Ceyhun Səfərov və Vidadi Cabbarov dağlar diyarı Lerikdə doğulub boya-başa çatıblar. Onlar minlərlə Azərbaycanın qeyrətli oğulları kimi İkinci Qarabağ müharibəsində Vətənin müqəddəsliyini hər şeydən üstün tutmaqla bu yolda canlarından keçiblər.
Şərəfli ölümü ilə qəhrəmanlıq salnaməsi yazaraq xalqımıza qələbə sevinci yaşadan bu igidlər bununla da əbədi bir ömür qazanıblar. Adları yeni tariximizə yazılan Ceyhun və Vidadi ilə indi bütün Azərbaycan qürur hiss keçirir, onların örnək həyatını nümunə göstərirlər. Vətən qarşısında xüsusi xidmətləri olan, hər zaman xalqın qəhrəmanlıq simvolu kimi xatırlanan bu, igidlərin adlarını özündə yaşadan Lerikdə çoxlu yadigarlar yaradılıb.
Qısa ömür yolları xalqına, el-obaya təmənnasız xidmətlə ölçülən hər iki Vətən sevdalısı üçüncü ildir əbədiyyət adlı dünyasına qovuşub. Necə deyərlər, cismən aramızda olmasalar da, mənən yerləri ürəyimizin başıdır. Ceyhuna, Vidadiyə doğma kəndlərində keçirilən anım mərasimlərində bir daha bunun şahidi olduq.
Hər iki şəhidin anım mərasımində Lerik Rayon İcra Hakimiyyətinin başçısı Əkbər Abbasov, hüquq-mühafizə orqanları, idarə, müəssisə, təşkilat rəhbərləri, ictimaiyyət nümayəndələri, kənd sakinləri və şəhidlərin ailə üzvləri öz qəhrəman oğulların məzarları önünə gül çiçək dəstələri düzərək, əziz xatirələrini ehtiramla andılar. Həmçinin çıxışlar zamanı bildirildi ki, Lerikin qartalları Şanlı ordumuzun sıralarında Vətən torpaqlarının yağı düşməndən təmizlənməsi uğrunda gedən döyüşlərdə Azərbaycanın müqəddəsliyinə tapınmaqla, onun yolunda şəhid olmağı özlərinə şərəf bildilər. Fəqət, öz qanı bahasına torpağı Vətən edən Ceyhun, Vidadi kimi qəhrəmanlar dünya durduqca duracaqlar...
Ömrünün 25-ci ilində Vətənin yaşaması naminə özünü qurban verən Ceyhun Akif oğlu Səfərov Lerik rayonu, Cənginəvud kəndində anadan olub. Sentyabrın 27-də İkinci Qarabağ müharibəsi başlananda Ceyhun könüllü cəbhəyə yollanıb. Füzuli, Cəbrayıl, Zəngilan uğrunda gedən ölüm-dirim müharibə meydanlarında böyük şücaət göstərib. Düşmənə sarsıdıcı zərbələr vurmaqla onun xeyli sayda canlı qüvvəsini, texnikasını məhv edib. Cəbrayıl istiqamətində gedən şiddətli döyüşlərdə qəhrəmancasına şəhidlik zirvəsinə ucalıb. İndi uyuduğu torpaq kənd sakinləri üçün ən müqəddəs yerdir. Özündən sonra daha bir yadigarı Azərbaycan Prezidenti İlham Əliyevin Sərəncamına əsasən layiq görüldüyü "Vətən uğrunda", “Cəbrayılın azad olunmasına görə" medallarıdır.
Vətən fədaisı Vidadi Cəbrayıl oğlu Cabbarov 1997-ci ildə Lerikin Piran kəndində dünyaya göz açıb. İkinci Qarabağ müharibəsinin ilk günü silahlanıb odlu-alovlu səngərə atılıb. Erməni dığalarına qarşı haqq savaşımızda rəşadət göstərərək, onlara layiqli cavab verib. Düşmənin ilan başını əzə-əzə Füzulidən başlanan çətin, şərəfli döyüş yolu onu Qubadlıya qədər aparıb. Qubadlı rayonunun azadlığı uğrunda haqq savaşımızda igid gizir yağının atdığı mərmi qəlpəsindən dünyasını dəyişib. Ölümündən sonra “Vətən uğrunda”, Cəbrayılın və Qubadlının azad olmasına görə medallarına layiq görülüb.
Zəfər ORUCOĞLU Azərbaycan Jurnalistlər Birliyinin üzvü
