Bu gün bütün dünyanı narahat edən, insanların mənəviyyatına, genofonduna ağır və sağalmaz zərbə vuran dəhşətli bəla – narkomaniya bizim respublikada da öz fəsadlarını göstərir.
Hətta son illər azyaşlılar da bu faciəyə toruna düşürlər. Yaranmaqda olan fəlakəti dayandırmaq üçün ona qarşı daha ciddi mübarizə aparmaq, ən əsası, hər bir kəsin gənc nəslin sağlam böyüməsinə məsuliyyət daşıması tələb olunur. Çünki gələcəyimizin sağlamlığı, firavanlığı indiki sinif otaqlarda yetişən yeniyetmələrdən aşlıdır.
Masallı Rayon Polis Şöbəsinin əməkdaşları narkomaniyaya “YOX” deyək çağırış ilə təhsil ocaqlarında tələbə və məktəblilər arasında maarifləndirici tədbirlərə çox üstünlük verirlər. Şöbənin növbəti belə tədbiri Masallı Gənclər Evində baş tutub.
“Narkomaniya və erkən nikahlara yox deyək!“ mövzusunda Masallı Dövlət Regional Kollecin tələbələri ilə keçən görüşdə Rayon Polis şöbəsinin rəisi, polis polkovniki A.Ağayev narkomaniyaya qarşı mübarizədə dövlətin həyata keçirdiyi tədbirlər haqqında, narkotik vasitələrin insan orqanizminə göstərdiyi mənfi təsirlər, gələcəkdə sağlamlığa törədəcəyi ağır fəsadlar barədə danışaraq deyib: - Müasir dövrdə bütövlüklə bəşəriyyət üçün dəhşətli bəlaya çevrilən narkomaniyaya qarşı mübarizə hər şeydən vacibdir. Sağlam gəncliyin və etibarlı gələcəyin qurulması baxımında belə maarifləndirici görüşlərin davamlı şəkildə aparılması olduqca zəruri məsələdir. Bu, səbəbdən narkotik vasitələrin qanunsuz dövriyyəsinin qarşısının alınması istiqamətində hüquq-mühafizə orqanları barışmaz, qətiyyətli tədbirlər görürlər. Təəssüf ki, respublikada, eləcə bizim rayonda narkomaniyadan istifadə edənlər vardır. Gəlin, gələcəyimizi birlikdə düşünək. Bunun üçün bu “ağ ölüm”lə mübarizə aparmaq cəmiyyətin, onun hər bir fərdinin qarşısında vacib məsələ kimi durur. Bəli, narkomaniyaya qarşı birgə gördüyümüz işlər sağlam həyatın təminatıdır.
Digər çıxışçılarda bəşəriyyətin ən ağır bəlası olan narkomaniya barədə tələbələrə ətraflı məlumat verməklə, bu cür profilaktik tədbirlərin təşkilini həm dövlət gənclər siyasətinin, həm də təhsil siyasətinin mühüm istiqaməti olduğunu vurğulayıb, tələbələri belə həssas mövzulara diqqətlə yanaşmağa, dəyərli tövsiyələrə əməl etməyə çağırıblar. Gənc nəsli vətəndaş cəmiyyətinin inkişafında aktiv iştirak etməyə səsləyib, onlara ölkəmizin milli-mədəni irsinə bağlı, vətənpərvər ruhda böyüməsini arzulayıblar.
Görüşdə, həmçinin erkən nikahların insan həyatına gətirdiyi fəsadlardan, cəmiyyətə neqativ təsirdən danışılıb. Bütün çıxışlar dinlənib, müzakirə edilən mövzularla bağlı videoçarx nümayiş olunub. Tələbələri düşündürən suallara isə Polis şöbəsinin rəisi, polis polkovniki A.Ağayev ətraflı cavablar verib və bir daha gəncləri bu zərərli vərdişlərdən uzaq durmağa çağırıb.
Zəfər ORUCOĞLU Azərbaycan Jurnalistlər Birliyinin üzvü
