Şəhidlər əbədi dirilər mərtəbəsində dayanır və onlar hər zaman yaşayırlar. 10 il bundan əvvəl şəhid olan gizir Aydın Abdullayev də heç zaman yaddan çıxmayan qərəmanlarımızdandır. Özü Vətən torpağının bir parçasına çevrilsə də, izi, xatirəsi onu diri saxlayır.
Oktyabrın 26-sı Tərtərin Qapanlı kəndi ərazisində şəhid olan kəşfiyatçı-snayper, gizir Aydın Əmirsoltan oğlu Abdullayevin anım günüdür. 2013-cü ilin 26 oktyabrında, yəni 10 il bundan əvvəl şəhidlik zirvəsinə ucalan Aydın Abdullayevin xatirəsi həm ailəsi, həm də onu tanıyanlar tərəfindən əziz tutulur. Hər il şəhidin anım günü ilə bağlı ailəsinin, yaxınlarının, Suraxanı Rayon ictimaiyyətinin iştirakı ilə yığıncaq keçirilir.
Şəhid gizir Aydın Abdullayevin anım günü münasibətilə Azərbaycan Respublikası Mədəniyyət Nazirliyinin Respublika Xatirə Kitabı Redaksiyasının baş redaktoru Nəzakət Məmmədova şəhidin ailəsində olub, kəşfiyyatçı-snayperin ailə üzvləri, atası Əmirsoltan Abdullayev və anası Sevil xanımla görüşüb, ailəsi Aydınla bağlı xatirələrini bölüşüblər. Şəhidin valideynləri oğullarının anım günündə onları tək qoymadığına və şəhidin xatirəsini əziz tutduğuna görə N. Məmmədovaya təşəkkürlərini bildiriblər.
Məlumat üçün bildirək ki, Azərbaycan Ordusunun giziri Mübariz İbrahimovun qəhrəmanlığı hərbi xidmətini başa vurmuş Aydın Abdullayevin içindəki Vətən sevgisini daha da alovlandırır, bu istək onu həm də illərdir düşmən tapdağı altında qalan torpaqlara, güllə yağışlarının və təhlükənin olduğu səngərlərə çəkir. Odur ki, evin sonbeşiyi sənədlərini Suraxanı Rayon Hərbi Komissarlığına verir. Qaraheybət təlim mərkəzinə göndərilən Aydın burada kəşfiyyatçı-snayper hazırlığı keçir. Altı aylıq təlimdən sonra onu kəşfiyyatçı-snayper kimi qaynar nöqtələrdən birinə - düşmənlə təmas xətti olan Tərtərin Qapanlı kəndinə göndərirlər. Oktyabrın 26-da Tərtər istiqamətində düşmənlə təmas xəttində atəşkəsin pozulması nəticəsində gizir Aydın Abdullayev Vətən uğrunda şəhid olur.
Azərbaycan Respublikası Mədəniyyət Nazirliyi Respublika Xatirə Kitabı redaksiyası ilə Bakı - Xəbər" qəzetinin birgə layihəsi olan "Şəhidlər ölməz, Vətən bölünməz" silsiləsindən
Aydın Abdullayevə həsr olunmuş “Gözlə gələcəyəm” adlı kitab çap edilib.
İradə SARIYEVA
