Çox az qalıb Təbrizimi görməyə.
26.10.23 Bütün festivala qatılan türk qardaşlarımızla artıq Kıbrısda görüşdük. İllərdir bu festivalın təşkilatçısı və təbliğatçısı şair, yazar Halise Tekbaş başda olmaqla sevgiylə qarşılandıq. 27.10.2023 tarixində KKTC (Kuzey Kıbrıs Türk Cumhuriyyəti) Başbakanı Ünal Üstelle əyləşdiyi iqamətgahında görüş keçirildi. Başbakan hər kəsi sevgiylə, sayğıyla salamladı. Kıbrısın keçmişindən müstəqilliyə gedən yolda qanıyla, canıyla silaha sarılaraq son damla qanlarıyla vuruşan şəhidləri xatırlatdı. Hörmətli Başbakan Azərbaycan heyətini Qarabağın işğaldan azad olması münasibəti ilə təbrik edərək yaxınlarda Azərbaycandakı səfər təəssüratlarını da qeyd etdi.
Bir neçə gün davam edən səfərdə şeir, musiqi dinlənildi, kitab təqdimatları keçirildi. Həmyerlimiz rəssam Sehranın rəsm sərgisi, tədqiqatçı jurnalist Böyükağa Mikayıllının “Dünyanın Kıbrısı, Kıbrısın dünyası” kitabının təqdimatı heç həsi biganə qoymadı.
Festivalımızın son gecəsi ‘’29 Ekim Türk Cumhuriyyətinin 100 cü yılı’’ kutlaması” keçirildi. Bir çox iştirakçılarımız “Əmir Teymur nişanı”, “Turan Birliyi medalı” və “Atatürk medalı” ilə təltif olundu. Mənim kiçik zəhmətimə verilən böyük qiymət yaddaşımda nə qədər yaşasam o qədər qürurla anacağım gün oldu. Azərbaycanın və Türkiyənin ortaq dəyəri həmyerlimiz rəssam İbrahim Safiyə həsr etdiyim “Rəngləri danışdıran adam” kitabım Atatürk medalına layiq görüldü.
Jalə Cəfərova
Filologiya üzrə fəlsəfə doktoru, araşdırmaçı jurnalist
PS… Bu ölkəyə ilk səfərim idi. Kıbrısı gəzərkən, ən çox da şəhid qanı tökülmüş məkanları ziyarət edərkən sanki qanları torpağa qarışaraq indi hər il ordan al-əlvan boy göstərən çiçəkləri müqəddəs ruhlar hesab edib əyilərək qoxlayıb bağrıma basırdım. Mənə elə gəldi, yox əminəm ki Kıbrısdakı şəhid ruhlar baş qaldırıb Qarabağımızı azad edən şəhid qardaşlarına salam verirdi. Səni çox, həm də çox sevdim, döyüşkən ruhlu, hər qarışında isti, sevgi dolu nəfəsini duyduğum Kıprısım.
