Xəbər verildiyi kimi, oktyabrın 27-də Daxili İşlər Nazirliyində narkotik vasitələrin, psixotrop maddələrin və onların prekursorlarının qanunsuz dövriyyəsinin, yol hərəkəti təhlükəsizliyinin təmin edilməsinin, şəhər, rayon polis orqanlarında vətəndaşların müraciətlərinə baxılması və qəbulu işinin vəziyyətinə, eləcə də cari ilin 9 ayının yekunlarının müzakirəsinə həsr olunmuş onlayn formatda Kollegiya iclası keçirilib.
Kollegiya iclasında daxili işlər naziri general-polkovnik Vilayət Eyvazov bir sıra məsələlərə toxunub. Nazir qeyd edib ki, ölkədə narkotiklərin qanunsuz dövriyyəsinə qarşı mübarizə tədbirləri də nəzarətdə saxlanılıb. Qanunsuz dövriyyədən ötən ilin müvafiq dövrü ilə müqayisədə 1 ton 19 kiloqram çox – yəni 4 ton 18 kiloqram narkotik vasitə və 343 kiloqram psixotrop maddə çıxarılıb, 244 nəfərdən ibarət 110 cinayətkar qrup zərərsizləşdirilib və bu cinayətlərə görə ümumilikdə 6.344 nəfər məhkəmə məsuliyyətinə verilib. Antinarkotik təbliğat sahəsində işlər də davamlı olmaqla təhsil müəssisələrində 1.028 maarifləndirmə tədbiri keçirilib.
Ümumilikdə, qanunsuz dövriyyədən çıxarılan narkotiklərin miqdarının artması bu, təbii ki, özlüyündə narkotiklərlə mübarizə işinin genişləndirilməsinin, gücləndirilməsinin nəticəsidir. Bu, birmənalıdır. İkincisi, ehtimal da etmək olar ki, xüsusilə İranın xüsusi xidmət orqanlarının təsiri və təşkilatçılığı ilə Azərbaycana qanunsuz dövriyyəyə narkotik vasitələrin soxulması miqdarı da artıb. Bunu da ehtimal etmək olar. Ən nəhayət 110 dəstənin zərərsizləşdirilməsi. Əgər, bu, 110 dəstə zərərsizləşdirilməsəydi və qalıb fəaliyyət göstərsəydi, Allah bilir nələr olacaqdı. Sadalanan bu 3 istiqamətdə görülən işlərin əhəmiyyətini ekspertlər necə dəyərləndirir?
Sözügedən məsələ ilə bağlı baki-xeber.com-a açıqlama verən hüquqşünas Şəmsəddin Əliyev görülən işlərlə bağlı bir sıra məqamlara toxundu: “Bütövlükdə, ölkədə cinayətkarlıqla mübarizə konseptual xarakter daşıyır. Heç nə yaddan çıxmır, heç kim də burada kənarda qalmır. Təbii ki, bütün dövrlərdə cinayətkar aləm kənardan dövlətin daxilində nələr baş verdiyini çox şəffaf şəkildə görə bilir. Mütəşəkkil cinayətkar dəstələrin zərərsizləşdirilməsinin özü DİN üçün hər zaman prioritet məsələlərdən biri olub. Həm məxfi şəbəkə ilə işləmək, həm cəmiyyətlə polis arasında münasibətlərin normal məcraya yönəlməsi narkotik vasitələrin qanunsuz dövriyyəsinə qarşı mübarizənin peşəkarlıqla aparılmasına zəmin yaradır. Bu da effektiv nəticələrin əldə olunmasına müsbət təsir edir. Məsələ ondadır ki, ərazilərimiz işğal altında olanda Ermənistan və İran üçün orada mütəşəkkil cinayətkarlığın xüsusi növlərindən olan narkotik vasitələrin qanunsuz dövriyyəsi ilə bağlı şərait yaranmışdı. Narkotik vasitələr İrandan Qarabağa, oradan Ermənistana və daha sonra dünyaya daşınırdı. Çünki İran-Azərbaycan sərhədinin 132 kilometri işğal altında idi. Nəticədə narkotik vasitələrin qanunsuz dövriyyəsindən əldə olunan gəlir terror qruplarının maliyyələşməsinə sərf olunurdu. Təbii ki, qonşu İranın xüsusi xidmət orqanlarının himayəsi olmadan bu, mümkün deyildi. Ərazilərin işğaldan azad edilməsi və ən nəhayət Xankəndiyə nəzarətin bərpa olunması narkoşəbəkənin belini qırdı. Həmin ərazilərdə nə qədər qanunsuz narkotik aşkar olunaraq dövriyyədən çıxarılıb. Ötən illə müqayisədə 1 tondan artıq narkotik vasitənin dövriyyədən çıxarılması həm də bu amillə əlaqədardır. Bununla yanaşı, son 3 il ərzində narkotik vasitələrin qanunsuz dövriyyəsinə qarşı bir cəbhə açılıb. Prinsipiallıqla bu mübarizə davam etdirilir. Daxili işlər naziri general-polkovnik Vilayət Eyvazovun da söylədiyi kimi, burada zərrə qədər də olsun geriyə, kənara çəkilmə halları yoxdur. DİN bütün vasitələrlə buna qarşı mübarizə aparır. Yeri gəlmişkən, cinayətkarlıqla mübarizədə insan hüquq və azadlıqları, vətəndaşların həyat və sağlamlığı prioritet təşkil edir. Ümumilikdə, cinayətlərin dinamikasında narkotik vasitələrlə bağlı faktlar daha çoxdur. Ötən hesabat dövrü ilə müqayisədə narkotik maddələrlə bağlı faktlar daha çoxdur. Faktlar onu göstərir ki, İran vətəndaşları qanunsuz narkotik dövriyyəsi ilə daha çox məşğul olur. İran tərəfinə sorğular göndərilir ki, həmin cinayətkarlar ekstradisiya edilsin. Ancaq bununla bağlı məktubların çox cüzi hissəsi cavablandırılır. İran və Ermənistan narkotik vasitələrin qanunsuz dövriyyəsi ilə bağlı beynəlxalq konvensiyalara qoşulub. Ancaq çox təəssüf ki, bu dövlətlərin heç biri transmilli cinayətkarlığın bu növü ilə mübarizədə bizim kimi səmərə əldə etmir. Deməyim odur ki, bazar hələ bağlanmayıb. Azərbaycan polisi tərəfindən narkoticarətlə məşğul olan mütəşəkkil dəstələrin sıradan çıxarılması da mübarizədə mühüm rol oynayıb. Əgər həmin dəstələr sıradan çıxarılmasaydı, o zaman çox ciddi bəlalarla üz-üzə qala bilərdik. Bir sözlə, polisin bu yöndə fəaliyyəti böyükdür”.
Vidadi ORDAHALLI
