“Prezident İlham Əliyevin rəhbərliyi ilə aparılan sosial siyasətin bir istiqaməti də rəqabətqabiliyyətli insan kapitalının formalaşması və yüksəkixtisaslı kadrların yetişdirilməsidir. Bu məqsədlə son 20 ildə dövlət büdcəsindən təhsilə ayrılan xərclər 19 dəfə artıb”. Bunu Baş nazir Əli Əsədov deyib.
Qeyd edək ki, ötən müddət ərzində təhsilin inkişafı məqsədilə bir sıra addımlar atılıb və bunlardan biri kimi "2023-cü il dövlət büdcəsi haqqında" Qanunda təhsilə 4,4 milyard manat vəsait ayrılıb. Bu da 2022-ci illə müqayisədə 536,5 milyon manat və ya 13,8 faiz, 2021-ci ilin icra göstəriciləri ilə müqayisədə isə 1,3 milyard manat (42,4 faiz) çoxdur.
Təhsilin inkişafı istiqamətində infrastrukturun yaradılması mühüm əhəmiyyət kəsb edir ki, bu baxımdan son 20 ildə paytaxtda və regionlarda çoxlu sayda məktəb tiklib və ya əsaslı təmir olunub.
Qeyd edək ki, təhsilə bu qədər vesait ayrılsa da, təhsilin keyfiyyəti hələ də qaneedici səviyyədə deyil. Maraqlıdır, təhsildə keyfiyyətin dəyişmə səviyyəsi niyə hələ də qənaətbəxş deyil?
Kamran Əsədov: “Bu sahədə aparılan islahatların nəticəsini görmək üçün azı 7-8 il vaxt lazımdır”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, təhsil dövlət büdcəsindən ən çox vəsait alan ikinci sahədir: “Məlum olduğu kimi, bu il təhsilə 4,4 milyard pul ayrılıb. O da bəllidir ki, 30 ildən sonra torpaqlarımız işğal altından azad olunub. Həmin ərazilərdə də təhsillə bağlı ciddi quruculuq və bərpa işləri həyata keçirilir. Ölkəmizdə təhsil icbaridir. 4432 orta ümumtəhsil müəssisəsində bütün şagirdlər pulsuz təhsil alır. Ali məktəblərdə qəbul yerlərinin də 50 faizi pulsuzdur. Dövlət büdcəsində kifayət qədər şəxsə pulsuz ali təhsil almaq imkanı yaradılıb. Eyni zamanda, aztəminatlı və həssas təbəqəyə aid olan ailələrin övladlarının təhsil haqqı dövlət tərəfindən ödənilir".
Ekspertin sözlərinə görə, təhsil ciddi sahədir. Bu sahədə aparılan islahatların nəticəsini görmək üçün azı 7-8 il vaxt lazımdır: "Onu da deyim ki, Azərbaycan məktəbliləri beynəlxalq olimpiadalarda kifayət qədər uğur əldə edib. Həmçinin, ali təhsildə rəqabət mühiti yaranıb. Ölkəmizdə təhsil alan xarici vətəndaşların sayı ildən-ilə artır. Orta məktəblərdə müəllimlərin sertifikasiya prosesindən sonra müəllimlərin əmək haqqı artıb. Son 3 ildə müəllimlərin əmək haqqı əvvəlki dövrlə müqayisədə 65 faiz artıb. Direktor, onların müavinlərinin işə qəbulu şəffaf şəkildə həyata keçirilir. İnkişaf olan yerdə narazılıqlar da olacaq. Ümumilikdə bütün sahədə keçirilən islahatlar nəticəsində inkişaf əldə olunub”.
Nadir İsrafilov: “Təhsilin keyfiyyətinə yanaşma dəyişməyincə, bu barədə söz demək olmaz”
Təhsil eksperti Nadir İsrafilov bildirdi ki, təhsilin keyfiyyətinə yanaşma dəyişməyincə, bu barədə söz demək olmaz: “Heç bir rəsmi təhsil qanunvericiliyində orta məktəbin ali məktəbə tələbə hazırlamaq vəzifəsi qoyulmayıb. Bu gün bizim əsas vəzifəmiz şəxsiyyətyönümlü vətəndaş hazırlamaqdır. 44 günlük Vətən müharibəsindəki qələbəmiz, növbəti zəfərlərimiz sübut edir ki, biz vətəndaş yetişdirmək sahəsində müəyyən işlər görmüşük. Bilik ümumi vəzifənin tərkib hissəsidir. Bu gün təhsil dövlətin prioritet siyasətlərindən biridir. 2013-cü ildə ölkə başçısı tərəfindən təsdiq olunan “Təhsil Sahəsində Dövlət Strategiyası”nda 5 hədəf müəyyənləşib ki, onlardan biri müəllim nüfuzunun yüksəldilməsidir. Müəllim nüfuzunun yüksəldilməsi üçün əmək haqqının yüksəldilməsi kimi bütün variantlara əl atılır. İldən-ilə əmək haqlarında artım müşahidə edilir. Hazırda sertifikasiya keçirilir və müəllimlərin peşə səviyyəsi müəyyənləşir. Yüksək bal toplayanların da əmək haqqında müəyyən artımlar olur. Ölkənin büdcəsi, sosial xərclər artdıqca, müəllimlərin əmək haqqında artım gözlənilir”.
Günel CƏLİLOVA
